کابل۔ ضلع 4 کے کئی رہائشیوں نے زیر زمین پانی کی سطح میں تیزی سے کمی پر تشویش ظاہر کی ہے۔ ان کا کہنا ہے کہ اس کمی نے ان کے گھروں اور روزمرہ زندگی میں سنگین مسائل پیدا کر دیے ہیں۔طلو نیوز کے مطابق شہریوں نے اسلامی امارت افغانستان سے مطالبہ کیا ہے کہ وہ پانی کے بڑھتے ہوئے بحران پر فوری کارروائی کرے۔ضلع 4 کے رہائشی شاہپور نے کہا کہ ہمیں پانی کے بہت مسائل ہیں۔ ہم یہاں بیس سال سے رہ رہے ہیں اور ہر بار ہمیں نیا کنواں کھودنے پر مجبور ہونا پڑتا ہے۔

ایک اور مقامی باشندے عبدالراشد نے حکام سے مدد کی اپیل کرتے ہوئے کہا کہ ہم اسلامی امارت افغانستان سے درخواست کرتے ہیں کہ وہ ہمیں پانی کی فراہمی میں مدد کرے۔ ہمارا پانی پاکستان اور ایران جا رہا ہے۔ پنجشیر اور سالنگ دریاؤں سے پائپ لائنیں ہونی چاہئیں۔طلو نیوز کے مطابق بہت سے شہری بنیادی پانی کی ضروریات پوری کرنے میں مشکلات کا سامنا کر رہے ہیں۔ اکثر اوقات انہیں چند بیرل پانی کے لیے گھنٹوں انتظار کرنا پڑتا ہے۔ ایک اور رہائشی مہران نے کہا کہ ہم چار یا پانچ بیرل پانی لاتے ہیں اور گھنٹوں انتظار کرتے ہیں۔ صورتحال بہت مشکل ہو گئی ہے۔

ماہرین نے خبردار کیا ہے کہ پانی کی کمی صرف مقامی نہیں بلکہ قومی سطح پر اقتصادی، سماجی اور ماحولیاتی خطرات بھی پیدا کر رہی ہے۔ پانی کی رسائی کم ہونے سے معیشت متاثر ہوتی ہے۔ ہم نے کئی صوبوں میں نقل مکانی دیکھی ہے۔ ہرات میں لوگ ہمسایہ صوبوں سے ہجرت کر کے آئے اور کچھ بیرون ملک چلے گئے۔ یہ بات طلو نیوز کے مطابق پانی کے ماہر نجیب اللہ صدیق نے کہی۔

وزارتِ توانائی و آب نے زیر زمین پانی کی کمی کی وجہ موسمی تبدیلی اور بے منصوبہ شہری ترقی کو قرار دیا ہے۔ وزارت کے ترجمان مطیع اللہ عابد نے کہا کہ موسمی تبدیلی نے نہ صرف افغانستان بلکہ پورے خطے کے ممالک کو متاثر کیا ہے۔ افغانستان ان ممالک میں شامل ہے جو خشک سالی سے سب سے زیادہ متاثر ہوئے ہیں اور بارش میں کمی آئی ہے۔ شہروں میں بے منصوبہ ترقی پانی کے وسائل میں کمی کی بڑی وجہ ہے۔

طلو نیوز کے مطابق حالیہ برسوں میں افغانستان اپنی تاریخ کے سب سے شدید خشک سالی کے دور سے گزر رہا ہے۔ بڑے شہروں خصوصاً کابل میں زیر زمین پانی کی سطح خطرناک حد تک نیچے جا چکی ہے۔