نندی گرام

مغربی بنگال اسمبلی میں قائدِ حزبِ اختلاف اور بی جے پی امیدوار سویندو ادھیکاری نے جمعرات کے روز ریاستی اسمبلی انتخابات کے دوران اپنے حلقے نندی گرام میں حساس پولنگ بوتھس کا معائنہ کیا۔

صحافیوں سے بات کرتے ہوئے ادھیکاری نے دعویٰ کیا کہ انہیں ایک پولنگ بوتھ میں داخل ہونے کی اجازت نہیں دی گئی۔ انہوں نے کہا، "مجھے اس پولنگ بوتھ میں جانے نہیں دیا گیا۔ عام آدمی امن چاہتا ہے۔ جو امن کو خراب کرے گا، ہم اس کا مقابلہ کریں گے۔اس سے قبل انہوں نے نندی گرام کے ایک پولنگ اسٹیشن پر اپنا ووٹ بھی ڈالا۔ ادھیکاری اس کے علاوہ وزیراعلیٰ ممتا بنرجی کے خلاف بھوانی پور سے بھی انتخاب لڑ رہے ہیں۔

انہوں نے ووٹ ڈالنے کے بعد میڈیا سے گفتگو میں کہا، "تبدیلی آئے گی۔ اگر اس بار تبدیلی نہ آئی تو بنگال میں سناتن ختم ہو جائے گا۔ الیکشن کمیشن اچھا کام کر رہا ہے، لیکن ہر جگہ کچھ غنڈے موجود ہیں۔ ہمارے پولنگ ایجنٹ کو گرفتار کر لیا گیا ہے، فوری سخت کارروائی ہونی چاہیے۔

مغربی بنگال کی بھوانی پور اسمبلی سیٹ اس وقت سیاست کا مرکز بنی ہوئی ہے، جہاں وزیراعلیٰ ممتا بنرجی اور قائدِ حزبِ اختلاف سویندو ادھیکاری کے درمیان زبردست مقابلہ دیکھنے کو مل رہا ہے۔یہ دونوں رہنما پہلے بھی آمنے سامنے آ چکے ہیں۔ 2021 کے مغربی بنگال انتخابات میں ادھیکاری نے نندی گرام سے ممتا بنرجی کو چیلنج کیا تھا اور 1,956 ووٹوں سے کامیابی حاصل کی تھی۔ اس شکست کے بعد ترنمول کانگریس کی سربراہ ممتا بنرجی نے بھوانی پور سے ضمنی انتخاب لڑا تھا، کیونکہ ایم ایل اے سوبھندیپ چٹوپادھیائے نے اپنی نشست چھوڑ دی تھی۔

نندی گرام میں اس بار سویندو ادھیکاری کا مقابلہ ترنمول کانگریس کے امیدوار پبتر کار سے ہے۔

مغربی بنگال میں ووٹنگ کے ابتدائی چند گھنٹوں میں ہی ووٹرز کی بڑی تعداد دیکھنے میں آئی۔ الیکشن کمیشن آف انڈیا کے مطابق جمعرات کو صبح 11 بجے تک پہلے مرحلے میں ووٹنگ کا تناسب 41.11 فیصد ریکارڈ کیا گیا۔

ضلع پشچم مدناپور میں سب سے زیادہ 44.68 فیصد ووٹنگ ہوئی، اس کے بعد جھارگرام میں 43.71 فیصد اور بانکورہ میں 43.22 فیصد ووٹنگ درج کی گئی، جبکہ سب سے کم ووٹنگ مالدہ میں 38.22 فیصد رہی۔ووٹوں کی گنتی 4 مئی کو کی جائے گی