نئی دہلی
چین نے امریکہ پر زور دیا ہے کہ وہ تائیوان سے متعلق معاملات کو انتہائی احتیاط کے ساتھ سنبھالے، کیونکہ اس کے دور رس اثرات مرتب ہو سکتے ہیں۔ہندوستان میں چین کے سفیر شو فی ہونگ نے کہا کہ چینی وزیر خارجہ وانگ ای نے امریکی وزیر خارجہ مارکو روبیو کے ساتھ ٹیلیفونک گفتگو کے دوران اس بات پر زور دیا کہ چین اور امریکہ کو رکاوٹوں کو دور کرتے ہوئے، مشکلات پر قابو پا کر اور درست سمت میں آگے بڑھتے ہوئے ایک تعمیری اور اسٹریٹجک استحکام پر مبنی دوطرفہ تعلقات قائم کرنے چاہئیں۔
شو فی ہونگ نے سوشل میڈیا پلیٹ فارم "ایکس" پر ایک پوسٹ میں کہا، "چینی وزیر خارجہ وانگ ای نے امریکی وزیر خارجہ مارکو روبیو سے ٹیلیفون پر گفتگو کی۔ وانگ ای نے کہا کہ چین اور امریکہ کو رکاوٹیں دور کرنی ہوں گی، مسائل پر قابو پانا ہوگا اور اسٹریٹجک استحکام پر مبنی تعمیری دوطرفہ تعلقات کی درست راہ پر مضبوطی سے قائم رہنا ہوگا۔"
انہوں نے مزید کہا کہ دونوں ممالک کو ہمیشہ مساوات، احترام اور باہمی مفاد کے اصولوں کو برقرار رکھنا چاہیے اور دونوں سربراہان مملکت کے درمیان طے پانے والے اہم اتفاق رائے کو عملی پالیسیوں اور اقدامات میں تبدیل کرنا چاہیے۔ دونوں فریقوں کو تعاون کے شعبوں میں اضافہ اور اختلافات کی فہرست کو کم کرنے کے ساتھ ساتھ ہر قسم کے خطرات کا مؤثر انتظام کرنا ہوگا۔ تائیوان کا مسئلہ انتہائی دور رس اثرات کا حامل ہے، اس لیے امید کی جاتی ہے کہ امریکہ اس معاملے کو انتہائی احتیاط سے نمٹائے گا۔
دوسری جانب، امریکی محکمہ خارجہ کے ترجمان ٹومی پگوٹ نے ایک بیان میں کہا کہ امریکی وزیر خارجہ مارکو روبیو نے چینی کمیونسٹ پارٹی کی مرکزی خارجہ امور کمیٹی کے دفتر کے ڈائریکٹر اور وزیر خارجہ وانگ ای سے گفتگو کی۔بیان کے مطابق، "وزیر خارجہ روبیو نے صدر ٹرمپ کے وژن کے مطابق انصاف اور باہمی تعاون پر مبنی اسٹریٹجک استحکام کے حامل تعمیری تعلقات کی اہمیت پر زور دیا۔
ادھر، تائیوان میں امریکہ کے غیر سرکاری سفیر اور امریکن انسٹی ٹیوٹ اِن تائیوان کے ڈائریکٹر ریمنڈ گرین نے جمعرات کو وسطی شہر تائی چُنگ میں ڈرونز سے متعلق ایک فورم سے خطاب کرتے ہوئے کہا کہ تائیوان کو تنازعات کی روک تھام اور اپنی سلامتی کو یقینی بنانے کے لیے "بھڑوں کے چھتے" جیسا ڈرون نظام تیار کرنے کی ضرورت ہے۔
الجزیرہ کی رپورٹ کے مطابق، ریمنڈ گرین نے کہا کہ ڈرون ٹیکنالوجی تائیوان کی سلامتی کو مضبوط بنانے اور خطے میں امن و استحکام کو برقرار رکھنے کے لیے ایک "انقلابی موقع" فراہم کرتی ہے۔
