نئی دہلی/ آواز دی وائس 

وزارتِ خارجہ کے ایک بیان کے مطابق، ہندوستان اور مصر کے درمیان قاہرہ میں خارجہ دفتر مشاورت (ایف او سی) کے 14ویں دور کا انعقاد کیا گیا۔ اس مشاورت کی مشترکہ صدارت ہندوستان کی جانب سے سیکریٹری (ساؤتھ) نینا ملہوترا اور مصر کی جانب سے ایشیائی امور کے لیے اسسٹنٹ وزیر خارجہ، سفیر عمر حمزہ نے کی۔

دونوں فریقوں نے 2023 میں تعلقات کو اسٹریٹجک شراکت داری کے درجے پر فائز کیے جانے کے بعد سے ہندوستان-مصر تعلقات میں آنے والی رفتار پر اطمینان کا اظہار کیا۔ انہوں نے اکتوبر 2025 میں نئی دہلی میں منعقد ہونے والے پہلے ہندوستان-مصر اسٹریٹجک ڈائیلاگ کو بھی سراہا، جس کی مشترکہ صدارت ہندوستان کے وزیر خارجہ اور مصر کے وزیر خارجہ نے کی تھی۔

بات چیت کے دوران 2023 میں دستخط شدہ ہندوستان-مصر اسٹریٹجک شراکت داری معاہدے کے تحت مختلف شعبوں میں ہونے والی پیش رفت کا جائزہ لیا گیا۔ دونوں جانب سے اعلیٰ سطحی سیاسی روابط کے تسلسل کا خیر مقدم کیا گیا اور طے شدہ تمام شعبوں میں دوطرفہ تعلقات کو مزید مضبوط بنانے کے مشترکہ عزم کا اعادہ کیا گیا۔

دونوں فریقوں نے ہندوستان اور مصر کے درمیان تجارت اور سرمایہ کاری کے بڑھتے ہوئے روابط پر بھی تبادلۂ خیال کیا۔ موجودہ دوطرفہ تجارت کا حجم 5 ارب امریکی ڈالر ہونے کا حوالہ دیتے ہوئے، اس میں نمایاں اضافے کے امکانات پر زور دیا گیا۔

دونوں ممالک کے درمیان وسیع کاروبار سے کاروبار روابط کا خیر مقدم کیا گیا اور بتایا گیا کہ مصر میں ہندوستانی سرمایہ کاری 5 ارب امریکی ڈالر تک پہنچ چکی ہے، جبکہ صحت، کھاد، گرین انرجی اور مہمان نوازی کے شعبوں میں مزید تجاویز زیر غور ہیں۔ وزارتِ خارجہ کے مطابق، ہندوستان میں سرمایہ کاری کے مواقع اور کاروبار میں آسانی کو اجاگر کرتے ہوئے مزید مصری سرمایہ کاری کا خیر مقدم کیا گیا۔

بات چیت میں صحت کے شعبے میں تعاون کے فروغ، مضبوط بی ٹو بی روابط اور ویکسینز و ایکٹیو فارماسیوٹیکل اجزاء کے شعبوں میں ہندوستانی کمپنیوں اور مصری شراکت داروں کے درمیان ٹیکنالوجی منتقلی کی شراکت داریوں کی اہمیت پر بھی زور دیا گیا۔ ہندوستان نے ہریانہ میں جاری سورج کنڈ میلہ 2026 میں مصر کی شراکت دار ملک کے طور پر شرکت کا خیر مقدم کیا اور 2025 میں منعقدہ ’’گلمپسز آف انڈیا‘‘ پینٹنگ مقابلے میں 30 ہزار مصری طلبہ کی شرکت کو سراہا۔ بیان کے مطابق، دونوں فریقوں نے ثقافتی اور سیاحتی تبادلوں کو مزید فروغ دینے کے امکانات پر بھی زور دیا۔

دونوں جانب سے باہمی دلچسپی کے اہم علاقائی اور عالمی امور پر بھی خیالات کا تبادلہ کیا گیا اور برکس سمیت مختلف کثیرالجہتی فورمز پر، ہندوستان کی صدارت کے دوران، قریبی تعاون جاری رکھنے پر اتفاق کیا گیا۔ آخر میں، دونوں فریقوں نے باہمی طور پر موزوں تاریخ پر ہندوستان میں خارجہ دفتر مشاورت کے اگلے دور کے انعقاد پر بھی اتفاق کیا۔