نیویارک

نیویارک میں ہندوستان کے مستقل مشن نے جمعہ کو بتایا کہ ہندوستان کے امیدوار، پروفیسر بمل این۔ پٹیل کو نیویارک میں انٹرنیشنل ٹریبونل فار دی لا آف دی سی (آئی ٹی ایل او ایس) کا جج منتخب کر لیا گیا ہے۔ وہ 2026 سے 2035 تک کے دورِ کار کے لیے خدمات انجام دیں گے۔ وزیرِ خارجہ ایس۔ جے شنکر نے ان کے انتخاب پر مبارکباد پیش کی۔ انہوں نے ایکس (X) پر اپنے بیان میں کہا، ’’ڈاکٹر بمل پٹیل کو مبارک ہو! یو این سی ایل او ایس کے رکن ممالک کا ان کی حمایت کے لیے دل کی گہرائیوں سے شکریہ۔

پروفیسر پٹیل یکم اکتوبر کو ٹریبونل میں اپنا عہدہ سنبھالیں گے۔ یہ ٹریبونل ایک خصوصی عالمی عدالت کے طور پر کام کرتا ہے، جو دنیا کے سمندروں، ان کے استعمال اور ان کے وسائل کے پُرامن اور قانونی نظم و نسق کو یقینی بناتا ہے۔ وزارتِ خارجہ کے ترجمان رندھیر جیسوال نے پروفیسر پٹیل کے انتخاب کو ایک ’’اہم کامیابی‘‘ قرار دیا۔

انہوں نے کہا کہ ہم تمام رکن ممالک کا ہندوستان پر اعتماد کرنے کے لیے شکریہ ادا کرتے ہیں اور پروفیسر پٹیل سمیت ٹریبونل کے لیے منتخب ہونے والے تمام معزز اراکین کو مبارکباد پیش کرتے ہیں۔

پروفیسر پٹیل کا کامیاب انتخاب ٹریبونل میں ہندوستان کی مسلسل نمائندگی کو یقینی بناتا ہے۔ یہ انتخاب نیویارک میں اقوامِ متحدہ کے ہیڈکوارٹر میں 15 جون سے 19 جون تک منعقد ہونے والے اقوامِ متحدہ کنونشن برائے قانونِ سمندر (یو این سی ایل او ایس) کے رکن ممالک کے 36ویں اجلاس کے دوران ہوا۔

نیویارک میں ہندوستان کے مستقل مشن نے کہا کہ آج انٹرنیشنل ٹریبونل فار دی لا آف دی سی (آئی ٹی ایل او ایس) کے جج کے طور پر منتخب ہونے پر پروفیسر ڈاکٹر بمل این۔ پٹیل کو مبارکباد۔ ان کا انتخاب کثیرالجہتی تعاون اور قانونِ سمندر کے تئیں ہندوستان کے غیر متزلزل عزم کو مزید مضبوط کرتا ہے۔

مشن نے پروفیسر پٹیل کے لیے نیک خواہشات کا اظہار کرتے ہوئے تمام رکن ممالک کا حمایت کے لیے شکریہ ادا کیا اور یو این سی ایل او ایس کے لیے تمام امیدواروں کے وژن اور وابستگی کو سراہا۔

یو این سی ایل او ایس سن 1994 میں نافذ العمل ہوا تھا اور اس وقت اس کے 172 رکن ممالک ہیں۔ انٹرنیشنل ٹریبونل فار دی لا آف دی سی (آئی ٹی ایل او ایس) ایک آزاد عدالتی ادارہ ہے، جسے 1982 کے اقوامِ متحدہ کنونشن برائے قانونِ سمندر کے تحت قائم کیا گیا تھا۔ اسے کنونشن کی تشریح یا اس کے نفاذ سے متعلق تمام تنازعات اور دیگر ایسے معاملات پر اختیار  اصل ہے جو کسی معاہدے کے تحت ٹریبونل کے سپرد کیے جائیں۔ کنونشن سے متعلق تنازعات میں سمندری حدود کے تعین، جہاز رانی، سمندری حیاتیاتی وسائل کے تحفظ اور انتظام، سمندری ماحول کے تحفظ اور سمندری سائنسی تحقیق جیسے موضوعات شامل ہو سکتے ہیں۔

سمندری قانون کے شعبے میں ایک ممتاز ہندوستانی قانونی ماہر، پروفیسر بمل پٹیل اس وقت انٹرنیشنل لا کمیشن کے رکن ہیں اور گجرات میں واقع نیشنل ڈیفنس یونیورسٹی کے وائس چانسلر بھی ہیں۔

ٹریبونل میں 21 آزاد اراکین شامل ہوتے ہیں، جنہیں کنونشن کے رکن ممالک خفیہ رائے شماری کے ذریعے منتخب کرتے ہیں۔ جغرافیائی توازن برقرار رکھنے کے لیے نشستوں کو پانچ علاقائی گروپوں میں تقسیم کیا گیا ہے: افریقہ سے 5، ایشیا سے 5، لاطینی امریکہ اور کیریبین سے 4، مغربی یورپ اور دیگر ممالک سے 4، جبکہ مشرقی یورپ سے 3 نشستیں مختص ہیں۔

حالیہ انتخابات میں رکن ممالک نے 2026 سے 2035 کے دورِ کار کے لیے 7 نئے ججوں کا انتخاب کیا۔ یہ جج ویتنام، گھانا، تیونس، روس، نیدرلینڈز، ہندوستان اور برازیل کی نمائندگی کرتے ہیں۔ہندوستان کی نیرو چڈھا اس وقت آئی ٹی ایل او ایس کی نائب صدر ہیں۔ وہ یکم اکتوبر 2017 سے ٹریبونل کی رکن ہیں اور اکتوبر 2023 سے نائب صدر کے عہدے پر فائز ہیں۔

دریں اثنا، اقوامِ متحدہ میں ہندوستان کے مستقل نمائندے پی۔ ہریش نے بھی آئی ٹی ایل او ایس میں منتخب ہونے پر پروفیسر بمل پٹیل کو مبارکباد دی۔ انہوں نے ایکس  پر اپنے پیغام میں کہا کہ پروفیسر ڈاکٹر بمل پٹیل کو ان کے کامیاب انتخاب پر دلی مبارکباد۔