نئی دہلی

سابق نائب صدر جگدیپ دھنکھڑ نے کہا ہے کہ انہوں نے اپنے عہدے سے استعفیٰ دیتے وقت کبھی بھی اپنی بیماری کا دعویٰ نہیں کیا۔ انہوں نے واضح کیا کہ انہوں نے صرف یہ کہا تھا کہ وہ اپنی صحت کو ترجیح دے رہے ہیں، اور ایسا ہر شخص کو کرنا چاہیے۔

راجستھان کے چورو میں ایک مختصر اجتماع سے خطاب کرتے ہوئے سابق نائب صدر دھنکھڑ نے کہا كہ کہا جاتا ہے کہ پہلا سکھ صحت مند جسم ہے۔ میں نے کبھی صحت کے معاملے میں لاپرواہی نہیں برتی۔ جب میں نے کہا کہ میں عہدہ چھوڑ رہا ہوں تو میں نے یہ کبھی نہیں کہا کہ میں بیمار ہوں۔ میں نے صرف یہ کہا کہ میں اپنی صحت کو اہمیت دے رہا ہوں۔ صحت کو اہمیت دینی چاہیے، کیونکہ ہمارے شاستروں میں بھی یہی کہا گیا ہے۔ میں نے اکثر ایسی باتیں کہی ہیں جن سے لوگ ناراض ہوئے، لیکن میں نے ہمیشہ صاف اور سیدھی بات کہی ہے۔

چورو میں دھنکھڑ کی میزبانی کانگریس کے سابق رکنِ پارلیمان رام سنگھ کاسوان اور اولمپین و کانگریس کی سابق رکنِ اسمبلی کرشنا پونیا نے کی۔ سابق نائب صدر نے کہا کہ رام سنگھ کی صحت کو لے کر تشویش ہی انہیں چورو لے آئی، اور جب بھی وہ بیمار ہوئے ہیں، رام سنگھ سب سے پہلے ان کا حال پوچھنے والوں میں شامل رہے ہیں۔

جگدیپ دھنکھڑ نے نائب صدر کے عہدے سے استعفیٰ دیا تھا

۔21 جولائی 2025 کو مانسون اجلاس شروع ہونے سے ایک دن پہلے انہوں نے صدرِ جمہوریہ دروپدی مرمو کو اپنا استعفیٰ سونپ دیا تھا۔ اس اچانک فیصلے سے حکمراں جماعت اور حزبِ اختلاف دونوں ہی حیران رہ گئے تھے۔ اپوزیشن جماعتوں نے اس معاملے پر سوال اٹھائے اور دعویٰ کیا کہ استعفیٰ کے پیچھے کوئی اور وجہ بھی ہو سکتی ہے۔

جگدیپ دھنکھڑ نے 21 جولائی 2025 کو صدرِ جمہوریہ کو لکھے گئے اپنے خط میں کہا تھا کہ وہ صحت کو ترجیح دینے اور طبی مشورے پر عمل کرنے کے لیے استعفیٰ دے رہے ہیں۔ دھنکھڑ نے لکھا كہ میں آئین کے آرٹیکل 67A کے تحت اپنے عہدے سے استعفیٰ دیتا ہوں۔ میں ہندوستان کے صدرِ جمہوریہ کے تئیں گہری تشکرگزاری کا اظہار کرتا ہوں۔ آپ کی حمایت غیر متزلزل رہی اور میرا دورِ کار پُرسکون اور شاندار رہا۔ میں معزز وزیر اعظم اور وزرائے کونسل کا بھی تہہ دل سے شکر گزار ہوں۔ وزیر اعظم کا تعاون اور حمایت بے حد قیمتی رہی اور میں نے اپنے دورِ کار میں ان سے بہت کچھ سیکھا۔

انہوں نے مزید لکھا كہ معزز اراکینِ پارلیمان کی جانب سے جو محبت، اعتماد اور اپنائیت مجھے ملی، وہ ہمیشہ میری یادوں میں رہے گی۔ میں اس عظیم جمہوریت کا شکر گزار ہوں کہ مجھے نائب صدر کی حیثیت سے جو تجربہ اور علم حاصل ہوا، وہ نہایت قیمتی رہا۔ یہ میرے لیے خوش قسمتی اور اطمینان کی بات رہی کہ میں نے ہندوستان کی غیر معمولی اقتصادی ترقی اور تبدیلی کے دور میں تیز رفتار نشوونما کو دیکھا اور اس میں اپنی شمولیت ادا کی۔ اس اہم دور میں خدمت کرنا میرے لیے حقیقی اعزاز رہا ہے۔ آج جب میں یہ عہدہ چھوڑ رہا ہوں تو میرے دل میں ہندوستان کی کامیابیوں اور روشن مستقبل کے لیے فخر اور غیر متزلزل یقین موجود ہے۔

سابق نائب صدر جگدیپ دھنکھڑ نے جولائی میں ہی اپنے عہدے سے استعفیٰ دے دیا تھا، تاہم نائب صدر کے عہدے سے استعفیٰ دیے جانے کے پانچ ماہ بعد بھی انہیں ابھی تک سرکاری رہائش فراہم نہیں کی گئی ہے۔