بوسٹن

ڈونلڈ ہیفلن، جو کیپ وردے میں سابق امریکی سفیر رہ چکے ہیں، نے کہا ہے کہ آبنائے ہرمز پر ایران کا کنٹرول موجودہ کشیدگی میں ایک اہم اسٹریٹجک دباؤ کا ذریعہ بن کر سامنے آیا ہے، جو عالمی توانائی کی فراہمی کو متاثر کر رہا ہے اور سفارتی مذاکرات کی سمت طے کر رہا ہے۔

پیر کے روز ہیفلن نے کہا کہ ایران کئی برسوں سے ہتھیاروں کے درجے کا مواد تیار کرنے کی کوشش کر رہا ہے، اور بیرونی دنیا اسے روکنے کی کوشش کرتی رہی ہے۔ لیکن گزشتہ ایک دو ماہ میں ایران نے یہ جان لیا ہے کہ اسے دفاعی طاقت کے طور پر ایٹمی ہتھیاروں کی ضرورت نہیں۔ آبنائے ہرمز پر اس کا کنٹرول ہی اس کا سب سے بڑا ہتھیار ہے۔

انہوں نے کہا کہ یہ ناکہ بندی اس وجہ سے ہے کہ امریکہ کا خیال ہے کہ معاشی پابندیوں کے دباؤ میں ایران تیل برآمد کرنے اور کچھ اہم اشیاء درآمد کرنے پر بہت زیادہ انحصار کرتا ہے۔ اگر ہم اسے ان چیزوں سے محروم رکھیں تو وہ مذاکرات کی میز پر آ جائے گا۔ دونوں فریق اس آبی گزرگاہ کو ایک دوسرے کے خلاف بطور فائدہ استعمال کر رہے ہیں۔ یہ عمل دو قدم آگے اور ایک قدم پیچھے جیسا ہوگا۔

ہیفلن نے مزید کہا کہ اسلام آباد میں ہونے والے آئندہ مذاکرات کے حوالے سے سفارتی اشارے ظاہر کرتے ہیں کہ کشیدگی کے باوجود تہران دوبارہ مذاکرات کی میز پر آ سکتا ہے۔انہوں نے کہا کہ میرا خیال ہے کہ وہ واپس آئیں گے، اگرچہ میں غلط بھی ہو سکتا ہوں۔ میرا نہیں خیال کہ پاکستانی حکام امریکی وفد کو، جس کی قیادت نائب صدر کر رہے ہیں، اتنی دور آنے کی ترغیب دیتے اگر انہیں یقین نہ ہوتا کہ ایرانی بھی آئیں گے۔ ایران کے لیے بہتر ہوگا کہ وہ امریکہ کے نائب صدر کو پاکستان میں تنہا نہ چھوڑے بلکہ مذاکرات میں شرکت کرے، چاہے اس کے فوری نتائج نہ بھی نکلیں۔ اگر وہ اسلام آباد نہیں آتے تو یہ ایک مسئلہ بن جائے گا۔

یہ بیانات اس وقت سامنے آئے ہیں جب اس ماہ کے آغاز میں ہونے والی 21 گھنٹے طویل بات چیت بغیر کسی معاہدے کے ختم ہو گئی تھی، اور اب مذاکرات ایک نازک مرحلے میں داخل ہو چکے ہیں جہاں ناکامی کی صورت میں کشیدگی میں اضافے کا خدشہ ظاہر کیا جا رہا ہے۔اعلیٰ سطحی امریکی مذاکراتی ٹیم، جس میں نائب صدر جے ڈی وینس، جیرڈ کشنر، اور خصوصی ایلچی اسٹیو وٹکوف شامل ہیں، ایرانی قیادت کے ساتھ اہم مذاکرات شروع کرنے کے لیے پاکستان روانہ ہو چکی ہے۔

چونکہ جنگ بندی بدھ کے روز ختم ہونے والی ہے، اس لیے اسلام آباد میں ہونے والے مذاکرات ممکنہ طور پر مکمل جنگی صورتحال میں داخل ہونے سے پہلے آخری سفارتی موقع سمجھے جا رہے ہیں۔ اگرچہ امریکہ کا کہنا ہے کہ ایک “منصفانہ اور معقول” معاہدہ پیش کیا گیا ہے، لیکن ایرانی قیادت کی جانب سے “ناکابندی کے سائے میں” مذاکرات سے انکار اس بات کی نشاندہی کرتا ہے کہ گزشتہ دور کی 21 گھنٹے طویل بات چیت شاید ایک بڑے اور زیادہ خطرناک تصادم کا پیش خیمہ تھی۔