نئی دہلی
امریکہ میں گیس کی بڑھتی ہوئی قیمتوں کے باعث مئی کے مہینے میں خوردہ مہنگائی تین سال کی بلند ترین سطح پر پہنچ گئی، جس سے فیڈرل ریزرو کی تشویش میں اضافہ ہوا ہے اور وسط مدتی انتخابات سے قبل امریکی انتظامیہ کے لیے ایک ممکنہ سیاسی چیلنج بھی پیدا ہو گیا ہے۔محکمۂ محنت نے بدھ کے روز بتایا کہ مئی میں خوردہ مہنگائی سالانہ بنیاد پر 4.2 فیصد بڑھ گئی، جو اپریل کے 3.8 فیصد کے مقابلے میں زیادہ ہے۔ اس طرح مسلسل تیسرے مہینے مہنگائی میں اضافہ ریکارڈ کیا گیا ہے۔
ماہانہ بنیاد پر گزشتہ ماہ قیمتوں میں 0.5 فیصد اضافہ ہوا، جبکہ اپریل میں 0.6 فیصد اور مارچ میں 0.9 فیصد کا نمایاں اضافہ دیکھا گیا تھا۔مہنگائی کی موجودہ شرح فیڈرل ریزرو کے مقررہ دو فیصد ہدف سے کہیں زیادہ ہے۔دریں اثنا، امریکی صدر ٹرمپ نے بدھ کے روز کہا کہ انہوں نے مہنگائی کے بارے میں فکر کرنا چھوڑ دیا ہے اور اب وہ اسے "پسند" کرنے لگے ہیں۔
جب ان سے خوردہ مہنگائی کے 4.2 فیصد تک پہنچنے کے بارے میں سوال کیا گیا تو انہوں نے اس معاملے پر غیر متوقع طور پر پرامید مؤقف اختیار کیا۔ٹرمپ نے اس بار نہ تو اسے ماضی کی طرح ڈیموکریٹک پارٹی کی جانب سے کیا گیا "دھوکا" قرار دیا اور نہ ہی یہ دعویٰ کیا کہ وہ عوام کے لیے زندگی گزارنے کی لاگت کم کر رہے ہیں۔
اس کے برعکس، انہوں نے حکومتی اعداد و شمار کی تعریف کی جن کے مطابق مہنگائی اپریل 2023 کے بعد اپنی بلند ترین سطح پر پہنچ گئی ہے۔ٹرمپ نے کہا کہ آپ جانتے ہیں مجھے حقیقت میں کیا پسند ہے؟ مجھے مہنگائی پسند ہے۔یہ بیان غیر متوقع سمجھا جا رہا ہے، کیونکہ نومبر میں ہونے والے وسط مدتی انتخابات سے قبل ووٹرز نے معیشت کو اپنی سب سے بڑی تشویش قرار دیا ہے اور اس معاملے پر ڈونالڈ ٹرمپ کی کارکردگی کو کم درجہ دیا ہے۔
.webp "امریکی مہنگائی تین سال کی بلند ترین سطح پر پہنچ گئی")
