بنگلورو

 کرناٹک کے وزیر پرینک کھرگے نے جمعہ کے روز کہا کہ ریاستی حکومت نے اس کمپنی سے وضاحت طلب کی ہے، جس سے منسلک ڈے کیئر سنٹر میں کم عمر بچوں کے ساتھ مبینہ بدسلوکی کا واقعہ پیش آیا ہے۔ انہوں نے واضح کیا کہ ایسے معاملات میں "زیرو ٹالرنس" کی پالیسی اختیار کی جائے گی اور تحقیقاتی رپورٹ کی بنیاد پر کارروائی کی جائے گی۔

میڈیا سے گفتگو کرتے ہوئے کھرگے نے کہا کہ محکمہ خواتین و اطفال بہبود پہلے ہی متعلقہ کمپنی سے وضاحت طلب کر چکا ہے۔ انہوں نے زور دے کر کہا کہ ڈے کیئر سنٹر چلانے والی تمام تنظیموں کو مقررہ رہنما اصولوں اور اپنے عالمی معیار کے آپریٹنگ طریقہ کار (ایس او پیز) پر سختی سے عمل کرنا چاہیے۔

انہوں نے کہا کہ اس معاملے میں ہماری پالیسی زیرو ٹالرنس کی ہے۔ ہمارا محکمہ پہلے ہی ان سے وضاحت طلب کر چکا ہے۔ ایسی بڑی اور معروف کمپنیوں کی اپنی پالیسیاں ہوتی ہیں۔ یہ صرف ہندوستان تک محدود نہیں ہوتیں، بلکہ ان کی عالمی پالیسیاں ہوتی ہیں، جن کے مطابق انہیں کام کرنا ہوتا ہے۔ ان کے پاس کریچ، نرسری اور ڈے کیئر سنٹر چلانے کے لیے معیاری طریقہ کار موجود ہوتے ہیں۔کھرگے نے کہا کہ حکومت کو شبہ ہے کہ عملے کی مناسب جانچ اور پس منظر کی چھان بین نہیں کی گئی۔

انہوں نے مزید کہا کہ ان ضوابط کے مطابق ملازمین کی تصدیق اور مختلف قسم کی پس منظر کی جانچ ضروری تھی۔ ہمارا ماننا ہے کہ ایسا نہیں کیا گیا۔ انہیں اس بارے میں تحریری طور پر جواب دینا ہوگا۔ تاہم، کوئی بھی کمپنی، چاہے وہ کتنی ہی بڑی کیوں نہ ہو، اس طرح کی غفلت نہیں برت سکتی۔ خاص طور پر جب معاملہ کم عمر بچوں کا ہو تو انتہائی ذمہ داری کا مظاہرہ کرنا چاہیے۔

وزیر نے اس واقعے کو "باعث شرم" قرار دیتے ہوئے کہا کہ محکمہ خواتین و اطفال بہبود اور کارپوریٹ اداروں، دونوں کے پاس ڈے کیئر مراکز کے انتظام سے متعلق واضح رہنما اصول موجود ہیں۔انہوں نے کہا کہ جو کچھ ہوا ہے، وہ واقعی شرمناک ہے۔ ان عالمی کمپنیوں سے زیادہ ذمہ داری کی توقع کی جاتی ہے۔ اس طرح کے واقعات ہمارے شہر، جسے ہم 'برانڈ بنگلورو' کہتے ہیں، کی ساکھ کو بھی نقصان پہنچاتے ہیں۔ رپورٹ آنے کے بعد اس کے مطابق کارروائی کی جائے گی۔

ان کا یہ بیان ایک دن بعد سامنے آیا، جب بنگلورو کے پولیس کمشنر سمنت کمار سنگھ نے مشرقی بنگلورو میں واقع ایک آئی ٹی کمپنی کے کیمپس کے اندر قائم کریچ میں بچوں کے ساتھ مبینہ بدسلوکی کے معاملے میں یقین دہانی کرائی تھی کہ کسی بھی ملزم کو بخشا نہیں جائے گا۔

پولیس کے مطابق، ڈے کیئر سنٹر میں آیا کے طور پر کام کرنے والی پانچ خواتین کو گرفتار کیا گیا ہے، جب ان کی جانب سے بچوں کے ساتھ مبینہ بدسلوکی کی ویڈیوز سامنے آئیں۔ گرفتار ملزمان کی شناخت منجولا، وجیا لکشمی، بھوانی، سندھو اور بندو کے طور پر ہوئی ہے۔

ایچ اے ایل پولیس نے جووینائل جسٹس (بچوں کی دیکھ بھال اور تحفظ) ایکٹ اور بھارتیہ نیائے سنہتا کی دفعہ 351 کے تحت مقدمہ درج کر لیا ہے۔پولیس کے مطابق، ویڈیوز میں مبینہ طور پر کم عمر بچوں کو جسمانی اور ذہنی اذیت کا نشانہ بناتے ہوئے دکھایا گیا ہے، جن میں بچوں کو واشنگ مشین کے اندر رکھنا، ٹوائلٹ کے جیٹ اسپرے سے پانی پھینکنا، بیت الخلا میں بند کرنا اور انہیں خاموش رہنے کے لیے دھمکانا شامل ہے۔ حکام نے بتایا کہ معاملے کی تحقیقات جاری ہیں اور سی سی ٹی وی فوٹیج سمیت دیگر تکنیکی شواہد کا جائزہ لیا جا رہا ہے۔