لکھنؤ: سماجوادی پارٹی (ایس پی) کے صدر اور اترپردیش کے سابق وزیر اعلیٰ اکھلیش یادو نے حکمراں بھارتیہ جنتا پارٹی (بی جے پی) پر الزام لگایا ہے کہ وہ زبان کے ساتھ ساتھ اپنے عمل سے بھی فرقہ وارانہ سیاست کر رہی ہے۔ انہوں نے پیر کو کہا کہ ریاستی اسمبلی انتخابات کے بعد اگر ایس پی کی حکومت بنتی ہے تو ریاست میں پیدا کیے جا رہے فرقہ وارانہ ماحول کو ’’ہمیشہ ہمیشہ‘‘ کے لیے ختم کیا جائے گا۔ لکھنؤ میں پارٹی کے ریاستی ہیڈکوارٹر میں منعقدہ پریس کانفرنس سے خطاب کرتے ہوئے یادو نے کہا کہ بی جے پی نہ آئین کو مانتی ہے اور نہ قانون کو۔ انہوں نے کہا کہ ہر محاذ پر ناکام ثابت ہو چکی بی جے پی حکومت بنیادی مسائل اور سماجی انصاف کے سوال پر کام نہیں کرنا چاہتی۔

ان کے مطابق اب جب بی جے پی کے پاس کوئی راستہ نہیں بچا تو وہ تقریروں کے ساتھ ساتھ اپنے عمل میں بھی فرقہ وارانہ ہو گئی ہے۔ سہارنپور میں حال ہی میں 100 سال سے زیادہ پرانی مسجد گرائے جانے سے متعلق سوال پر ایس پی صدر نے کہا، ’’جب انصاف مل سکتا تھا اور انصاف کے لیے ہائی کورٹ اور سپریم کورٹ موجود ہیں تو 13 گھنٹے میں مسجد گرانے کی کیا ضرورت تھی؟ یہ ایک سوچی سمجھی حکمت عملی اور سازش ہے، جس کے تحت حکومت کے لوگ اپنے افسران کے ذریعے پورے اترپردیش کو فرقہ وارانہ راستے پر لے جانا چاہتے ہیں۔‘‘

انہوں نے کسی کا نام لیے بغیر کہا کہ جو لوگ آج قانون کو نہیں مان رہے ہیں، وہ کل قانون کو مانیں گے۔ اکھلیش یادو نے کہا، ’’جو فرقہ وارانہ ماحول بنایا جا رہا ہے، اسے ہمیشہ ہمیشہ کے لیے ختم کیا جائے گا۔ ہم برادرانہ معاشرہ بنانے کے لیے کام کریں گے۔ بھائی چارہ کیسے بڑھے، اس کے لیے کام کریں گے اور آنے والے وقت میں تمام مذاہب کا احترام یقینی بنایا جائے گا۔‘‘ سابق وزیر اعلیٰ نے پارٹی کارکنوں سے اپیل کی کہ انتخابی فائدے کے لیے پہلے زبان اور اب عمل کے ذریعے فرقہ واریت پھیلانے والی بی جے پی سے ہوشیار رہیں اور آنے والے وقت میں ایسی فرقہ وارانہ طاقتوں کو شکست دیں۔

انہوں نے کہا کہ اسمبلی انتخابات میں اب 100 دن بھی باقی نہیں رہ گئے ہیں۔ ایس پی صدر نے ایک بار پھر ذات کی بنیاد پر مردم شماری کرانے اور تمام طبقات کو ان کی آبادی کے تناسب سے حصہ دینے کا مطالبہ کیا۔ انہوں نے ریزرویشن کی بھی حمایت کی اور کہا، ’’ریزرویشن تھا، ریزرویشن ہے اور ریزرویشن برقرار رہے گا۔ جو لوگ سازش کرکے سرنگ میں رہ کر کام کر رہے ہیں، ان کی سرنگی سوچ کو چیلنج کیا جائے گا۔‘‘ اکھلیش نے الزام لگایا کہ پی ڈی اے کو سب سے زیادہ ناانصافی کا سامنا کرنا پڑا ہے۔ پی ڈی اے سے مراد پسماندہ، دلت اور اقلیتی طبقات کے حوالے سے ایس پی کی انتخابی حکمت عملی ہے۔

انہوں نے کہا کہ پی ڈی اے کے لوگ ’’پیڑا‘‘ یعنی تکلیف کے رشتے سے جڑے ہوئے ہیں اور مل کر ایس پی کی حکومت بنائیں گے اور سماجی انصاف پر مبنی ریاست قائم کریں گے۔ اسی لیے مخالفین کو ’’پیٹ میں درد‘‘ ہو رہا ہے۔ اکھلیش یادو نے اعلان کیا کہ اسمبلی انتخابات کے بعد ریاست میں ایس پی کی حکومت بنتی ہے تو سمراٹ اشوک جینتی پر سرکاری چھٹی کا اعلان کیا جائے گا اور ریور فرنٹ پر بابو جگدیش کشواہا کی یادگار تعمیر کرائی جائے گی۔ ایودھیا میں رام ون گمن راستے کے مبینہ ناقص معیار سے متعلق سوال پر انہوں نے کہا، ’’جتنے بھی ہائی وے بنائے گئے ہیں، انہیں اسی لیے بنایا گیا ہے تاکہ بی جے پی کے لوگوں کی جیبیں بھر سکیں۔‘

‘ وزیر اعظم کے پارلیمانی حلقے وارانسی اور اترپردیش کے وزیر اعلیٰ یوگی آدتیہ ناتھ کی سیاسی سرگرمیوں کے مرکز گورکھپور کو بالترتیب کیوٹو اور اسپین بنانے کے دعووں پر طنز کرتے ہوئے یادو نے الزام لگایا کہ وارانسی، گورکھپور اور پریاگ راج میں ترقیاتی کاموں کے نام پر گزشتہ 10 برسوں میں حکومت نے تین لاکھ کروڑ روپے خرچ کیے ہیں، لیکن ان شہروں کے حالات مزید خراب ہو گئے ہیں۔