تل ابیب:

اسرائیلی فضائیہ  اسرائیل ائیر فورس  نے اعلان کیا ہے کہ تہران میں "وسیع پیمانے پر فضائی حملہ" مکمل کر لیا گیا ہے، جس میں "ایرانی نظام کے کمانڈ سینٹرز کو نشانہ بنایا گیا"۔سوشل میڈیا پلیٹ فارم X پر جاری بیان میں اسرائیلی فضائیہ نے بتایا کہ منگل کو ہونے والا یہ مشن ملٹری انٹیلی جنس کی رہنمائی میں انجام دیا گیا۔ اس کارروائی میں خاص طور پر "کمانڈ سینٹرز، بیلسٹک میزائل نظام کے مراکز اور دیگر اہم تنصیبات" کو نشانہ بنایا گیا۔

فوج کی جانب سے جاری کردہ تصاویر میں تہران کے ایک بڑے کمپلیکس کی فضائی نگرانی کی تصویر بھی شامل ہے، جس میں صنعتی نوعیت کے گودام اور انتظامی عمارتیں نظر آتی ہیں، جبکہ ایک مخصوص حصے کو حملے کے ہدف کے طور پر نمایاں کیا گیا ہے۔

بیان کے مطابق جن مقامات کو نشانہ بنایا گیا ان میں "انقلابی گارڈز کی سیکیورٹی یونٹ کا ہیڈکوارٹر" بھی شامل ہے، جو ایران میں احتجاج اور عوامی نظم و ضبط کے معاملات کو سنبھالنے کا ذمہ دار ہے۔

اسرائیلی فضائیہ نے مزید بتایا کہ حملوں میں "اندرونی سیکیورٹی فورسز کے لاجسٹکس اور جنرل سپورٹ ڈویژن کے مینٹیننس سینٹر" اور "بیلسٹک میزائل نظام کے ایک ہیڈکوارٹر" کو بھی تباہ کیا گیا۔فوج کے مطابق صرف عمارتوں کو ہی نہیں بلکہ "متعدد فضائی دفاعی نظاموں" کو بھی نشانہ بنایا گیا تاکہ ایرانی فضائی حدود میں اپنی برتری کو مزید مضبوط کیا جا سکے۔

اس کارروائی کو تہران کی عسکری صلاحیتوں پر دباؤ بڑھانے کی ایک حکمتِ عملی قرار دیا گیا ہے۔ اسرائیلی فضائیہ نے کہا کہ یہ حملے "ایرانی نظام کے بنیادی ڈھانچے کو کمزور کرنے کے مرحلے" کا حصہ ہیں۔

یہ حملے اس وقت کیے گئے جب اسلامی انقلابی گارڈ کور  (آئی آر جی سی) نے تل ابیب میں 100 سے زائد اہداف کو نشانہ بنانے کا دعویٰ کیا۔ سرکاری نشریاتی ادارے پریس ٹی وی کے مطابق یہ حملہ سابق اعلیٰ سیکیورٹی عہدیدار علی لاریجانی  کی ہلاکت کے ردِعمل میں کیا گیا۔آئی آر جی سی کے مطابق یہ حملے امریکہ اور اسرائیل کی جانب سے "بلا اشتعال جارحیت" کے جواب میں کیے گئے۔ بدھ کے روز جاری بیان میں کہا گیا کہ یہ اہداف ان کی جاری جوابی کارروائی "آپریشن ٹرو پرومس 4" کی "61ویں لہر" کے دوران نشانہ بنائے گئے۔

رپورٹ کے مطابق اس کارروائی میں خرّم شہر-4 اور قدر میزائل، کے ساتھ عماد اور خیبر شکن میزائلوں کا استعمال کیا گیا، جنہیں لاریجانی کی موت کا بدلہ لینے کے لیے داغا گیا۔آئی آر جی سی نے دعویٰ کیا کہ ان "تیز رفتار حملوں" کے دوران 100 سے زائد فوجی اور سیکیورٹی اہداف کو نشانہ بنایا گیا اور انہیں کسی مزاحمت کا سامنا نہیں کرنا پڑا۔انہوں نے اس کامیابی کو اسرائیلی فضائی دفاعی نظام کی "کمزوری" قرار دیا۔ پریس ٹی وی کے مطابق ان حملوں کے نتیجے میں تل ابیب میں جزوی بجلی کی بندش (بلیک آؤٹ) بھی ہوئی، جس سے زمینی سطح پر امدادی کارروائیوں میں مشکلات پیش آئیں۔

آئی آر جی سی نے مزید دعویٰ کیا کہ اس جوابی مہم میں 230 سے زائد افراد ہلاک یا زخمی ہوئے ہیں۔ یہ کارروائی واشنگٹن اور تل ابیب کی جانب سے حالیہ فوجی اقدامات کے بعد شروع کی گئی۔

تل ابیب کے علاوہ ان حملوں میں القدس، حیفا کی بندرگاہ، بیر شیوا اور صحرائے نقب کے اہم مقامات کو بھی نشانہ بنایا گیا۔پریس ٹی وی کے مطابق خطے میں موجود امریکی فوجی اڈے بھی ان حملوں کی زد میں آئے، جن میں قطر، بحرین، متحدہ عرب امارات، کویت اور سعودی عرب میں واقع تنصیبات شامل ہیں۔