سری ہری کوٹا: اسکائی روٹ ایرو اسپیس کے وکرم-1 ٹیسٹ فلائٹ-1 نے کامیابی کے ساتھ مدار میں پہنچ کر ہندوستان کے پہلے نجی طور پر تیار کردہ مداری (آربیٹل کلاس) راکٹ کی تاریخی پرواز مکمل کر لی۔ وزیر اعظم نریندر مودی نے اس کامیاب لانچ پر اسکائی روٹ ایرو اسپیس کو مبارک باد دی۔ راکٹ نے اپنا آخری مرحلہ کامیابی سے مکمل کرتے ہوئے مختلف پے لوڈز کو تقریباً 450 کلومیٹر بلند مدار میں پہنچا دیا۔

اس کامیابی کے ساتھ ہندوستان دنیا کا تیسرا ملک بن گیا ہے جس نے نجی شعبے کی مدد سے مداری راکٹ لانچ کرنے کی صلاحیت حاصل کی ہے۔ "مشن آگمن" کے نام سے انجام دی گئی اس پرواز کا آغاز ستیش دھون خلائی مرکز، سری ہری کوٹا سے کیا گیا۔ 24 میٹر بلند کاربن کمپوزٹ سے تیار کردہ اس راکٹ نے پرواز کے تمام طے شدہ مراحل، بشمول مختلف اسٹیجوں کی علیحدگی اور آربیٹل ایڈجسٹمنٹ ماڈیول (OAM) کے کامیاب استعمال، کو مکمل کیا۔

آربیٹل ایڈجسٹمنٹ ماڈیول نے اپنے تھری ڈی پرنٹڈ مائع ایندھن والے انجن کو استعمال کرتے ہوئے راکٹ کو مدار میں داخل کرنے کے لیے آخری رفتار فراہم کی۔ اس ماڈیول کی خاصیت یہ ہے کہ اس کا انجن خلا میں بار بار بند اور دوبارہ شروع کیا جا سکتا ہے۔ پرواز کے دوران پہلے مرحلے کالم-1200 نے راکٹ کو فضا کے گھنے حصے سے گزارا، جس کے بعد یہ کامیابی سے الگ ہو گیا۔

اس کے بعد پے لوڈ فیئرنگ بھی الگ کر دی گئی، جس سے پہلی بار راکٹ میں موجود سیٹلائٹس براہِ راست خلا کے ماحول میں پہنچ گئے۔ دوسرے مرحلے کالم-250 نے اپنا مشن مکمل کرنے کے بعد علیحدگی اختیار کی، جس کے بعد کالم-100 کو کامیابی سے فعال کیا گیا، جو وکرم-1 کا سب سے چھوٹا اور بلند ترین مرحلہ ہے۔ تیسرے مرحلے کی علیحدگی کے ساتھ سالڈ پروپلشن کا مرحلہ مکمل ہوا، جس کے بعد آربیٹل ایڈجسٹمنٹ ماڈیول نے مشن کو کامیابی سے انجام تک پہنچایا۔

تین سالڈ فیول اسٹیجوں اور ایک مائع ایندھن والے آربیٹل ایڈجسٹمنٹ ماڈیول سے لیس وکرم-1 کو اس طرح تیار کیا گیا ہے کہ وہ 450 کلومیٹر کی نچلی زمینی مدار (لو ارتھ آربٹ) میں 350 کلوگرام تک وزن کے پے لوڈ پہنچا سکے۔ اس پہلی پرواز میں متعدد پے لوڈز بھی شامل تھے، جن میں بنگلورو کی کمپنی کوسموس ڈائمنڈز کی تیار کردہ لیبارٹری میں بنایا گیا ہیرا "ڈائمنڈ لوٹس" بھی شامل تھا۔

اس مشن کی ایک منفرد خصوصیت وزیر اعظم نریندر مودی کا اپنے ہاتھ سے لکھا ہوا ایک پوسٹ کارڈ بھی تھا، جس پر "وندے ماترم" تحریر تھا۔ اس کے ساتھ اسکائی روٹ کی ٹیم، سرمایہ کاروں، پالیسی سازوں اور دنیا بھر کے خیر خواہوں کے ہاتھ سے لکھے گئے پیغامات بھی خلا میں بھیجے گئے، جس نے "مشن آگمن" کو ایک منفرد اور علامتی خلائی مہم بنا دیا۔