نئی دہلی: مرکزی وزیر خزانہ نرملا سیتا رمن نے منگل کو کہا کہ مالی سال 2026-27 کی پہلی سہ ماہی میں ہندوستان کی مجموعی گھریلو پیداوار میں 7.8 فیصد کی شرح سے اضافہ باقی مالی سال کے لیے نیک شگون ہے۔ انہوں نے کہا کہ عالمی چیلنجوں کے باوجود ملک کی معیشت میں اہم شعبوں میں وسیع پیمانے پر ترقی دیکھی گئی ہے۔انسٹاگرام پر جاری ایک ویڈیو پیغام میں نرملا سیتا رمن نے کہا کہ امریکہ کی ریاست شمالی کیرولائنا کے شہر ایشویل میں منعقدہ جی 20 اجلاس میں جہاں وہ مختلف نشستوں میں شرکت کر رہی ہیں ہندوستان کی تازہ اقتصادی شرح نمو کو بھی سراہا گیا۔

انہوں نے کہا کہ مالی سال 2026-27 کی پہلی سہ ماہی کے اعداد و شمار گزشتہ روز جاری ہوئے ہیں اور ہم نے 7.8 فیصد کی شرح نمو حاصل کی ہے۔ دنیا کی سب سے تیزی سے ترقی کرنے والی بڑی معیشت عالمی منظرنامے میں نمایاں مقام رکھتی ہے۔وزیر خزانہ نے کہا کہ اجلاس میں شریک تمام ممالک ہندوستان کی اقتصادی کارکردگی کی تعریف کر رہے ہیں کیونکہ عالمی سطح پر موجود مشکلات کے باوجود ملک نے رواں مالی سال کی پہلی سہ ماہی میں یہ شرح نمو حاصل کی ہے جو باقی سال کے لیے بھی ایک مثبت اشارہ ہے۔

نرملا سیتا رمن نے اس ترقی کو وسیع اور متوازن قرار دیتے ہوئے کہا کہ مختلف شعبوں میں اضافہ دیکھا گیا ہے۔ انہوں نے بتایا کہ صنعتی پیداوار کے شعبے میں 9.2 فیصد جبکہ مالیاتی اور پیشہ ورانہ خدمات کے شعبے میں 12.1 فیصد کی شرح سے ترقی ہوئی ہے۔وزیر خزانہ نے ہندوستان کے زرمبادلہ کے ذخائر کا بھی ذکر کیا اور کہا کہ یہ تقریباً 700 ارب امریکی ڈالر سے کچھ زیادہ ہیں۔

ان کے یہ بیانات سرکاری اعداد و شمار جاری ہونے کے ایک روز بعد سامنے آئے ہیں جن کے مطابق اپریل سے جون 2026 کی سہ ماہی میں ہندوستان کی حقیقی مجموعی گھریلو پیداوار میں 7.8 فیصد اضافہ ہوا۔ یہ شرح ریزرو بینک آف انڈیا کے پہلے کے 7 فیصد کے تخمینے سے زیادہ ہے۔اعداد و شمار کے مطابق مالی سال 2026-27 کی پہلی سہ ماہی میں حقیقی مجموعی گھریلو پیداوار کا تخمینہ 81.36 لاکھ کروڑ روپے لگایا گیا جبکہ گزشتہ مالی سال کی اسی سہ ماہی میں یہ 75.46 لاکھ کروڑ روپے تھی۔ اسی دوران برائے نام مجموعی گھریلو پیداوار 10.3 فیصد بڑھ کر 88.27 لاکھ کروڑ روپے ہو گئی جو مالی سال 2025-26 کی پہلی سہ ماہی میں 80 لاکھ کروڑ روپے تھی۔

تازہ اعداد و شمار مالی سال 2026-27 میں ہندوستانی معیشت کی کارکردگی کا پہلا سرکاری جائزہ ہیں۔ ریزرو بینک نے اس سے قبل پورے مالی سال کے لیے حقیقی مجموعی گھریلو پیداوار میں 6.7 فیصد شرح نمو کا اندازہ ظاہر کیا تھا جو اس کے پہلے کے 6.6 فیصد کے تخمینے سے زیادہ ہے۔نرملا سیتا رمن نے کہا کہ تازہ اعداد و شمار ہندوستانی شہریوں کی محنت اور حکومت کے طویل مدتی ترقیاتی اہداف میں ان کے کردار کی عکاسی کرتے ہیں۔

انہوں نے کہا کہ تمام اشاریے ظاہر کرتے ہیں کہ ہندوستانی شہریوں کی سخت محنت کے نتائج سامنے آ رہے ہیں اور وزیر اعظم نریندر مودی جس جذبے کے ساتھ ملک کو 2047 تک ترقی یافتہ ہندوستان کے مقصد کی جانب لے جا رہے ہیں وہ بھی اس پیش رفت میں اہم کردار ادا کر رہا ہے۔اس سے قبل وزیر اعظم نریندر مودی نے بھی ملک کے عوام کو ان کی محنت پر مبارک باد دی تھی اور کہا تھا کہ جنگوں بحرانوں اور رسد کے عالمی نظام میں رکاوٹوں جیسے چیلنجوں کے باوجود ہندوستان نے 7.8 فیصد کی شرح سے اقتصادی ترقی حاصل کی ہے۔

وزیر اعظم نے کہا کہ دنیا بھر سے جنگ کی خبریں آ رہی ہیں اور عالمی سطح پر مختلف بحران موجود ہیں۔ رسد کے نظام بری طرح متاثر ہیں اور 2020 میں کورونا وبا کے آغاز کے بعد سے دنیا کے کئی حصوں میں استحکام کا فقدان ہے۔ اس کے باوجود ہندوستان تیزی سے ترقی کر رہا ہے۔انہوں نے کہا کہ ملک کے اندر کچھ لوگ مایوسی پھیلا رہے ہیں اور غلط باتوں کو دہرا رہے ہیں لیکن ان تمام رکاوٹوں سے اوپر اٹھتے ہوئے ملک نے 7.8 فیصد کی شرح نمو حاصل کی ہے۔ انہوں نے کہا کہ اس رفتار کو برقرار رکھنا ہوگا اور آگے بڑھتے رہنے کے لیے خود کفیل ہندوستان بننا ضروری ہے۔جولائی سے ستمبر 2026 کی سہ ماہی سے متعلق مجموعی گھریلو پیداوار کا اگلا تخمینہ 30 نومبر کو جاری کیا جائے گا۔