تہران

ذرائع کے مطابق ایرانی صدر مسعود پزشکیان نے وزیرِ اعظم نریندر مودی کو ایران کے سابق سپریم لیڈر علی خامنہ ای کی سرکاری نمازِ جنازہ اور تدفینی تقریبات میں شرکت کی باضابطہ دعوت دی ہے۔

یہ سرکاری دعوت 86 سالہ رہنما کے انتقال کے بعد ایک اہم سفارتی پیش رفت سمجھی جا رہی ہے۔ اطلاعات کے مطابق علی خامنہ ای 28 فروری کو امریکہ اور اسرائیل کے مشترکہ فضائی حملے میں ہلاک ہوئے تھے۔ اسلامی جمہوریہ ایران کی 36 برس تک قیادت کرنے والے خامنہ ای تہران کے خلاف شروع ہونے والی فوجی کارروائیوں کے پہلے ہی روز مارے گئے تھے۔

ایرانی سرکاری میڈیا کے مطابق کئی روز پر محیط تدفینی تقریبات کا آغاز 4 جولائی سے ہوگا۔ ان رسومات میں 7 جولائی کو تہران کے جنوب میں واقع مقدس شہر قم میں خصوصی تقریبات شامل ہوں گی، جبکہ 9 جولائی کو شمال مشرقی ایران کے مقدس شہر مشہد میں، جو ان کا آبائی شہر بھی ہے، تدفین کے ساتھ یہ سلسلہ اختتام پذیر ہوگا۔

اسلامی فقہ کے مطابق میت کو جلد از جلد، ترجیحاً 24 گھنٹوں کے اندر دفن کیا جانا چاہیے، تاہم جنگی حالات میں اس اصول سے استثنا کی گنجائش موجود ہوتی ہے۔فروری سے ہی آخری رسومات کے وقت کے بارے میں مختلف قیاس آرائیاں جاری تھیں۔ ابتدائی اطلاعات میں جون کے آخر کی تاریخوں کا ذکر کیا گیا تھا، تاہم بعد میں سرکاری میڈیا نے جولائی کے شیڈول کی باضابطہ تصدیق کر دی۔

توقع کی جا رہی ہے کہ تہران، مشہد اور قم میں ہونے والی ان تقریبات میں تقریباً دو کروڑ سوگوار شرکت کریں گے۔ اس موقع پر دنیا بھر سے متعدد اہم شخصیات بھی شریک ہوں گی، جن میں پاکستان کے وزیرِ اعظم شہباز شریف بھی شامل ہیں۔

اگر متوقع تعداد میں لوگ شریک ہوئے تو یہ 1989 میں اسلامی جمہوریہ ایران کے بانی آیت اللہ روح اللہ خمینی کے جنازے میں شریک ایک کروڑ افراد کے ریکارڈ کو بھی توڑ دے گا۔اس تقریب کے بعد مرحوم رہنما کے 56 سالہ صاحبزادے مجتبیٰ حسینی خامنہ ای نے 8 مارچ کو ایران کے سپریم لیڈر کا منصب سنبھال لیا تھا۔ تاہم ان کی موجودہ صحت اور مقامِ قیام کے حوالے سے قیاس آرائیاں بدستور جاری ہیں۔ امریکہ کی بعض نمایاں شخصیات، جن میں مارکو روبیو اور پیٹ ہیگستھ شامل ہیں، کا کہنا ہے کہ وہ اس وقت کومے میں ہیں۔یہ دعوت ایسے وقت میں سامنے آئی ہے جب خطے میں جغرافیائی و سیاسی کشیدگی میں کمی دیکھی جا رہی ہے۔ کئی ماہ تک جاری رہنے والے شدید تنازع نے عالمی توانائی کی سپلائی کو متاثر کیا تھا اور ایندھن کے بڑے بحران کو جنم دیا تھا، تاہم اب ایران اور امریکہ ایک امن فریم ورک پر متفق ہو چکے ہیں۔

صدر مسعود پزشکیان اور امریکی صدر ڈونلڈ ٹرمپ الگ الگ ڈیجیٹل مفاہمتی یادداشتوں  پر دستخط کر چکے ہیں، جبکہ سوئٹزرلینڈ میں طویل مدتی اور منظم امن مذاکرات کا سلسلہ جاری ہے۔