نئی دہلی

یہ بات سامنے رکھتے ہوئے کہ ہندوستان کی اصل طاقت خدمات اور ٹیکنالوجی کے شعبے میں رہی ہے، دنیا کے معروف ماہرِ معاشیات ڈینی کوآہ نے بدھ کے روز کہا کہ ملک آرٹیفیشل انٹیلی جنس  کے میدان میں ایک "بڑا معمار" بن کر ابھر سکتا ہے، کیونکہ اس شعبے میں مواقع حقیقتاً "لا محدود" ہیں۔سنگاپور کی نیشنل یونیورسٹی کے لی کوان یو اسکول آف پبلک پالیسی میں اکنامکس کے پروفیسر کوآہ نے یہ بھی کہا کہ ہندوستان، امریکی صدر ڈونلڈ ٹرمپ کی اُن اقتصادی پالیسیوں سے نمٹنے کے لیے ہم خیال ممالک کا اتحاد بنانے میں اہم کردار ادا کر سکتا ہے، جنہیں انہوں نے "رکاوٹ پیدا کرنے والی" پالیسیاں قرار دیا۔

جب ہندوستان کے مستقبل اور اس کی ترجیحات کے بارے میں سوال کیا گیا تو کوآہ نے کہا کہ ملک کو ٹیکنالوجی، اعلیٰ معیار کی خدمات اور انگریزی زبان میں اپنی مہارت سے فائدہ اٹھانا چاہیے۔ انہوں نے کہا، "ٹیکنالوجی، خاص طور پر  اے آئی کے میدان میں مواقع بے حد وسیع ہیں… ہندوستان اس شعبے میں ایک بڑا کھلاڑی بن سکتا ہے۔" ٹرمپ کی جانب سے ہندوستان اور دیگر ممالک پر محصولات (ٹیرف) عائد کرنے کے سوال پر کوآہ نے کہا کہ یہ پالیسیاں اس سوچ سے متاثر ہیں کہ باقی دنیا نے امریکہ کا "فائدہ اٹھایا" ہے اور اب اسے "بدلہ لینا چاہیے"۔ انہوں نے مزید کہا کہ بہت سے غیر جانبدار ماہرین کا ماننا ہے کہ امریکہ نے دراصل گزشتہ آٹھ دہائیوں میں خود بنائے گئے عالمی نظام سے سب سے زیادہ فائدہ اٹھایا ہے۔

انہوں نے نشاندہی کی کہ جہاں امریکہ طویل عرصے سے دیگر طاقتوں کو "نظرثانی پسند" قرار دیتا رہا ہے، وہیں اب خود امریکہ اسی طرح کا رویہ اختیار کرتا دکھائی دے رہا ہے۔ کوآہ کے مطابق، واشنگٹن کے اقدامات سے پیدا ہونے والی غیر یقینی صورتحال کے باعث دیگر بڑی معیشتیں فی الحال "انتظار کرو اور دیکھو" کی حکمت عملی اپنا رہی ہیں۔

کوآہ نے مزید کہا کہ امریکہ کا تحفظ پسندی  کی طرف جھکاؤ کوئی نیا رجحان نہیں، بلکہ اس کی جڑیں اس کی تاریخی روایات میں موجود ہیں، جن کا تعلق الیگزینڈر ہیملٹن اور ابراہام لنکن جیسے رہنماؤں سے ہے۔ انہوں نے کہا کہ گزشتہ آٹھ دہائیوں کا نسبتاً کھلا تجارتی نظام امریکی معاشی تاریخ میں شاید ایک "غیر معمولی مرحلہ" رہا ہو۔ ان کے مطابق، اب اصل سوال یہ ہے کہ آیا امریکہ دوبارہ اپنے پرانے تحفظ پسند اور الگ تھلگ راستے پر لوٹے گا یا یہ سمجھے گا کہ عالمی برادری کا حصہ بن کر ہی وہ زیادہ مضبوط بنتا ہے۔

ہندوستان کو اس صورتحال میں کیا کرنا چاہیے، اس پر کوآہ نے تین ممکنہ حکمت عملیاں پیش کیں—ہم آہنگی، مفاہمت اور حل۔ انہوں نے کہا کہ امریکہ کے ساتھ آنکھ بند کر کے چلنا جیسے بڑے ملک کے لیے مناسب نہیں ہوگا۔ وقتی مفاہمت کچھ گنجائش دے سکتی ہے، لیکن انہوں نے زور دیا کہ کثیر الجہتی اتحاد اور تعاون پر مبنی نظام بنانا ہی زیادہ پائیدار حل ہے۔

انہوں نے کہا کہ ہندوستان اتنا بڑا ہے کہ وہ دوسروں کے ساتھ مل کر ایسی عالمی حکمت عملی تیار کر سکتا ہے جو اس کے اپنے مفادات کے لیے بھی فائدہ مند ہو۔" ان کے مطابق نئی دہلی "خواہش مند ممالک کے اتحاد" کے ذریعے ایک متوازن عالمی نظام قائم کرنے میں اہم کردار ادا کر سکتا ہے۔