نئی دہلی :امریکا کے سفیر سرجیو گور جمعہ کے روز بھارت واپس پہنچے اور کہا کہ دونوں ممالک کے لیے شاندار مواقع سامنے ہیں۔ انہوں نے سوشل میڈیا پلیٹ فارم ایکس پر اپنے پیغام میں کہا کہ بھارت واپس آ کر خوشی ہوئی اور ہمارے دونوں ممالک کے لیے غیر معمولی مواقع آگے موجود ہیں۔

سرجیو گور کو نومبر میں وائٹ ہاؤس میں امریکا کے سفیر برائے بھارت کی حیثیت سے حلف دلایا گیا تھا۔ اس سے قبل اکتوبر میں انہوں نے بھارت کا دورہ کیا تھا جہاں انہوں نے وزیر اعظم نریندر مودی وزیر خارجہ ایس جے شنکر اور قومی سلامتی کے مشیر اجیت ڈو بھال سے ملاقات کی تھی۔

🇺🇸🇮🇳 New US Ambassador to India Sergio Gor arrives in New Delhi, set to take charge amid a sensitive phase in India–US relations. pic.twitter.com/ilvGnVsoUo

— India First Post (@ifpost47) January 9, 2026

حلف برداری کے بعد امریکی صدر ڈونلڈ ٹرمپ نے کہا تھا کہ وہ سرجیو گور کو نئی دہلی کے ساتھ اسٹریٹجک اقتصادی اور سلامتی تعلقات کو مزید مضبوط بنانے کی ذمہ داری سونپ رہے ہیں اور وزیر اعظم نریندر مودی کے ساتھ امریکا کے شاندار تعلقات کو مزید گہرا کرنا چاہتے ہیں۔

صدر ٹرمپ نے کہا کہ بھارت دنیا کی قدیم ترین تہذیبوں میں سے ایک کا حامل ہے دنیا کا بڑا ملک ہے اور اس کی آبادی 1.5 بلین سے زیادہ ہے۔ انہوں نے مزید کہا کہ وزیر اعظم مودی کے ساتھ امریکا کے بہترین تعلقات ہیں اور سرجیو گور نے ان تعلقات کو مزید بہتر کیا ہے۔

حلف اٹھانے کے بعد سرجیو گور نے صدر ٹرمپ کا شکریہ ادا کیا اور کہا کہ وہ دونوں ممالک کے درمیان تعلقات کو مزید فروغ دینے کے خواہاں ہیں اور اس ذمہ داری کو احسن طریقے سے نبھائیں گے۔

اگست میں صدر ٹرمپ نے سرجیو گور کو بھارت کے لیے اگلا سفیر اور جنوبی و وسطی ایشیا کے لیے خصوصی ایلچی نامزد کیا تھا۔ ستمبر میں سینیٹ کی خارجہ امور کمیٹی کے سامنے اپنے بیان میں انہوں نے کہا تھا کہ بھارت امریکا کے لیے دنیا کے اہم ترین تعلقات میں سے ایک ہے۔