واشنگٹن

امریکی صدر ڈونلڈ ٹرمپ نے جمعہ (مقامی وقت) کو کہا کہ امریکی فوج نے نائجیریا کی مسلح افواج کے تعاون سے ایک ’’پیچیدہ اور انتہائی درست‘‘ فوجی کارروائی میں عالمی دہشت گرد تنظیم داعش (آئی ایس آئی ایس) کے دوسرے بڑے کمانڈر کو ہلاک کر دیا ہے۔ ٹرمپ نے ’ٹروتھ سوشل‘ پر ایک پوسٹ میں کہا کہ ابو بلال المنوکی، جسے ’’عالمی سطح پر داعش کا دوسرے نمبر کا کمانڈر‘‘ بتایا گیا، مشترکہ کارروائی کے دوران مارا گیا۔ انہوں نے کہا کہ یہ کارروائی افریقہ میں کی گئی، جہاں وہ مبینہ طور پر چھپا ہوا تھا۔

انہوں نے پوسٹ میں لکھا کہ آج رات میری ہدایت پر بہادر امریکی افواج اور نائجیریا کی مسلح افواج نے انتہائی باریک بینی سے تیار کی گئی اور نہایت پیچیدہ مہم کو کامیابی سے انجام دیتے ہوئے دنیا کے سب سے سرگرم دہشت گرد کو میدانِ جنگ سے ختم کر دیا۔ داعش کا عالمی سطح پر دوسرا بڑا کمانڈر ابو بلال المنوکی سمجھتا تھا کہ وہ افریقہ میں چھپ سکتا ہے، لیکن اسے یہ معلوم نہیں تھا کہ ہمارے ذرائع ہمیں اس کی ہر سرگرمی کی اطلاع دے رہے تھے۔

ٹرمپ نے اس کارروائی میں تعاون پر نائجیریا کی حکومت کا شکریہ بھی ادا کیا۔ انہوں نے مزید کہا کہ اب وہ افریقہ کے لوگوں کو دہشت زدہ نہیں کر سکے گا اور نہ ہی امریکیوں کو نشانہ بنانے کی کارروائیوں کی منصوبہ بندی میں مدد دے سکے گا۔ اس کے خاتمے کے بعد داعش کی عالمی کارروائیاں شدید متاثر ہوئی ہیں۔ اس آپریشن میں شراکت داری پر نائجیریا کی حکومت کا شکریہ۔ خدا امریکہ پر رحم کرے!۔

جون 2023 میں اُس وقت کے صدر جو بائیڈن کے دور میں امریکی محکمہ خارجہ نے ابو بلال المنوکی کو ’’خصوصی طور پر نامزد عالمی دہشت گرد‘‘ قرار دیا تھا۔اس کی شناخت داعش کے ایک رہنما کے طور پر کی گئی تھی، جس کے کئی فرضی نام تھے، جن میں ابوبکر مائنوک اور ابور مائنوک شامل ہیں۔

امریکی محکمہ خارجہ کے مطابق، اس نامزدگی کے تحت داعش سے وابستہ افراد پر دہشت گرد سرگرمیوں اور تنظیم کی عالمی کارروائیوں میں کردار کے باعث پابندیاں عائد کی گئی تھیں۔

گزشتہ ماہ داعش نے نائجیریا کی ریاست اداماوا میں ایک حملے کی ذمہ داری قبول کی تھی، جس میں کم از کم 29 افراد ہلاک ہوئے تھے۔ یہ دعویٰ تنظیم کی جانب سے ٹیلیگرام پر جاری بیان میں کیا گیا تھا۔

یہ حملہ گویاکو کمیونٹی میں ہوا تھا، جہاں مسلح حملہ آوروں نے مقامی رہائشیوں کو نشانہ بنایا، جس کے نتیجے میں متعدد افراد مارے گئے۔ گزشتہ سال دسمبر میں امریکہ نے شمال مغربی نائجیریا میں بھی داعش کے خلاف ایک ’’مہلک‘‘ حملہ کیا تھا، جس کے بارے میں کہا گیا کہ اس کارروائی کا مقصد اُن دہشت گردوں کو نشانہ بنانا تھا جو مبینہ طور پر عیسائیوں کے قتل میں ملوث تھے۔

ٹرمپ نے اُس وقت ’ٹروتھ سوشل‘ پر لکھا تھا کہ آج رات بطور کمانڈر اِن چیف میری ہدایت پر امریکہ نے شمال مغربی نائجیریا میں داعش کے دہشت گردوں کے خلاف ایک طاقتور اور مہلک حملہ کیا، جو بنیادی طور پر بے گناہ عیسائیوں کو نشانہ بنا کر بے رحمی سے قتل کر رہے تھے، ایسی سطح پر جو کئی برسوں بلکہ صدیوں میں نہیں دیکھی گئی۔ میں پہلے ہی ان دہشت گردوں کو خبردار کر چکا تھا کہ اگر انہوں نے عیسائیوں کا قتل بند نہ کیا تو انہیں سنگین نتائج بھگتنا ہوں گے، اور آج رات وہ وقت آ گیا۔

جون 2025 میں نائجیریا کے ایک بشپ کے آبائی گاؤں پر شدت پسندوں کے حملے میں بیس سے زائد افراد ہلاک ہو گئے تھے۔ یہ حملہ اُس وقت ہوا تھا جب چند روز قبل ہی بشپ نے امریکہ کی کانگریس کے سامنے ملک میں عیسائیوں پر ہونے والے مظالم کے بارے میں گواہی دی تھی۔