تہران

ایران کے صدر مسعود پزشکیان نے مسلم ممالک کے درمیان مزید مضبوط اتحاد پر زور دیتے ہوئے کہا ہے کہ مغربی ایشیا میں جاری کشیدگی اور علاقائی چیلنجوں سے مؤثر طور پر نمٹنے کے لیے اجتماعی یکجہتی ناگزیر ہے۔عید الاضحیٰ سے قبل کئی مسلم ممالک کے رہنماؤں سے ٹیلی فونک گفتگو کے دوران مسعود پزشکیان نے اسلامی اتحاد کو فروغ دینے اور مختلف شعبوں میں باہمی تعاون کو وسعت دینے کی ضرورت پر زور دیا۔

انہوں نے سوشل میڈیا پلیٹ فارم ایکس پر ایک پوسٹ میں کہا کہ میں نے عراق، عمان، قطر، ترکیہ، تاجکستان، مصر، کرغزستان اور آذربائیجان کے رہنماؤں سے گفتگو کے دوران انہیں عید الاضحیٰ کی مبارک باد دی اور اس امید کا اظہار کیا کہ اللہ تعالیٰ ہم مسلمانوں کے دلوں کو ایک دوسرے کے قریب کرے، مختلف شعبوں میں تعاون کو فروغ دے اور خطرات کے مقابلے میں ایک دوسرے کی مکمل حمایت کی توفیق عطا فرمائے۔

ایرانی سرکاری نشریاتی ادارے پریس ٹی وی کے مطابق، کرغزستان کے صدر صدر جپاروف سے گفتگو کے دوران مسعود پزشکیان نے عید الاضحیٰ کو ایمان، قربانی اور مسلم اقوام کے اتحاد کی ایک طاقتور علامت قرار دیا۔انہوں نے کہا کہ یہ موقع اسلامی دنیا کے ممالک کو باہمی اعتماد مضبوط بنانے اور علاقائی تعلقات کو مزید گہرا کرنے کی یاد دہانی کراتا ہے۔ انہوں نے اقوام متحدہ کی سلامتی کونسل میں ایران مخالف ایک حالیہ قرارداد کے خلاف کرغزستان کے مؤقف کو بھی سراہا اور اسے بین الاقوامی امور میں "باہمی احترام اور ذمہ دارانہ طرزِ عمل" کی مثال قرار دیا۔

مصر کے صدر عبد الفتاح السیسی کے ساتھ الگ ٹیلی فونک گفتگو میں ایرانی صدر نے کہا کہ خطہ بالآخر موجودہ کشیدگی کے مرحلے سے نکل آئے گا، جو ان کے بقول امریکہ اور اسرائیل کی کارروائیوں کے بعد مزید بڑھ گئی تھی۔

انہوں نے اس یقین کا اظہار کیا کہ مستقبل قریب میں علاقائی تعلقات کا ایک "نیا باب" شروع ہوگا، جس کی بنیاد اسلامی دنیا کے اتحاد اور بیرونی مداخلت کے اجتماعی مسترد کیے جانے پر ہوگی۔مسعود پزشکیان نے تنازعات کے حل کے لیے سفارت کاری اور مکالمے کے عزم کا بھی اعادہ کیا اور انہیں اختلافات ختم کرنے کا بہترین راستہ قرار دیا۔ملائیشیا کے وزیر اعظم انور ابراہیم سے گفتگو کے دوران ایرانی صدر نے کہا کہ مسلم ممالک کا اتحاد مشترکہ علاقائی بحرانوں سے نمٹنے اور بیرونی دباؤ کا مقابلہ کرنے میں اہم کردار ادا کر سکتا ہے۔

انہوں نے تہران اور کوالالمپور کے درمیان اقتصادی، ثقافتی اور سماجی شعبوں میں تعلقات کو مزید مضبوط بنانے کی بھی اپیل کی۔ جواب میں انور ابراہیم نے مسلم ممالک کے درمیان زیادہ اتحاد اور تعاون کی امید ظاہر کی۔

عراق کے صدر نزار امیدی اور وزیر اعظم علی فالح الزیدی سے علیحدہ گفتگو میں مسعود پزشکیان نے عید الاضحیٰ کی تعلیمات کو قربانی، اخوت اور یکجہتی کی علامت قرار دیتے ہوئے علاقائی تعاون کو فروغ دینے اور ان کے بقول "دشمنوں کی تفرقہ انگیز سازشوں" کا مقابلہ کرنے کی ضرورت پر زور دیا۔دنیا بھر میں کروڑوں مسلمان ذوالحجہ کی 10 تاریخ کو عید الاضحیٰ مناتے ہیں تاکہ حضرت ابراہیم علیہ السلام کی اللہ تعالیٰ کے لیے بے مثال اطاعت اور قربانی کے جذبے کو یاد کیا جا سکے، جس کا اظہار انہوں نے اپنے صاحبزادے حضرت اسماعیل علیہ السلام کو اللہ کی راہ میں قربان کرنے کی آمادگی سے کیا تھا۔

اسلامی عقیدے کے مطابق اللہ تعالیٰ نے ان کے ایمان اور فرمانبرداری کو قبول کرتے ہوئے حضرت اسماعیل علیہ السلام کی جگہ ایک دنبہ قربانی کے لیے عطا فرمایا۔