تہران: ایران کی سرکاری خبر رساں ایجنسی ارنا کے مطابق ایران کے صوبہ خوزستان میں امریکہ کی جانب سے تین مقامات کو نشانہ بنا کر کیے گئے میزائل حملے میں 7 افراد ہلاک اور 8 دیگر زخمی ہوگئے۔خوزستان کے گورنریٹ میں سلامتی اور قانون نافذ کرنے کے امور کے نائب سربراہ نے کہا کہ حملے میں ’’7 شہید اور 8 افراد زخمی‘‘ ہوئے ہیں۔ ارنا نے ان کے حوالے سے یہ اطلاع دی۔

دریں اثنا صنعا میں حوثیوں کی زیر انتظام اور بین الاقوامی سطح پر غیر تسلیم شدہ وزارت خارجہ نے ایران بھر میں امریکی حملوں پر تہران کے ساتھ یکجہتی کا اظہار کیا ہے۔ الجزیرہ کے مطابق وزارت نے ان ممالک کو بھی خبردار کیا ہے جو اپنی سرزمین پر امریکی فوجی دستوں کو تعینات کیے ہوئے ہیں کہ انہیں اس کے ’’نتائج‘‘ کا سامنا کرنا پڑے گا۔حوثیوں کے زیر انتظام خبر رساں ادارے سبا کی جانب سے جاری بیان میں وزارت خارجہ نے کہا کہ امریکی حملے ایران کے عزم کو کمزور نہیں کرسکتے اور بین الاقوامی قانون کے تحت تہران کا جواب دینا اس کا جائز حق ہے۔

الجزیرہ کے مطابق وزارت نے امریکہ پر خطے میں کشیدگی بڑھانے کا الزام عائد کیا اور کہا کہ واشنگٹن اور اس کی حمایت کرنے والے ممالک اس کے نتائج کے ذمہ دار ہوں گے۔وزارت نے ان ممالک کو بھی خبردار کیا جو اپنی سرزمین کو امریکی حملوں کے لیے اڈوں کے طور پر استعمال کرنے کی اجازت دے رہے ہیں۔ بیان میں کہا گیا کہ ایسے ممالک کو ’’اس کی قیمت چکانی ہوگی‘‘۔

یہ پیش رفت ایسے وقت میں ہوئی ہے جب امریکی صدر ڈونلڈ ٹرمپ نے اپنی تازہ ترین ٹروتھ سوشل پوسٹ میں دعویٰ کیا ہے کہ امریکہ کو آبنائے ہرمز پر ’’تقریباً مکمل کنٹرول‘‘ حاصل ہے۔ انہوں نے یہ بھی کہا کہ ایران کی معیشت ’’مکمل طور پر تباہی کی جانب بڑھ رہی ہے‘‘۔ٹرمپ نے ٹروتھ سوشل پر ایک بیان میں کہا کہ وہ ایران کو مذاکرات کی میز پر لانے کے لیے دباؤ ڈالنے کی کوشش نہیں کر رہے اور ان خبروں کو مسترد کردیا جن میں کہا گیا تھا کہ وہ تہران کو دوبارہ مذاکرات کی میز پر لانے کی کوشش کر رہے ہیں۔انہوں نے کہا کہ وہ ایران کو مذاکرات کی میز پر لانے کی کوشش نہیں کر رہے جیسا کہ اے بی سی نیوز نے رپورٹ کیا ہے۔ انہوں نے کہا کہ اگر ایران ان کے لیے بے فائدہ معاہدے پر دستخط کرتا ہے تو انہیں اس سے کوئی فرق نہیں پڑتا۔ ان کے مطابق موجودہ صورت حال میں امریکہ کی پوزیشن کہیں بہتر ہے کیونکہ اسے آبنائے ہرمز پر تقریباً مکمل کنٹرول حاصل ہے جبکہ ایران کی معیشت مکمل طور پر تباہی کی جانب بڑھ رہی ہے۔

ٹرمپ نے ایرانی عوام سے اپنی حکومت کے خلاف اٹھ کھڑے ہونے کی اپیل بھی کی اور سوال کیا کہ ’’ایرانی عوام کب اٹھ کھڑے ہوں گے اور مقابلہ کریں گے؟‘‘دریں اثنا ایران کے سرکاری نشریاتی ادارے آئی آر آئی بی کے مطابق جنوب مغربی ایران کے شہروں اہواز اور آغاجاری کے قریب بھی میزائل حملوں کی اطلاعات سامنے آئی ہیں۔خوزستان کے سلامتی اور قانون نافذ کرنے کے امور کے نائب وزیر نے بتایا کہ اہواز اور آغاجاری کے اطراف میں دو مقامات کو میزائلوں سے نشانہ بنایا گیا۔انہوں نے آئی آر آئی بی کے مطابق کہا کہ امریکہ کے دہشت گرد دشمن نے اہواز اور آغاجاری کے اطراف دو مقامات کو میزائلوں سے نشانہ بنایا ہے۔ مزید معلومات بعد میں جاری کی جائیں گی۔

امریکی صدر کے یہ بیانات ایسے وقت میں سامنے آئے ہیں جب امریکی سینٹرل کمانڈ کی افواج نے کہا ہے کہ اس نے ایرانی فوجی اہداف کے خلاف حملوں کی ایک لہر مکمل کرلی ہے۔ ان اہداف میں فضائی دفاعی تنصیبات اور بارودی سرنگیں بچھانے کی صلاحیتوں سے متعلق مقامات اور مواصلاتی تنصیبات سمیت دیگر اہداف شامل تھے۔ایران کی خبر رساں ایجنسی ارنا نے دعویٰ کیا ہے کہ امریکی حملوں کے جواب میں پاسداران انقلاب اسلامی کی فضائیہ نے اردن میں واقع امریکی پرنس حسن ایئر بیس کے خلاف بڑے پیمانے پر بیلسٹک میزائل کارروائی کی۔ ارنا کے مطابق اس کارروائی میں آر کیو 4 اور ایم کیو 9 بغیر پائلٹ طیاروں کے ہینگرز کو نشانہ بنایا گیا۔ارنا نے مزید دعویٰ کیا کہ ان حملوں کے نتیجے میں کئی بغیر پائلٹ طیارے تباہ ہوئے اور متعدد پائلٹ اور فضائی عملے کے ارکان ہلاک ہوئے ہیں۔ تاہم ان دعوؤں کی آزادانہ طور پر تصدیق نہیں ہوسکی ہے۔