وڈودرا: ہندوستان کی اپنی بلٹ ٹرین کی ٹیسٹنگ اگلے سال مئی یا جون تک شروع ہونے کی امید ہے اور ٹیسٹنگ کے دو سے چار ماہ بعد اس کا افتتاح کیا جائے گا۔ مرکزی وزیر ریلوے اشونی ویشنو نے منگل کو یہ بات کہی۔ وڈودرا میں ’نموں فار وکست بھارت‘ پروگرام سے خطاب کرتے ہوئے ویشنو نے کہا کہ بلٹ ٹرین کا پہلا باڈی فریم حال ہی میں تیار کیا گیا ہے اور اسے ’سکویز ٹیسٹ‘ کے لیے بھیج دیا گیا ہے۔

انہوں نے کہا، ’’اگلے سال مئی یا جون تک ہندوستان کی اپنی بلٹ ٹرین ٹیسٹنگ کے لیے پٹریوں پر دوڑنے لگے گی۔ دو سے چار ماہ کی ٹیسٹنگ کے بعد خود وزیر اعظم بلٹ ٹرین کا افتتاح کریں گے۔‘‘ ویشنو نے کہا کہ بلٹ ٹرین پروجیکٹ ’آتم نربھر بھارت‘ کے وژن کے مطابق تیار کیا جا رہا ہے۔ انہوں نے وڈودرا اور ممبئی کے درمیان سفر کے وقت کا ذکر کرتے ہوئے کہا، ’’جب آپ وڈودرا سے بلٹ ٹرین میں سوار ہوں گے تو صرف ڈیڑھ گھنٹے میں ممبئی پہنچ جائیں گے۔‘

‘ وزیر ریلوے نے بتایا کہ بلٹ ٹرین پروجیکٹ پر تیزی سے کام جاری ہے اور سورت-واپی سیکشن کی تعمیر رواں سال دسمبر تک مکمل ہونے کی امید ہے۔ ویشنو نے ہندوستانی ریلوے میں جاری وسیع تر تبدیلیوں کا بھی ذکر کیا۔ انہوں نے کہا کہ حکومت آپریٹنگ اور ریزرویشن نظام کے ساتھ ساتھ تعمیراتی طریقہ کار کو بھی جدید بنا رہی ہے۔ انہوں نے کہا، ’’ہم آپریٹنگ سسٹم اور ریزرویشن سسٹم سے لے کر پرانے تعمیراتی طریقہ کار تک ہر چیز میں اصلاح اور جدید کاری کر رہے ہیں۔‘‘

انہوں نے مال برداری کے نظام کو جدید بنانے کی کوششوں کے تحت نمک کی نقل و حمل کے لیے خصوصی ڈیزائن سمیت ویگنوں کے نئے ڈیزائن کا بھی ذکر کیا۔ ویشنو نے کہا کہ ریلوے کے کئی طویل عرصے سے زیر التوا منصوبے مکمل کیے جا چکے ہیں، جن میں چناب پل اور میزورم کو ریلوے نیٹ ورک سے جوڑنے والا منصوبہ بھی شامل ہے۔

انہوں نے بتایا کہ 280 ریلوے اسٹیشنوں کی ازسرنو تعمیر کی گئی ہے اور 36 ہزار کلومیٹر نئی پٹریاں بچھائی گئی ہیں۔ وزیر نے یہ بھی کہا کہ وندے بھارت ٹیکنالوجی سے لیس مال بردار ٹرینوں کی تیاری کا کام جاری ہے۔ وزیر ریلوے نے مزید کہا کہ کووڈ-19 وبا سے متعلق چیلنجز کے باوجود ریلوے کی ترقی کی رفتار میں اضافہ ہوا ہے۔ پروجیکٹ کا پہلا حصہ 2020 میں مکمل کیا گیا تھا، جس کے بعد دیگر حصوں پر کام میں تیزی لائی گئی۔ ویشنو نے کہا، ’’ہندوستانی ریلوے کی جو جدید شکل اب سامنے آ رہی ہے، اس سے آنے والی کئی نسلوں کو فائدہ ہوگا۔‘‘