تہران 

ایک ذریعے نے بدھ کے روز دی جیروشلم پوسٹ کو بتایا کہ ایران نے مبینہ طور پر آبنائے ہرمز میں تجارتی جہازوں کو نشانہ بناتے ہوئے متعدد ڈرون داغے ہیں۔رپورٹ کے مطابق یہ کارروائی اتوار کے روز امریکہ اور ایران کے درمیان مفاہمتی یادداشت  پر دستخط کے بعد کی گئی۔ امریکی فوج نے ان ڈرونز کو اس وقت تباہ کر دیا جب وہ تجارتی یا امریکی فوجی جہازوں اور اہلکاروں کے لیے خطرہ بننے کے قریب تھے۔

دی جیروشلم پوسٹ کے مطابق، ایک امریکی عہدیدار نے این بی سی کو بتایا کہ یہ ڈرون اسلامی انقلابی گارڈ کور  کی جانب سے داغے گئے تھے۔ عہدیدار نے مزید کہا کہ امریکی فوج آبنائے ہرمز سے گزرنے والے جہازوں کی حفاظت کے لیے شپنگ کمپنیوں کے ساتھ رابطے میں ہے اور انہیں معاونت فراہم کر رہی ہے۔

دریں اثنا، سی این این کو ذرائع نے بتایا کہ امریکی انٹیلی جنس اداروں کے تازہ جائزے سے یہ بات سامنے آئی ہے کہ جنگ کے بعد ایران نے اپنی مرضی سے آبنائے ہرمز کو بند کرنے کی صلاحیت حاصل کر لی ہے۔جائزے کے مطابق، جمعہ کو متوقع فریم ورک معاہدے کے باوجود ایران اس اہم آبی گزرگاہ کو استعمال کرتے ہوئے عالمی معیشت کو نقصان پہنچانے کی صلاحیت رکھتا ہے اور یہ خطرہ دوبارہ سامنے آ سکتا ہے۔

ذرائع کے مطابق ایران اب امریکہ کے لیے ایک کمزور پہلو بن چکا ہے کیونکہ اس نے خلیجی ممالک کے توانائی کے بنیادی ڈھانچے پر حملوں کو اپنے مفادات کے لیے استعمال کرنا سیکھ لیا ہے۔ رپورٹ میں کہا گیا کہ ایران نے ہمسایہ ممالک میں موجود امریکی فوجی اڈوں کو بھی نشانہ بنایا تھا، جنہیں امریکہ خطے کی سلامتی کی ضمانت کے طور پر پیش کرتا تھا۔ادھر امریکی صدر ٹرمپ نے اعلان کیا ہے کہ وہ ایران کے ساتھ ہونے والے معاہدے کا متن "چند دنوں میں" عوام کے سامنے جاری کریں گے، بلکہ انہوں نے یہ امکان بھی ظاہر کیا کہ وہ پورا دستاویز کیمروں کے سامنے پڑھ کر سنا سکتے ہیں۔

فرانس میں منعقدہ جی 7 سربراہی اجلاس کے موقع پر متحدہ عرب امارات کے صدر محمد بن زید النہیان سے ملاقات کے دوران ٹرمپ نے کہا کہ میں چاہتا ہوں کہ اس سے پہلے ایک باضابطہ ماحول موجود ہو، لیکن مجھے اسے عوامی بنانے میں کوئی مسئلہ نہیں۔ یہ ایک شاندار دستاویز ہے۔

معاہدے کی بنیادی شقوں کا ذکر کرتے ہوئے ٹرمپ نے کہا کہ اس میں واضح طور پر درج ہے کہ ایران کبھی بھی جوہری ہتھیار حاصل نہیں کرے گا۔امریکی صدر نے اتوار کو اس معاہدے پر الیکٹرانک دستخط کیے تھے، تاہم اس کا مکمل متن اب تک عوام کے سامنے جاری نہیں کیا گیا ہے۔