جموں/ آواز دی وائس

مرکزی وزیر ڈاکٹر جتیندر سنگھ نے اپنے حلقۂ انتخاب کی اعلیٰ کارکردگی دکھانے والی طالبات میں مفت لیپ ٹاپ تقسیم کیے۔ انہوں نے کہا کہ مودی حکومت نے خواتین کے لیے متعدد خصوصی اسکیمیں شروع کی ہیں، اور دیوالی کے موقع پر یہ لیپ ٹاپ باصلاحیت طالبات کے لیے بہترین تحفہ ثابت ہوں گے۔

اپنے خطاب میں ڈاکٹر جتیندر سنگھ نے کہا کہ گزشتہ 11 برسوں میں وزیر اعظم مودی نے لڑکیوں کی تعلیم کی بھرپور حوصلہ افزائی کی ہے اور ان کے لیے متعدد خصوصی اسکیمیں متعارف کرائی ہیں۔ سول سروسز امتحان میں لڑکیوں نے ہمیشہ نمایاں کارکردگی دکھائی ہے۔ 2014 میں 15 سے 16 طالبات ٹاپر رہیں، جبکہ گزشتہ سال آئی اے ایس امتحانات میں پہلی تین میں سے دو ٹاپر لڑکیاں تھیں۔ جموں و کشمیر کے کشتواڑ اور راجوری جیسے علاقوں سے بھی لڑکیاں آئی اے ایس بن رہی ہیں۔ وزیر اعظم مودی کے اقتدار میں آنے کے بعد مواقع کی جمہوریت اور تیاری کے لیے معلومات کی جمہوریت قائم ہوئی ہے۔ اب جو طلبہ محنتی ہیں، انہیں کوچنگ کی ضرورت نہیں، کیونکہ ہر چیز لیپ ٹاپ اور موبائل پر دستیاب ہے۔

انہوں نے مزید کہا کہ قومی تعلیمی پالیسی  نے تعلیم کو مزید آسان اور جدید بنایا ہے۔

ڈاکٹر سنگھ نے کہا کہ وزیر اعظم مودی کی دیگر اسکیموں میں، 2014 میں ملک میں تقریباً 400 اسٹارٹ اپس تھے، جو اب بڑھ کر 1 لاکھ 75 ہزار ہو چکے ہیں، جن میں سے 50 سے 60 ہزار خواتین کی قیادت میں چل رہے ہیں۔ خواتین اب خلائی منصوبوں جیسے آدتیہ اور چندریان-3 میں بھی قیادت کر رہی ہیں۔ مدرا اسکیم میں کسی گارنٹی یا رہن کی ضرورت نہیں۔ اس اسکیم کے تحت 54.5 کروڑ روپے کے قرضے دیے گئے ہیں، جن میں سے 68 فیصد قرض خواتین کو فراہم کیے گئے ہیں۔

آج کے نوجوانوں میں، خاص طور پر خواتین میں، ترقی کی خواہش بڑھ رہی ہے۔ دیوالی کے موقع پر باصلاحیت طالبات کے لیے اس سے بہتر تحفہ کیا ہو سکتا ہے؟ ہم نے آج یہ تحفہ ان ٹاپر طالبات کو دیا ہے۔ اللہ کرے وہ اپنے خواب پورے کریں اور ہم ان کی کامیابی کا ایک چھوٹا سا ذریعہ بن سکیں۔ انہوں نے آخر میں کہا کہ یہی حکومت ہے جس نے زچگی کی رخصت کو چھ ماہ تک بڑھایا اور خواتین کے لیے مڈ-کیریئر اسکیمیں متعارف کرائیں۔