وشاکھاپٹنم، آندھرا پردیش: وزیر دفاع راج ناتھ سنگھ نے جمعہ کے روز ہندوستانی بحریہ میں مقامی طور پر تیار کردہ جوہری توانائی سے چلنے والی آبدوز آئی این ایس اریدامن کو باقاعدہ طور پر شامل کیا۔ یہ قدم ہندوستان کی اسٹریٹجک بحری صلاحیتوں میں ایک اہم پیش رفت مانا جا رہا ہے۔
آئی این ایس اریدامن اریہنت کلاس کی جوہری آبدوزوں کا تیسرا جہاز ہے جو وشاکھاپٹنم میں پروجیکٹ اے ٹی وی کے تحت تیار کیا جا رہا ہے۔ اس آبدوز کی شمولیت سے مسلح افواج کی صلاحیت میں مزید اضافہ ہوگا۔
وزیر دفاع نے اسی موقع پر فریگیٹ تارگیری کو بھی بحریہ میں شامل کیا۔ تارگیری کی شمولیت ایسے وقت میں ہوئی ہے جب ہندوستان کے مشرقی ساحلی علاقے کی اسٹریٹجک اور بحری اہمیت مسلسل بڑھ رہی ہے اور انڈو پیسیفک خطے میں ہندوستان کی سرگرمیاں گہری ہو رہی ہیں۔
تارگیری کی کمیشننگ بحریہ کی اس مسلسل کوشش کو ظاہر کرتی ہے جس کے تحت وہ اپنے بیڑے میں اضافہ کر کے جنگی تیاری اور آپریشنل طاقت کو مضبوط بنا رہی ہے۔ پروجیکٹ 17 اے کلاس کے چوتھے طاقتور پلیٹ فارم کے طور پر تارگیری صرف ایک جہاز نہیں بلکہ 6670 ٹن وزنی جدید انجینئرنگ اور میک ان انڈیا کی ایک مضبوط مثال ہے۔
یہ جہاز ممبئی کی مزاگون ڈاک شپ بلڈرز لمیٹڈ نے تیار کیا ہے اور یہ پہلے کے ڈیزائن کے مقابلے میں زیادہ جدید ہے۔ اس کی ساخت زیادہ ہموار ہے اور اس کا ریڈار کراس سیکشن کم رکھا گیا ہے جس سے یہ خاموشی کے ساتھ مؤثر کارروائی کرنے کی صلاحیت رکھتا ہے۔ اس میں 75 فیصد سے زیادہ مقامی مواد استعمال ہوا ہے اور اس کی تیاری میں 200 سے زائد چھوٹے اور درمیانے درجے کے صنعتی اداروں نے حصہ لیا ہے جس سے ہزاروں لوگوں کو روزگار ملا ہے۔
تارگیری میں جدید انجن سسٹم نصب ہے جو اسے تیز رفتار اور طویل مدت تک آپریشن کرنے کے قابل بناتا ہے۔ اس کا ہتھیاروں کا نظام عالمی معیار کا ہے جس میں سپرسانک میزائل درمیانی فاصلے کے فضائی دفاعی نظام اور آبدوز شکن نظام شامل ہیں۔ یہ تمام نظام ایک جدید کامبیٹ مینجمنٹ سسٹم کے ذریعے منسلک ہیں جس سے عملہ فوری ردعمل دے سکتا ہے۔
یہ جہاز نہ صرف جنگی کارروائیوں کے لیے بلکہ انسانی امداد اور قدرتی آفات کے دوران مدد کے لیے بھی استعمال کیا جا سکتا ہے۔ اس کی لچکدار صلاحیت اسے مختلف نوعیت کے مشنز کے لیے موزوں بناتی ہے۔
ہندوستانی بحریہ مسلسل ایک مضبوط خود کفیل اور قابل اعتماد قوت کے طور پر ابھر رہی ہے جو سمندری حدود کی حفاظت کر رہی ہے۔ تارگیری اس بڑھتی ہوئی بحری طاقت کی علامت ہے اور ملک کے سمندری مفادات کے تحفظ کے لیے تیار ہے۔
