نئی دہلی۔ ہندوستان کو BRICS ممالک کے ساتھ اپنی برآمدات بڑھانے پر زیادہ توجہ دینے کی ضرورت ہے کیونکہ توانائی کی بڑی درآمدات کے باعث گروپ کے بیشتر رکن ممالک کے ساتھ ہندوستان کو تجارتی خسارے کا سامنا ہے۔ یہ بات BRICS چیمبر آف کامرس اینڈ انڈسٹری کے چیئرمین سمپ شاستری نے کہی۔

اے این آئی سے گفتگو کرتے ہوئے سمپ شاستری نے کہا کہ اس وقت ہندوستان کو بیشتر BRICS ممالک کے ساتھ تجارتی خسارہ ہے کیونکہ ملک بنیادی طور پر توانائی کے ذرائع درآمد کر رہا ہے۔ انہوں نے کہا کہ ہندوستان کی توانائی کی کھپت بہت زیادہ ہے اور 1.4 بلین کی آبادی کے پیش نظر یہ ضروری ہے کہ ہر گھر تک ایل پی جی پہنچے اور ہر گاڑی پٹرول سے چل سکے۔

انہوں نے کہا کہ ہندوستان مینوفیکچرنگ کے شعبے میں پیش رفت کر رہا ہے اور مصنوعات کے معیار کو بھی بہتر بنایا جا رہا ہے۔ اس سے برآمدات میں اضافے کے امکانات پیدا ہوئے ہیں۔

سمپ شاستری نے کہا کہ پہلے توجہ زیادہ تر مقدار پر تھی لیکن اب معیار اور مقدار دونوں اہم ہیں۔ انہوں نے کہا کہ ہندوستان کے معیار کو ادویہ سازی سمیت مختلف شعبوں میں منظوری اور عالمی قبولیت حاصل ہو رہی ہے۔

انہوں نے BRICS ممالک کے درمیان برآمدات بڑھانے کے ساتھ باہمی ضرورتوں کو پورا کرنے اور ٹیکنالوجی کے تبادلے پر زیادہ توجہ دینے کی ضرورت پر زور دیا۔ ان کے مطابق BRICS ممالک کو ایک دوسرے کی صلاحیتوں سے فائدہ اٹھانے اور ٹیکنالوجی شیئرنگ کو فروغ دینے کے لیے مزید اقدامات کرنے چاہئیں۔

ڈالر سے دوری یعنی ڈی ڈالرائزیشن کے معاملے پر بھی سمپ شاستری نے مقامی کرنسیوں اور ڈیجیٹل ادائیگیوں کے زیادہ استعمال کی حمایت کی۔ انہوں نے کہا کہ امریکی ڈالر کے ذریعے تجارت کرنے پر کاروباری اداروں کو کرنسی تبدیل کرنے اور اضافی لین دین کی لاگت برداشت کرنا پڑتی ہے۔

انہوں نے کہا کہ مقامی کرنسی اور ڈیجیٹل لین دین کے استعمال کے علاوہ کوئی دوسرا مؤثر حل نظر نہیں آتا۔ انہوں نے ہندوستان کے یونیفائیڈ پیمنٹس انٹرفیس یعنی UPI کو ڈیجیٹل ادائیگی کے بنیادی ڈھانچے کی ایک مثال قرار دیا۔

امریکہ کا حوالہ دیتے ہوئے سمپ شاستری نے کہا کہ ڈی ڈالرائزیشن کا عمل اس وقت شروع ہوا جب امریکہ نے خود کرپٹو میں سرمایہ کاری کی۔ ان کے مطابق امریکہ نے خود ڈی ڈالرائزیشن کی طرف قدم بڑھایا اور اس کا الزام دوسرے ممالک پر نہیں لگایا جانا چاہیے۔

انہوں نے BRICS ممالک کے درمیان تجارت بڑھانے میں جغرافیائی اور جغرافیائی سیاسی رکاوٹوں کی جانب بھی توجہ دلائی۔ سمپ شاستری نے کہا کہ مختلف خطوں میں پھیلے ہونے کی وجہ سے BRICS ممالک کے درمیان لاجسٹک چیلنجز بہت زیادہ ہیں۔

انہوں نے بتایا کہ ہندوستان۔ چین اور روس نئی تجارتی راہوں کے امکانات تلاش کر رہے ہیں جن میں آرکٹک روٹ بھی شامل ہے۔

BRICS کے اندر تجارتی معاہدوں کے حوالے سے سمپ شاستری نے ہندوستان اور روس کے درمیان پیش رفت کی امید ظاہر کی۔ انہوں نے کہا کہ روس کے ساتھ تجارتی معاہدے کی امید ہے اور یہ BRICS ممالک کے درمیان ہونے والے ابتدائی اہم معاہدوں میں شامل ہو سکتا ہے۔

ہندوستان اس وقت یوریشین اکنامک یونین کے ساتھ آزاد تجارتی معاہدے پر مذاکرات کر رہا ہے۔ روس بھی اس اتحاد کا رکن ہے۔ ہندوستان اور روس نے 2030 تک دو طرفہ تجارت کو 100 بلین امریکی ڈالر سے زیادہ کرنے کا ہدف مقرر کیا ہے۔ اس کے ساتھ ہندوستانی برآمدات بڑھانے اور تجارت کو مزید متوازن بنانے پر بھی توجہ دی جا رہی ہے۔

ہندوستان کی موجودہ BRICS صدارت کے دوران رکن ممالک کے درمیان تجارت بڑھانے کے ساتھ سپلائی چین کو زیادہ مضبوط۔ متنوع اور لچکدار بنانے کے امکانات پر بھی تبادلہ خیال کیا گیا ہے۔