نئی دہلی: ہندوستان کے کمپٹرولر اینڈ آڈیٹر جنرل (CAG) اور اسرائیل کے سپریم آڈٹ انسٹی ٹیوشن (SAI) نے سرکاری شعبے کے آڈٹ کے میدان میں باہمی تعاون کو مضبوط بنانے کے لیے ایک مفاہمتی یادداشت (MoU) پر دستخط کیے ہیں۔

سرکاری اعلامیے کے مطابق اسرائیل کے اسٹیٹ کمپٹرولر اور اومبڈزمین اور یورپی تنظیم برائے سپریم آڈٹ انسٹی ٹیوشنز (EUROSAI) کے صدر متانیاہو اینگل مین نے ایک اعلیٰ سطحی وفد کے ہمراہ ہندوستان کے کمپٹرولر اینڈ آڈیٹر جنرل کے دفتر کا دورہ کیا۔

دورے کے دوران ہندوستان کے کمپٹرولر اینڈ آڈیٹر جنرل کے سنجے مورتی اور متانیاہو اینگل مین کے درمیان دوطرفہ ملاقات ہوئی، جس کے اختتام پر ہندوستان اور اسرائیل کے اعلیٰ آڈٹ اداروں کے درمیان مفاہمتی یادداشت پر دستخط کیے گئے۔

اعلامیے کے مطابق اس معاہدے کے تحت سرکاری شعبے کے آڈٹ میں پیشہ ورانہ معلومات، طریقۂ کار، تکنیکی مہارت، تربیتی مواقع اور بہترین عملی تجربات کے تبادلے کے ذریعے تعاون کو فروغ دیا جائے گا۔ اس کے علاوہ باہمی دلچسپی کے شعبوں میں مہارتوں، تجربات اور جدید طریقوں کے تبادلے کے لیے ہندوستان اور اسرائیل میں باری باری دوطرفہ سیمینار منعقد کرنے کی تجویز پر بھی تبادلۂ خیال کیا گیا۔

اعلامیے میں کہا گیا کہ اس ملاقات نے شفافیت، جوابدہی، بہتر طرز حکمرانی اور عوامی انتظامیہ میں جدت کو فروغ دینے کے لیے دونوں اداروں کے مشترکہ عزم کی توثیق کی، جبکہ ہندوستان اور اسرائیل کے درمیان خوشگوار تعلقات کو مزید مستحکم بنانے پر بھی زور دیا گیا۔

دورے کے ایک حصے کے طور پر متانیاہو اینگل مین نے ڈاکٹر بی آر امبیڈکر لیکچر سیریز کے تحت "سرکاری شعبے کے آڈٹ میں مصنوعی ذہانت: جدید اطلاقات، کارکردگی آڈٹ اور جدید ریاستی آڈٹ کے اختراعی آلات" کے موضوع پر ایک خصوصی لیکچر بھی دیا۔

لیکچر میں مصنوعی ذہانت (AI) اور ڈیٹا اینالیٹکس سمیت ابھرتی ہوئی ٹیکنالوجیز کی اس صلاحیت کو اجاگر کیا گیا کہ وہ سرکاری آڈٹ کے نظام کو زیادہ مؤثر، تیز اور نتیجہ خیز بنا سکتی ہیں۔

اسرائیل کے اسٹیٹ کمپٹرولر اور اومبڈزمین کے دفتر کے تجربات کی روشنی میں اینگل مین نے بتایا کہ جدید ٹیکنالوجی کو کس طرح عوامی نگرانی مضبوط بنانے، احتساب کو بہتر کرنے اور حکمرانی سے متعلق نئے چیلنجز سے نمٹنے کے لیے استعمال کیا جا سکتا ہے۔اس دوطرفہ اجلاس میں ہندوستان کی جانب سے کے ایس سبرامنین (ڈپٹی کمپٹرولر اینڈ آڈیٹر جنرل)، بی کے موہنتی (چیف ٹیکنالوجی آفیسر) اور ومالیندر پٹوردھن (ڈائریکٹر جنرل) شریک ہوئے، جبکہ اسرائیلی وفد میں ہندوستان میں اسرائیل کے سفیر رووین آزر اور اسٹیٹ کمپٹرولر و اومبڈزمین کے دفتر کے بین الاقوامی شعبے کی سربراہ میری وائس بھی شامل تھیں۔