نئی دہلی: بھارت نے پاکستان کے شہر فاروق آباد میں واقع 125 سالہ تاریخی گردوارہ شری گرو سنگھ سبھا صاحب کی مبینہ مسماری کی اطلاعات پر شدید ردعمل ظاہر کرتے ہوئے اسے ایک مقدس سکھ عبادت گاہ کے خلاف "انتہائی قابلِ مذمت اور دانستہ تخریب کاری" قرار دیا ہے۔بھارتی وزارتِ خارجہ کے ترجمان رندھیر جیسوال نے میڈیا سے گفتگو میں کہا کہ نئی دہلی اس تاریخی گردوارے کی مبینہ مسماری اور پاکستانی حکام کی مبینہ بے عملی کی خبروں پر گہری تشویش رکھتا ہے۔

انہوں نے اپنے بیان میں کہا، "ہم پاکستان کے فاروق آباد میں واقع 125 سالہ مقدس گردوارہ شری گرو سنگھ سبھا صاحب کی مسماری کی انتہائی افسوسناک اطلاعات دیکھ کر شدید رنجیدہ ہیں۔ ہم اس قابلِ احترام سکھ عبادت گاہ کے خلاف اس انتہائی قابلِ مذمت اور دانستہ تخریب کاری کی سخت مذمت کرتے ہیں۔"

وزارتِ خارجہ نے کہا کہ گردوارے کی تباہی اور مقامی انتظامیہ یا ایویکیو ٹرسٹ پراپرٹی بورڈ (ETPB) کی جانب سے مؤثر کارروائی نہ کیے جانے کی اطلاعات انتہائی تشویشناک ہیں۔

بھارت نے مزید کہا کہ یہ کوئی الگ تھلگ واقعہ نہیں بلکہ پاکستان میں مذہبی اقلیتوں اور ان کی عبادت گاہوں کو نشانہ بنانے کے واقعات مسلسل سامنے آ رہے ہیں۔

بیان میں کہا گیا، "بدقسمتی سے یہ پہلا واقعہ نہیں ہے۔ پاکستان میں مذہبی اقلیتوں اور ان کی عبادت گاہوں کو منظم انداز میں نشانہ بنانے کا سلسلہ جاری ہے۔"

بھارت نے حکومتِ پاکستان سے مطالبہ کیا کہ اس واقعے کی فوری اور شفاف تحقیقات کرائی جائیں، ذمہ دار افراد کو قانون کے کٹہرے میں لایا جائے اور گردوارے کے منہدم حصوں کی جلد از جلد بحالی اور تعمیر نو کو یقینی بنایا جائے۔

بھارتی وزارتِ خارجہ نے اپنے بیان میں یہ بھی کہا کہ پاکستان اپنی ذمہ داری ادا کرتے ہوئے مذہبی اقلیتوں کی جان و مال، عبادت گاہوں کے تحفظ اور ان کی فلاح و بہبود کو یقینی بنائے، نیز ملک میں فرقہ وارانہ تشدد اور مذہبی عدم برداشت کے ماحول کے خاتمے کے لیے مؤثر اقدامات کرے۔