شملہ: بھارتی فوج نے بدھ کے روز ہماچل پردیش کے ضلع سولن میں کساولی کے مغربی ڈھلوانی علاقوں گلبرٹ ٹریل اور اپر مال میں لگی ایک بڑی جنگلاتی آگ پر کامیابی کے ساتھ قابو پالیا۔ حکام نے یہ معلومات دی۔ آگ منگل کی دوپہر تقریباً 3 بجے بھڑکی تھی اور تیزی سے گھنے جنگلاتی پہاڑی علاقوں میں پھیل گئی۔
ابتدائی طور پر محکمہ جنگلات، فائر سروس اور مقامی لوگوں کی جانب سے آگ بجھانے کی کوششیں کی گئیں، لیکن صورتحال قابو میں نہیں آسکی۔ اس کے بعد فوج کی کساولی بریگیڈ نے بھارتی فضائیہ، کساولی اور چندی گڑھ کی سول انتظامیہ اور دیگر مقامی اداروں کے تعاون سے ایک بڑے پیمانے پر مشترکہ فائر فائٹنگ آپریشن شروع کیا۔
یہ آپریشن 15 گھنٹوں سے زیادہ وقت تک جاری رہا، جس میں زمینی اور فضائی دونوں سطحوں پر آگ بجھانے کے اقدامات کیے گئے۔ فوجی جوانوں نے فائر بریگیڈ کی گاڑیوں اور پانی لے جانے والی گاڑیوں کے ساتھ مل کر فائر بریکس تیار کیے، حساس علاقوں کو الگ کیا اور آگ کے پھیلاؤ کو روکنے کے لیے مختلف مقامات پر شعلوں کو بجھایا۔
بھارتی فضائیہ کے ہیلی کاپٹروں نے کئی مرتبہ “بامبی بکٹ” مشن انجام دیے اور چندی گڑھ کی سکھنا جھیل سے پانی لے جا کر ان جنگلاتی علاقوں میں آگ بجھائی جہاں پہنچنا مشکل تھا۔ حکام کے مطابق، مشترکہ کوششوں کے نتیجے میں گلبرٹ ہل اور اپر مال سمیت متاثرہ اہم علاقوں میں آگ پر بڑی حد تک قابو پالیا گیا، جبکہ آگ کو مزید حساس جنگلاتی علاقوں تک پہنچنے سے بھی روک دیا گیا۔ مشکل جغرافیائی حالات اور طویل آپریشن کے باوجود اس مہم میں شامل کسی بھی اہلکار کے زخمی یا ہلاک ہونے کی اطلاع نہیں ملی۔
