بنگلورو
بھارتیہ جنتا پارٹی (بی جے پی) کے ترجمان شہزاد پونا والا نے ہفتہ کے روز کہا کہ گزشتہ تقریباً تین برسوں سے کرناٹک کی سیاست ایک "گیم آف تھرونز" کی طرح بن گئی ہے، جہاں وزیر اعلیٰ کی کرسی کو لے کر کانگریس کے کئی رہنماؤں، خصوصاً سدارامیا اور ڈی کے شیوکمار کے درمیان مسلسل کشمکش دیکھنے کو ملی ہے۔اے این آئی سے گفتگو کرتے ہوئے انہوں نے کہا کہ اصل سوال یہ ہے کہ کانگریس صرف اقتدار کے حصول پر توجہ دے گی یا عوام کو درپیش مسائل کے حل پر بھی توجہ مرکوز کرے گی۔
شہزاد پونا والا نے کہا کہ تقریباً تین سال سے کرناٹک کی سیاست گیم آف تھرونز جیسی دکھائی دے رہی ہے۔ وزیر اعلیٰ کون بنے گا، اس معاملے پر مسلسل رسہ کشی جاری رہی اور کئی رہنما اپنے اپنے دعوے پیش کرتے رہے۔ سوال یہ ہے کہ کیا کانگریس صرف اقتدار پر توجہ دے گی یا عوامی مسائل پر بھی توجہ دے گی؟
انہوں نے بنگلورو کے بنیادی ڈھانچے پر تنقید کرتے ہوئے کہا کہ بنگلورو میں تھوڑی سی بارش بھی سڑکوں کو تالاب میں تبدیل کر دیتی ہے، جس سے کمزور بنیادی ڈھانچے کی حقیقت سامنے آ جاتی ہے۔ آبی جمعاؤ، خراب قانون و انتظام، پینے کے پانی کی قلت اور خواتین کے تحفظ جیسے مسائل موجود ہیں۔ شہری ملک میں سب سے زیادہ ٹیکس ادا کرنے والوں میں شامل ہیں، لیکن اس کے باوجود انہیں ایسے حالات کا سامنا کرنا پڑتا ہے۔
راہل گاندھی پر بھی تنقید
بی جے پی ترجمان نے لوک سبھا میں قائدِ حزبِ اختلاف راہل گاندھی کو بھی نشانہ بناتے ہوئے کانگریس کے او بی سی نمائندگی کے دعووں پر سوال اٹھایا۔
انہوں نے کہا کہ کانگریس ماضی میں او بی سی نمائندگی کی بات کرتی رہی ہے۔ راہل گاندھی اکثر ذات پات کی سیاست پر گفتگو کرتے ہیں، لیکن ناقدین کا کہنا ہے کہ کانگریس نے اپنی جماعت کے اندر او بی سی طبقے کو حقیقی قیادت کے مواقع فراہم نہیں کیے۔
پونا والا نے سوال کیا کہ کانگریس آخر کب اپنی اندرونی لڑائیوں سے نکل کر عوامی مسائل کے حل پر توجہ دے گی۔
نئے وزیر اعلیٰ کے نام پر قیاس آرائیاں
شہزاد پونا والا کا یہ بیان ایسے وقت میں سامنے آیا ہے جب جمعرات کو سدارامیا کے استعفے کے بعد کرناٹک کے اگلے وزیر اعلیٰ کے نام پر سیاسی سرگرمیاں تیز ہو گئی ہیں۔کانگریس آج شام 4 بجے بنگلورو کے ودھان سودھا میں اپنی قانون ساز پارٹی کا اجلاس منعقد کرنے جا رہی ہے، جہاں ڈی کے شیوکمار کو وزیر اعلیٰ کے امیدوار کے طور پر منتخب کیے جانے کا امکان ظاہر کیا جا رہا ہے۔
جمعہ کے روز سدارامیا اور ڈی کے شیوکمار نے نئی دہلی میں کانگریس کی اعلیٰ قیادت سے ملاقات کی تھی، جہاں ریاست میں آئندہ کابینہ ردوبدل اور سیاسی صورتحال پر تفصیلی تبادلۂ خیال کیا گیا۔
