جے پور

امریکی وزیرِ خارجہ مارکو روبیو پیر کی دوپہر جے پور پہنچے اور آج آگرہ میں مشہور تاج محل کی سیر کرنے کے کچھ ہی دیر بعد اپنی اہلیہ جینیٹ روبیو اور ہندوستان میں امریکی سفیر سرجیو گور کے ساتھ تاریخی عامر قلعہ کا دورہ کیا۔ روبیو اپنی اہلیہ اور امریکی وفد کے ہمراہ ’’پنک سٹی‘‘ یعنی ’’گلابی شہر‘‘ جے پور میں موجود ہیں۔

اس سے قبل پیر کے روز روبیو نے اپنی اہلیہ جینیٹ روبیو کے ساتھ تاج محل کا دورہ کیا اور اس یادگار کو دنیا کے عظیم خزانوں میں سے ایک قرار دیا۔ انہوں نے تاج محل میں تقریباً ڈیڑھ گھنٹہ گزارا اور وزیٹرز بک میں لکھا کہ ہمیں دنیا کے حقیقی خزانوں میں سے ایک کو دیکھنے کا موقع دینے کے لیے شکریہ۔

اس عظیم مقبرے کے دورے کی چند جھلکیاں شیئر کرتے ہوئے امریکی سفیر سرجیو گور نے اسے ہندوستان کے غیرمعمولی ثقافتی ورثے اور اعلیٰ درجے کی کاریگری کی دل موہ لینے والی علامت قرار دیا۔گزشتہ سال امریکی نائب صدر جے ڈی وینس نے اپنی اہلیہ اوشا وینس اور اپنے بچوں ویویک، میرابیل اور ایون کے ساتھ اس تاریخی یادگار کا دورہ کیا تھا۔ اس سے قبل بھی کئی عالمی رہنما تاج محل کی سیر کر چکے ہیں، جن میں سابق امریکی صدر ڈونلڈ ٹرمپ بھی شامل ہیں، جنہوں نے اپنے پہلے صدارتی دور میں خاتونِ اول میلانیا ٹرمپ کے ہمراہ اس یادگار کا دورہ کیا تھا۔

اپنے دورے کے دوران ٹرمپ نے اس یادگار کو ہندوستان کی ثقافتی عظمت کی علامت قرار دیتے ہوئے کہا تھاکہ تاج محل حیرت انگیز ہے؛ یہ ہندوستانی ثقافت کی رنگا رنگ اور شاندار خوبصورتی کا لازوال ثبوت ہے۔ شکریہ، ہندوستان۔

روبیو کا جے پور کا یہ دورہ ان کے چار روزہ دورۂ ہندوستان کا حصہ ہے، جس کے دوران وہ منگل کو کواڈ سربراہی اجلاس میں شرکت کریں گے۔ انہوں نے اپنے دورۂ ہندوستان کا آغاز کولکتہ میں واقع مشنریز آف چیریٹی سے کیا، جس کے بعد انہوں نے وزیرِ اعظم نریندر مودی سے ملاقات کی اور پھر وزیرِ خارجہ ایس جے شنکر کے ساتھ وفود کی سطح پر مذاکرات کیے۔ روبیو نے قومی سلامتی کے مشیر اجیت دوول کے ساتھ بھی تبادلۂ خیال کیا۔

اس خطے پر توجہ مرکوز رکھنے والی ایک اہم سفارتی سرگرمی کے تحت، ہندوستان قومی دارالحکومت میں کواڈ ممالک کے وزرائے خارجہ کی میزبانی کی تیاری کر رہا ہے تاکہ ہند-بحرالکاہل خطے کی بدلتی ہوئی سیکیورٹی صورتحال اور مغربی ایشیا میں بڑھتی ہوئی کشیدگی کے مختلف پہلوؤں پر غور کیا جا سکے۔کواڈری لیٹرل سیکیورٹی ڈائیلاگ، جس میں ہندوستان، امریکہ، آسٹریلیا اور جاپان شامل ہیں، کی اعلیٰ سطحی میٹنگ 26 مئی کو وزیرِ خارجہ ایس جے شنکر کی صدارت میں منعقد ہونے والی ہے۔