نئی دہلی : ہندوستان نے دو طرفہ تعلقات کو معمول پر لانے کی سمت ایک اہم قدم اٹھاتے ہوئے پانچ سال بعد دنیا بھر میں چینی شہریوں کو سیاحتی ویزے جاری کرنا دوبارہ شروع کر دیا ہے۔ یہ پابندی 2020 کی گلوان جھڑپ کے بعد لگائی گئی تھی۔

اس فیصلے سے پہلے اس سال کچھ مثبت پیش رفتیں دیکھنے کو ملی تھیں، جن میں جنوری 2025 میں ہندوستان اور چین کے درمیان ہوئی وہ معاہدہ بھی شامل ہے جس کے تحت دونوں ممالک نے براہِ راست مسافر پروازیں دوبارہ شروع کرنے پر اتفاق کیا تھا۔سرکاری ذرائع کے مطابق جولائی میں جاری ایک حکم نامے کی روشنی میں چینی شہریوں کے لیے سیاحتی ویزے بحال کرنے کا فیصلہ کیا گیا۔

ایک ماہ پہلے، جون 2025 میں، پانچ سال سے رکی ہوئی کیلاش مانسرور یاترا بھی دوبارہ شروع کی گئی، اور ہندوستانی یاتریوں کا پہلا گروپ تبت میں داخل ہوا۔

اس سے پہلے یکم اپریل کو دونوں ممالک کے درمیان سفارتی تعلقات کے 75 سال مکمل ہونے پر صدر شی جن پنگ، صدر دروپدی مرمو، وزیر اعظم لی چیانگ اور وزیر اعظم مودی نے ایک دوسرے کو مبارکباد دی تھی۔ اس سے دونوں ملکوں کی جانب سے استحکام کے نئے عزم کا اظہار ہوا۔

سال 2025 میں ہندوستان اور چین کے درمیان سفارت کاری میں واضح تیزی آئی۔ وزیر خارجہ ایس جئے شنکر نے جولائی میں بیجنگ کا دورہ کیا اور کہا کہ تعلقات "آہستہ آہستہ مثبت سمت میں بڑھ رہے ہیں" اور "باہمی اسٹریٹجک اعتماد کی بنیادی بنیاد" قائم ہو رہی ہے۔

اس کے بعد چینی وزیر خارجہ وانگ ای نے اگست میں دو روزہ دورے پر نئی دہلی کا رخ کیا، جہاں انہوں نے قومی سلامتی مشیر اجیت ڈوبھال اور وزیر خارجہ جئے شنکر سے سرحدی تناؤ میں کمی اور تعلقات کو معمول پر لانے پر بات چیت کی۔

ان اقدامات نے وزیراعظم مودی کے چین کے تاریخی دورے کی راہ ہموار کی۔ 31 اگست کو وہ سات سال بعد پہلی بار چین گئے اور تیانجن میں SCO اجلاس میں صدر شی جن پنگ سے ملاقات کی، جہاں دونوں رہنماؤں نے اس بات پر اتفاق کیا کہ ایک دوسرے کو "حریف نہیں بلکہ شراکت دار" کے طور پر دیکھنا چاہیے۔

10 نومبر کو شنگھائی میں ہندوستان کے قونصل جنرل پراتیک ماتھر نے نئی دہلی سے آنے والی پہلی براہِ راست پرواز کے مسافروں کا خیرمقدم کیا، جو پانچ سال بعد دونوں ممالک کے درمیان تجارتی پروازوں کی بحالی کی علامت تھی۔

قونصل خانے نے ایکس پر لکھا:"ہموار ہوائیں اور صاف آسمان! جیسے جیسے عوامی رابطے مضبوط ہوتے جا رہے ہیں، ہندوستان ایک عالمی مرکز کے طور پر ابھر رہا ہے۔ نئی دہلی اور شنگھائی کے درمیان براہِ راست پروازوں کی بحالی پر CG @PratikMathur1 نے پہلے مسافروں کا استقبال کیا۔"