کولکتہ

پیر کو ہونے والے انڈیا بلاک کے اجلاس سے قبل مغربی بنگال کے وزیر دلیپ گھوش نے اتحاد کو "غیر موجود" قرار دیتے ہوئے کہا کہ کانگریس اور ترنمول کانگریس  کے درمیان اختلافات واضح ہیں۔کولکتہ میں صحافیوں سے گفتگو کرتے ہوئے دلیپ گھوش نے کہا کہ سابق وزیر اعلیٰ مغربی بنگال ممتا بنرجی اب انڈیا بلاک کے اجلاس میں شرکت کرنے پر "مجبور" ہیں، کیونکہ ان کے مطابق ترنمول کانگریس اقتدار سے باہر ہونے کے بعد کمزور ہو چکی ہے اور اسمبلی انتخابات میں شکست کا سامنا کر چکی ہے۔

بی جے پی رہنما نے کہا کہ یہ اتحاد عملاً موجود ہی نہیں ہے۔ ممتا بنرجی پہلے کبھی اس کے اجلاسوں میں شریک نہیں ہوتی تھیں، لیکن اب انہیں آنا پڑ رہا ہے۔ ان کی اپنی جماعت کے ارکان اسمبلی اور ارکان پارلیمنٹ بھی ان کے ساتھ نہیں ہیں۔ نہ کوئی ایم ایل اے، نہ ایم پی اور نہ ہی کونسلر متحرک نظر آتے ہیں۔ وہ اپنے دفاتر تک نہیں جاتے۔ اقتدار سے ہٹتے ہی ٹی ایم سی کی یہ حالت ہو گئی ہے۔

مغربی بنگال بی جے پی نے بھی انڈیا بلاک کی جماعتوں کے درمیان اتحاد پر سوال اٹھاتے ہوئے کہا کہ ریاست میں ترنمول کانگریس اور کانگریس ایک دوسرے کے خلاف انتخابی میدان میں تھیں۔اتوار کو مغربی بنگال بی جے پی کے صدر سمیک بھٹاچاریہ نے بھی اپوزیشن اتحاد کو تنقید کا نشانہ بناتے ہوئے اس کے اندرونی تضادات کو "مضحکہ خیز" قرار دیا۔

اے این آئی سے گفتگو میں انہوں نے کہا کہ یہ ایک ہنسنے والی بات ہے۔ کیا آپ نے آج تک سنا ہے کہ انڈیا اتحاد کی تمام جماعتیں ایک مشترکہ پریس کانفرنس کر رہی ہوں؟ مغربی بنگال میں ممتا بنرجی نے کھل کر کانگریس کے خلاف الیکشن لڑا۔ پھر انڈیا اتحاد کہاں ہے؟

انڈیا بلاک کے رہنماؤں کا اجلاس آج نئی دہلی میں منعقد ہونا ہے۔ ممتا بنرجی اتوار کو اس اجلاس میں شرکت کے لیے دہلی روانہ ہوئیں۔ اس موقع پر ترنمول کانگریس کے رہنما دولا سین اور کلیان بنرجی بھی کولکتہ ہوائی اڈے پر موجود تھے۔یہ اجلاس ترنمول کانگریس کی مغربی بنگال اسمبلی انتخابات میں بی جے پی کے ہاتھوں شکست کے بعد انڈیا بلاک کا پہلا بڑا اجلاس ہوگا۔

دوسری جانب کانگریس کا مؤقف ہے کہ مرکزی حکومت کی پالیسیوں کی نظریاتی مخالفت کے معاملے میں اتحاد اب بھی متحد ہے، تاہم مختلف جماعتوں کے درمیان اختلافات بھی کھل کر سامنے آ رہے ہیں۔

خاص طور پر دراوڑ منیترا کڑگم  کی اجلاس میں عدم شرکت اور اندرونی تنازعات نے اتحاد کے مستقبل پر سوالات کھڑے کر دیے ہیں۔ڈی ایم کے، جو طویل عرصے سے کانگریس کی اتحادی رہی ہے، نے تمل ناڈو میں مبینہ "دھوکے" کے باعث اجلاس میں شرکت نہ کرنے کا فیصلہ کیا ہے۔ پارٹی کا الزام ہے کہ کانگریس نے انتخابات کے بعد کی سیاست میں تملگا ویتری کڑگم  کی حمایت کی، جس کی قیادت وجے کر رہے ہیں۔

کانگریس کے سینئر رہنما جئے رام رمیش کے مطابق نئی دہلی کے کانسٹی ٹیوشن کلب میں ہونے والے اجلاس میں 23 سیاسی جماعتیں شریک ہوں گی۔جئے رام رمیش نے کہا کہ جو جماعتیں اجلاس میں شریک نہیں ہو رہیں، انہوں نے بھی مرکزی حکومت کی "پالیسیوں اور اقدامات" کی مخالفت کا پیغام دیا ہے۔

انہوں نے ایکس پر جاری بیان میں کہا کہ ان جماعتوں نے مودی حکومت کی ان پالیسیوں اور اقدامات کی سخت مخالفت کی ہے جو لاکھوں ہندوستانیوں کو حقِ رائے دہی سے محروم کر رہے ہیں، آئین پر مسلسل حملے کر رہے ہیں، تحقیقاتی اداروں کے ذریعے اپوزیشن رہنماؤں کو نشانہ بنا رہے ہیں، کروڑوں لوگوں کے روزگار کو متاثر کر رہے ہیں، مسلسل مہنگائی کے ذریعے گھریلو بجٹ کو نقصان پہنچا رہے ہیں، لاکھوں نوجوانوں کی امیدوں کو توڑ رہے ہیں، سرمایہ کاری کے ماحول کو کمزور کر رہے ہیں اور اپنی خارجہ پالیسی کے ذریعے قومی مفادات کو نقصان پہنچا رہے ہیں۔

انہوں نے مزید کہا کہ جس طرح ہندوستان اپنی گوناگوں خصوصیات کے باوجود متحد ہے، اسی طرح انڈیا جن بندھن بھی اپنے تنوع کے ساتھ متحد ہے۔