نئی دہلی
وزیر اعظم نریندر مودی نے پیر کے روز تعلیمی نظام کو معیشت کی حقیقی ضروریات سے جوڑنے کے عمل کو تیز کرنے پر زور دیتے ہوئے کہا کہ مصنوعی ذہانت (اے آئی)، آٹومیشن، ڈیجیٹل معیشت اور ڈیزائن پر مبنی مینوفیکچرنگ جیسے شعبوں پر زیادہ توجہ دینے کی ضرورت ہے۔
وزیر اعظم مودی نے مالی سال 2026-27 کے بجٹ پر منعقدہ ایک ویبینار سے خطاب کرتے ہوئے کہا کہ لوگوں کی امنگوں کو پورا کرنا ان کی حکومت کا بنیادی مقصد ہے اور تعلیم، ہنر مندی کی ترقی، صحت، سیاحت، کھیل اور ثقافت جیسے شعبے اس مقصد کو حقیقت میں بدلنے کے اہم ذرائع ہیں۔انہوں نے کہا كہ لوگوں کی امنگوں کو پورا کرنا صرف ایک موضوع نہیں بلکہ یہ اس حکومت کا بنیادی مقصد اور عزم ہے۔
وزیر اعظم نے کہا کہ ہندوستان اختراع پر مبنی معیشت کی سمت میں آگے بڑھ رہا ہے اور ایسے میں تعلیمی نظام کو معیشت کی حقیقی ضروریات کے ساتھ زیادہ تیزی سے جوڑنے کی ضرورت ہے۔
انہوں نے کہا كہ اے آئی، آٹومیشن، ڈیجیٹل معیشت اور ڈیزائن پر مبنی مینوفیکچرنگ جیسے شعبوں پر ہمیں اپنی توجہ مزید بڑھانی ہوگی۔مودی نے سائنس، ٹیکنالوجی، انجینئرنگ اور ریاضی (ایس ٹی ای ایم) کے شعبوں کی اہمیت پر زور دیتے ہوئے کہا کہ ان شعبوں میں ملک کی بیٹیوں کی بڑھتی ہوئی دلچسپی حوصلہ افزا ہے۔ انہوں نے کہا کہ جب ہم مستقبل کی ٹیکنالوجیز کی بات کرتے ہیں تو یہ بہت ضروری ہے کہ مواقع کی کمی کی وجہ سے کوئی بھی بیٹی پیچھے نہ رہ جائے۔
اس کے ساتھ ہی وزیر اعظم نے کہا کہ نوجوانوں کو نئی تصورات پر کام کرنے کے مناسب مواقع دینے کے لیے تحقیق کا ایک مضبوط نظام تیار کرنا ہوگا۔انہوں نے صحت کے شعبے کا ذکر کرتے ہوئے کہا کہ حالیہ برسوں میں ملک کے صحت کے ڈھانچے کو مضبوط کیا گیا ہے اور آیوشمان بھارت اسکیم اور آروگیہ مراکز کے ذریعے دیہی علاقوں میں صحت کی خدمات کی رسائی میں اضافہ ہوا ہے۔
مودی نے “نگہداشت خدمات سے جڑی معیشت” کا ذکر کرتے ہوئے کہا کہ بزرگ شہریوں کی تعداد بڑھنے کے ساتھ تربیت یافتہ نگہداشت کارکنوں کی مانگ بھی بڑھے گی اور اس کے لیے نئے تربیتی ماڈلز تیار کرنے کی ضرورت ہے۔وزیر اعظم نے کہا کہ ملک آج “احتیاطی اور جامع صحت” کے تصور کے ساتھ آگے بڑھ رہا ہے۔ انہوں نے کہا کہ گزشتہ چند برسوں میں صحت کے ڈھانچے کو مضبوط کیا گیا ہے اور سینکڑوں اضلاع میں نئے میڈیکل کالج قائم کیے گئے ہیں۔
انہوں نے کہا كہ آیوشمان بھارت اسکیم اور ‘آروگیہ مندر’ کے ذریعے صحت کی خدمات کی رسائی ہر گاؤں تک پہنچ گئی ہے۔ ہماری یوگا اور آیوروید کی روایات بھی پوری دنیا میں مقبول ہو رہی ہیں۔وزیر اعظم نے ملک کی “نوجوان طاقت” کا ذکر کرتے ہوئے کہا کہ یہ اسی وقت “قومی طاقت” بنتی ہے جب وہ صحت مند، باانضباط اور خوداعتماد ہو۔
انہوں نے کہا كہ اسی وجہ سے حالیہ برسوں میں کھیلوں کو قومی ترقی کی ایک اہم دھارا کے طور پر دیکھا جا رہا ہے۔انہوں نے کہا کہ “کھیلو انڈیا” جیسی پہلوں سے ملک کے کھیلوں کے نظام میں نئی توانائی آئی ہے اور پورے ملک میں کھیلوں کے بنیادی ڈھانچے کو مضبوط کیا جا رہا ہے۔
وزیر اعظم مودی گزشتہ چند دنوں سے بجٹ 2026-27 میں پیش کیے گئے مختلف نکات پر ویبینار مباحثوں میں حصہ لے رہے ہیں۔ اسی سلسلے میں یہ ویبینار بھی منعقد کیا گیا۔اس ویبینار میں حکومت کی مختلف وزارتوں، محکموں اور نجی شعبے کے نمائندوں نے حصہ لیا۔
.gif)
