تہران
ایرانی فوج نے جمعرات کو ڈونلڈ ٹرمپ کے قوم سے خطاب کے دوران دیے گئے بیانات پر سخت ردعمل دیتے ہوئے خبردار کیا کہ جاری تنازع اس وقت تک جاری رہے گا جب تک واشنگٹن کو "مستقل ذلت، ندامت اور ہتھیار ڈالنے" کا سامنا نہیں کرنا پڑتا۔ یہ بات ایرانی سرکاری میڈیا پریس ٹی وی نے رپورٹ کی ہے۔
خاتم الانبیاء مرکزی ہیڈکوارٹر کے ترجمان کی جانب سے جاری بیان میں کہا گیا کہ ایران نے امریکی دعوؤں کو مسترد کر دیا ہے جن میں کہا گیا تھا کہ ایران کے فوجی ڈھانچے اور صلاحیتوں کو نقصان پہنچایا گیا ہے۔ ترجمان نے کہا کہ ایران کی عسکری طاقت کے بارے میں امریکی انٹیلیجنس "نامکمل" ہے۔
ترجمان نے مزید کہا کہ واشنگٹن کو اسلامی جمہوریہ ایران کی "وسیع اسٹریٹجک صلاحیتوں" کا علم نہیں ہے، اور انہوں نے ٹرمپ کے ان دعوؤں کو مسترد کر دیا کہ ایران کی میزائل اور ڈرون حملے کرنے کی صلاحیت کو نمایاں طور پر کم کر دیا گیا ہے۔
انہوں نے کہا، "ہماری فوجی طاقت اور ساز و سامان کے بارے میں آپ کی معلومات نامکمل ہیں۔ آپ ہماری وسیع اسٹریٹجک صلاحیتوں سے ناواقف ہیں۔ یہ نہ سمجھیں کہ آپ نے ہمارے اسٹریٹجک میزائل مراکز، طویل فاصلے تک حملہ کرنے والے اور درست نشانہ لگانے والے ڈرونز، جدید فضائی دفاعی نظام، الیکٹرانک وارفیئر یا خصوصی آلات کو تباہ کر دیا ہے۔ ایسی غلط فہمیاں آپ کو مزید دلدل میں دھکیلیں گی۔ جن مقامات کو آپ نے نشانہ بنانے کا دعویٰ کیا ہے وہ غیر اہم ہیں؛ ہماری اصل فوجی پیداوار ایسے مقامات پر ہوتی ہے جہاں آپ کبھی نہیں پہنچ سکتے۔ ہمارے میزائلوں، ڈرونز اور اسٹریٹجک نظام کا اندازہ لگانے کی کوشش نہ کریں، آپ غلط ثابت ہوں گے اور کچھ حاصل نہیں کریں گے۔
خاتم الانبیاء مرکزی ہیڈکوارٹر ایران کا اعلیٰ ترین آپریشنل کمانڈ یونٹ ہے جو ایرانی فوج اور اسلامی انقلابی گارڈ کور کے درمیان کارروائیوں کو مربوط کرتا ہے۔ترجمان نے امریکہ پر جارحیت شروع کرنے کا الزام بھی عائد کیا اور کہا کہ ایران جوابی کارروائیاں جاری رکھے گا۔
انہوں نے کہا کہ آپ کو اس جارحیت کی قیمت چکانا ہوگی جو آپ نے ہماری معزز اور عزیز مسلم قوم کے خلاف شروع کی۔ یہ جنگ اس وقت تک جاری رہے گی جب تک آپ کو مستقل ذلت، ندامت اور ہتھیار ڈالنے کا سامنا نہیں کرنا پڑتا۔ آئندہ بھی ہماری جانب سے مزید تباہ کن حملوں کی توقع رکھیں۔
یہ بیان اس وقت سامنے آیا جب ڈونلڈ ٹرمپ نے اپنے خطاب میں امریکی فوج کی تعریف کرتے ہوئے کہا کہ ایران کے خلاف کارروائی میں "فیصلہ کن" کامیابی حاصل ہوئی ہے اور مہم کا بنیادی مقصد تقریباً مکمل ہونے کے قریب ہے۔انہوں نے دعویٰ کیا کہ اس دوران ایران کی بحری اور فضائی صلاحیتوں کو منظم طریقے سے تباہ کر دیا گیا ہے اور اس کے وسیع فوجی ڈھانچے کو شدید نقصان پہنچا ہے۔
ٹرمپ نے کہا، "ایران کی بحریہ ختم ہو چکی ہے، اس کی فضائیہ تباہ ہو گئی ہے، اور اس کے بیشتر رہنما، جنہیں وہ دہشت گرد قرار دیتے ہیں، مارے جا چکے ہیں۔انہوں نے مزید کہا کہ مخالف فریق کی میزائل اور ڈرون حملے کرنے کی صلاحیت کو "نمایاں طور پر محدود" کر دیا گیا ہے۔
انہوں نے یہ بھی دعویٰ کیا کہ "ہتھیار بنانے والی فیکٹریاں اور راکٹ لانچر تباہ کیے جا رہے ہیں، اور اب بہت کم باقی رہ گئے ہیں"، اور کہا کہ امریکہ "پہلے سے کہیں زیادہ بڑی کامیابی حاصل کر رہا ہے"۔
