نئی دہلی
جھارکھنڈ حکومت اپنے 'ویژن 2050' کے اہداف کو حاصل کرنے کی سمت میں کوششوں کو تیز کرنے کے لیے 8 جولائی سے نئی دہلی میں دو روزہ قومی اسٹیک ہولڈر مشاورتی کانفرنس کا انعقاد کرے گی۔ حکومت کی جانب سے جمعہ کے روز جاری بیان میں یہ معلومات دی گئی۔
بیان کے مطابق، انفارمیشن ٹیکنالوجی، صنعت اور سیاحت کے محکموں کی جانب سے منعقد کیے جانے والے اس پروگرام کی قیادت وزیر اعلیٰ ہیمنت سورین کریں گے۔ اس کانفرنس میں ہندوستان اور بیرون ملک کے ممتاز پالیسی ساز، صنعتی شعبے کے نمائندے، سرمایہ کار، ٹیکنالوجی ماہرین اور ترقیاتی شراکت دار شرکت کریں گے۔
کانفرنس میں جھارکھنڈ کے طویل مدتی ترقیاتی ایجنڈے پر تفصیلی تبادلہ خیال کیا جائے گا۔
بیان میں کہا گیا ہے کہ یہ پروگرام انفارمیشن ٹیکنالوجی، مصنوعی ذہانت (اے آئی)، ڈیجیٹل خدمات، صنعتی سرمایہ کاری اور سیاحت کے شعبوں میں جھارکھنڈ کو سرمایہ کاری کے لیے ایک پسندیدہ مرکز کے طور پر قائم کرنے اور ریاست کے 'ایکسپلور اِنفینٹ اپورچونٹیز' وژن کو آگے بڑھانے کی سمت میں ایک اہم قدم ثابت ہوگا۔
پروگرام کے دوران جھارکھنڈ میں سرمایہ کاری اور اقتصادی ترقی کو فروغ دینے کے مقصد سے کئی بڑے صنعتی گروپوں کے ساتھ اسٹریٹجک مفاہمتی یادداشتوں (ایم او یوز) پر بھی دستخط کیے جائیں گے۔
