نئی دہلی

پیپلز ڈیموکریٹک پارٹی (پی ڈی پی) کی صدر محبوبہ مفتی نے پیر کے روز کہا کہ کشمیری پنڈتوں کو ایک مشترکہ مستقبل کی تعمیر پر توجہ دینی چاہیے اور ماضی کی تلخیوں کو بھلا کر آگے بڑھنا چاہیے۔جموں و کشمیر کی سابق وزیر اعلیٰ محبوبہ مفتی نے وسطی کشمیر کے ضلع گاندربل میں واقع مشہور ماتا کھیر بھوانی مندر کا دورہ کیا اور سالانہ میلے کے موقع پر وہاں آنے والے کشمیری پنڈتوں سے ملاقات اور گفتگو کی۔

انہوں نے صحافیوں سے بات کرتے ہوئے کہا کہ میلے میں بڑی تعداد میں کشمیری پنڈت شریک ہوئے ہیں اور کشمیر کے لوگ دل کی گہرائیوں سے ان کا خیرمقدم کرتے ہیں۔پی ڈی پی سربراہ نے کہا کہ ہم چاہتے ہیں کہ ہمارے کشمیری پنڈت بھائی بہن ماضی میں جو کچھ بھی ہوا اسے بھلا کر مستقبل کی جانب دیکھیں۔

سوشل میڈیا پلیٹ فارم ‘ایکس’ پر ایک پوسٹ میں محبوبہ مفتی نے کہا کہ کھیر بھوانی میلے کے مناظر دل کو چھو لینے والے تھے اور انہیں الفاظ میں بیان نہیں کیا جا سکتا۔انہوں نے لکھا کہ کشمیری پنڈتوں اور مسلمانوں کے درمیان محبت، گرمجوشی اور اپنائیت نے بداعتمادی اور تقسیم کی ان دیواروں کو گرا دیا ہے جنہیں بعض عناصر نے اپنے مفادات کے لیے کھڑا کرنے کی کوشش کی تھی۔ اب وقت آ گیا ہے کہ ہم ماضی کی قید سے آزاد ہو کر ایک مشترکہ اور روشن مستقبل کی تعمیر میں سرمایہ کاری کریں۔