نئی دہلی
ہندوستان اور وینزویلا نے جمعرات کو اعلیٰ سطحی مذاکرات کے دوران دوطرفہ تعاون کو مزید مضبوط بنانے پر اتفاق کیا، جس میں توانائی کے تحفظ اور مختلف معاشی شعبوں میں شراکت داری کے فروغ پر خصوصی توجہ دی گئی۔وینزویلا کی قائم مقام صدر ڈیلسی روڈریگز کے دورۂ ہندوستان کے حوالے سے وزارتِ خارجہ کی خصوصی بریفنگ میں مشرقی امور کے سیکریٹری رودرندر ٹنڈن نے بتایا کہ وینزویلا کی رہنما ایک بڑے وزارتی وفد کے ساتھ ہندوستان آئی ہیں اور انہوں نے وزیرِ اعظم نریندر مودی کے ساتھ باضابطہ مذاکرات کیے، جن میں ایک ورکنگ لنچ بھی شامل تھا۔
ٹنڈن نے کہا کہ موجودہ مہینے میں وینزویلا خام تیل فراہم کرنے والے بڑے ممالک میں شامل ہو چکا ہے اور دونوں ممالک کے درمیان بات چیت کا بنیادی مرکز توانائی کے شعبے میں شراکت داری کو فروغ دینا تھا۔ انہوں نے کہا کہ توانائی کے شعبے میں بالائی (اپ اسٹریم) اور زیریں (ڈاؤن اسٹریم) دونوں سطحوں پر تعاون کے وسیع امکانات موجود ہیں۔ وینزویلا، ہندوستان کو ایک مستحکم اور طویل مدتی شراکت دار کے طور پر دیکھتا ہے، جو مستقبل میں مسلسل تعاون کی بنیاد بن سکتا ہے۔
انہوں نے مزید کہا کہ وینزویلا ایک وسیع اور قدرتی وسائل سے مالا مال ملک ہے جو پائیدار اقتصادی ترقی کی جانب بڑھ رہا ہے۔ اس تناظر میں توانائی کے علاوہ کان کنی، مویشی پروری، نقل و حمل، زرعی آلات، آٹو موبائل اور دواسازی کے شعبوں میں بھی بڑی سرمایہ کاری اور تعاون کے مواقع موجود ہیں۔ مذاکرات میں اس بات پر بھی غور کیا گیا کہ ہندوستانی کمپنیاں ان شعبوں میں کس طرح مؤثر انداز میں داخل ہو سکتی ہیں اور نئی شراکت داریاں قائم کر سکتی ہیں۔
رودرندر ٹنڈن نے مذاکرات کو "انتہائی سنجیدہ اور نتیجہ خیز" قرار دیتے ہوئے کہا کہ دونوں وفود کے درمیان دوستانہ ماحول پایا گیا۔ انہوں نے بتایا کہ وینزویلا کی قیادت نے اس بات کا اعتراف کیا کہ ہندوستان نے اچھے اور مشکل دونوں اوقات میں وینزویلا کا ساتھ دیا ہے۔وزارتِ خارجہ کے مطابق وینزویلا مستقبل میں بھی ہندوستان کو اپنا ترجیحی شراکت دار سمجھتا ہے، جو دونوں ممالک کے تعلقات میں تسلسل اور مضبوطی کی عکاسی کرتا ہے۔
اس سے قبل وزیرِ اعظم نریندر مودی اور قائم مقام صدر ڈیلسی روڈریگز کے درمیان وسیع پیمانے پر مذاکرات ہوئے، جن میں توانائی، تجارت، سرمایہ کاری، صحت، آٹو موبائل اور دیگر اہم شعبوں میں تعاون کے نئے امکانات کا جائزہ لیا گیا۔ دونوں رہنماؤں نے عالمی جنوب (گلوبل ساؤتھ) کے مفادات کے فروغ کے لیے مل کر کام کرنے کے عزم کا بھی اعادہ کیا۔
وزارتِ خارجہ کے ترجمان رندھیر جیسوال کے مطابق ملاقات کے دوران دونوں رہنماؤں نے دوطرفہ تعلقات کے تمام پہلوؤں کا جائزہ لیا اور توانائی، تجارت، سرمایہ کاری، صحت اور آٹو موبائل سمیت مختلف شعبوں میں تعاون بڑھانے کے امکانات پر تبادلۂ خیال کیا۔ انہوں نے بتایا کہ دونوں فریقوں نے علاقائی اور عالمی امور پر بھی اپنے خیالات کا تبادلہ کیا۔
دونوں ممالک نے اس بات پر اتفاق کیا کہ دوطرفہ شراکت داری کو مزید گہرا کیا جائے گا اور عالمی جنوب کے مشترکہ مفادات کے تحفظ اور فروغ کے لیے تعاون کو مزید وسعت دی جائے گی۔
