نئی دہلی: ہندوستان کے چیف جسٹس (CJI) پر مبینہ حملے کی کوشش کے معاملے پر آل انڈیا مجلس اتحاد المسلمین (AIMIM) کے سربراہ اسد الدین اویسی نے وزیراعظم نریندر مودی اور ان کی حکومت پر سخت تنقید کی ہے۔ اسد الدین اویسی نے وکیل راکیش کشور کی جانب سے چیف جسٹس بی آر گوئی پر کیے گئے مبینہ حملے کے سلسلے میں حکومت پر الزام عائد کیا ہے کہ وہ مذہب کی بنیاد پر جانبداری کا مظاہرہ کر رہی ہے اور ملزم کے خلاف سخت کارروائی نہیں کر رہی۔

حیدرآباد سے رکنِ پارلیمان اسد الدین اویسی نے کہا:“اگر اُس (جوتا پھینکنے کی کوشش کرنے والے وکیل) کا نام راکیش کشور نہ ہوتا بلکہ اسد ہوتا، تو پولیس کیا کرتی؟ بھارتیہ جنتا پارٹی کے لوگ کہتے، ‘اسے اٹھالو!’، ‘یہ پڑوسی ملک سے آیا ہے!’، ‘یہ پاکستانی خفیہ ایجنسی آئی ایس آئی کا آدمی ہے!’ — پھر اُس پر ہر طرف سے حملہ کیا جاتا۔”اویسی نے یہ بات ایک عوامی جلسے سے خطاب کرتے ہوئے کہی، جسے انہوں نے اپنے ایکس (X) ہینڈل پر بھی شیئر کیا۔

انہوں نے وکیل راکیش کشور کے مبینہ حملے کے معاملے میں دہلی پولیس اور مرکزی حکومت پر مذہبی شناخت کی بنیاد پر دوہرا رویہ اختیار کرنے کا الزام لگایا۔انہوں نے اس واقعے کا موازنہ حال ہی میں اتر پردیش کے ضلع بریلی میں پیش آئے ایک واقعے سے کیا۔

اویسی نے کہا:“جب مسلم برادری نے ‘آئی لو محمد’ کے بینر ہٹائے جانے کے خلاف احتجاج کیا تھا، تو یوپی پولیس نے فوراً کارروائی کی تھی، لیکن راکیش کشور کے معاملے میں ایسا نہیں ہوا۔ راکیش کشور نے چیف جسٹس بی آر گوئی کے خلاف اپنی شکایت میں بریلی کا ذکر کرتے ہوئے کہا تھا کہ چیف جسٹس اور سپریم کورٹ کو یوگی آدتیہ ناتھ کی بلڈوزر انصاف کی پالیسی پر تنقید نہیں کرنی چاہیے تھی۔”