بالوترا

وزیر اعظم نریندر مودی نے ہفتہ کو کہا کہ مغربی ایشیا کے بحران کے دوران پیدا ہونے والے ایندھن کے بحران سے نمٹنے میں ہندوستان نے نہ صرف کامیابی حاصل کی بلکہ اپنی سفارتی طاقت کا مثبت استعمال کرتے ہوئے اس چیلنج پر قابو پایا۔راجستھان کے بالوترا میں ریفائنری اور پیٹروکیمیکل کمپلیکس کے افتتاح کے بعد خطاب کرتے ہوئے وزیر اعظم نے کہا کہ گزشتہ ایک دہائی کے دوران نافذ کی گئی "دور اندیش پالیسیوں" نے اس کامیابی میں اہم کردار ادا کیا۔

انہوں نے کہا کہ یہ سب غیر معمولی ہے۔ ہندوستان نے ہر سطح پر درست فیصلے کیے، بحران کا بروقت جائزہ لیا، مؤثر حکمت عملی تیار کی، اپنے وسائل کا متوازن استعمال کیا اور اپنی سفارتی طاقت کو مثبت انداز میں بروئے کار لایا۔ اسی وجہ سے ہندوستان اس بحران سے کامیابی کے ساتھ نکل سکا۔وزیر اعظم مودی نے الزام عائد کیا کہ 2018 سے 2023 کے دوران کانگریس حکومت نے تعاون نہیں کیا، جس کی وجہ سے اس منصوبے پر کام رکا رہا۔

انہوں نے کہا کہ آج میں یہاں ریفائنری منصوبے کا افتتاح کر رہا ہوں۔ ہم نے 2017 میں مفاہمتی یادداشت پر دستخط کیے تھے، لیکن 2018 سے 2023 تک کی کانگریس حکومت نے تعاون نہیں کیا اور منصوبہ تعطل کا شکار رہا۔ ملک نے اس غیر متوقع بحران سے محض اتفاقاً نجات حاصل نہیں کی، بلکہ گزشتہ دس برسوں سے نافذ کی جانے والی دور اندیش پالیسیوں نے اس میں اہم کردار ادا کیا۔ آپ میرے کام کرنے کے انداز سے واقف ہیں، ہم وہ لوگ ہیں جو سنگ بنیاد رکھنے کے ساتھ ساتھ منصوبوں کا افتتاح بھی کرتے ہیں۔

انہوں نے کہا کہ اکیسویں صدی کے نئے ہندوستان کے عزم اور کوششوں نے مغربی ایشیا کی جنگ سے پیدا ہونے والے توانائی کے بحران پر قابو پانے میں اہم کردار ادا کیا۔وزیر اعظم نے کہا کہ آج راجستھان کی سرزمین سے میں ملک کی ایک اور طاقت کا ذکر کرنا چاہتا ہوں۔ آپ سب دیکھ رہے ہیں کہ مغربی ایشیا کی جنگ نے پوری دنیا میں بے چینی پیدا کر دی ہے اور ہر ملک مشکلات کا سامنا کر رہا ہے۔ اس جنگ نے اکیسویں صدی کے سب سے بڑے توانائی بحران کو جنم دیا ہے۔ دنیا کے کئی بڑے ممالک آج ایندھن کی قلت سے دوچار ہیں، لیکن اکیسویں صدی کے نئے ہندوستان کے عزم اور کوششوں نے اس بڑے بحران پر کامیابی حاصل کی ہے۔

انہوں نے مزید کہا کہ جنگ کے دوران ہندوستان نے 40 سے زائد ممالک سے ایندھن درآمد کرنا شروع کیا۔ ہندوستان نے دنیا کو واضح پیغام دیا کہ ہمارے لیے قومی مفاد اور شہریوں کی فلاح و بہبود سب سے زیادہ اہم ہے۔وزیر اعظم مودی نے کہا کہ بحران کے دوران ہندوستان کی سفارتی مہارت نمایاں طور پر سامنے آئی۔

انہوں نے کہا کہ شہری ہی ہمارا خدا ہے، یہی ہمارا منتر ہے۔ جنگ کے دوران دوسرے ممالک کے ساتھ ہندوستان کی دوستی نے بہت مدد کی۔ اس بحران سے پہلے ہندوستان 25 سے 26 ممالک سے ایندھن درآمد کرتا تھا، لیکن بحران کے دوران ہندوستان کی سفارت کاری کی کامیابی واضح طور پر سامنے آئی۔ دوسرے ممالک کے ساتھ ہمارے اچھے تعلقات نے اس مشکل وقت میں ہماری بھرپور مدد کی۔وزیر اعظم نے بتایا کہ اپریل سے جون کے درمیان تیل کمپنیوں کو ڈیزل اور پٹرول کی فروخت میں 75 ہزار کروڑ روپے سے زیادہ کا نقصان برداشت کرنا پڑا۔

انہوں نے کہا کہ صرف اپریل سے جون کے دوران کمپنیوں کو ڈیزل اور پٹرول میں 75 ہزار کروڑ روپے سے زائد کا نقصان ہوا، اور اس نقصان کی ذمہ داری سرکاری خزانے نے اٹھائی۔ ہم نے ایکسائز ڈیوٹی میں بھی 10 روپے فی لیٹر کی کمی کی تاکہ عوام پر اضافی بوجھ نہ پڑے۔اپوزیشن پر تنقید کرتے ہوئے وزیر اعظم نے کہا، "بہت سی افواہیں پھیلائی گئیں، لوگوں کو ڈرایا گیا، انہیں بھڑکانے کی کوشش کی گئی اور سیاسی کھیل کھیلے گئے، لیکن بدنیتی رکھنے والے عناصر کامیاب نہیں ہو سکے۔ دور دراز علاقوں میں بھی معمولی رکاوٹوں کے علاوہ ایندھن کی فراہمی میں کوئی بڑا مسئلہ پیدا نہیں ہوا۔

انہوں نے مزید کہا کہ جب کچھ عناصر عوام میں خوف اور افواہیں پھیلانے میں مصروف تھے، اس وقت حکومت دن رات کام کر رہی تھی اور حالات کو سنبھالنے کے لیے بھرپور کوششیں کی جا رہی تھیں۔ یہ محنت، یہ صبر اور پالیسی و سفارتی سطح پر اٹھائے گئے ہر حساس قدم کو تاریخ میں یاد رکھا جائے گا۔

واضح رہے کہ وزیر اعظم نریندر مودی نے راجستھان کے ضلع بالوترا کے پچپدرا میں ملک کے پہلے گرین فیلڈ انٹیگریٹڈ ریفائنری-کم-پیٹروکیمیکل کمپلیکس کا افتتاح کیا، جسے توانائی اور پیٹروکیمیکل شعبے میں ایک اہم سنگِ میل قرار دیا جا رہا ہے۔