نئی دہلی: دہلی ہائی کورٹ نے بدھ کے روز مرکز سے دو درخواستوں پر اپنا مؤقف واضح کرنے کو کہا ہے، جن میں ٹرانسجینڈر افراد (حقوق کے تحفظ) ترمیمی بل، 2026 کی ان دفعات کو چیلنج کیا گیا ہے جو کسی شخص کے اپنی صنفی شناخت کے خود تعین کے حق کو ختم کرتی ہیں۔

چیف جسٹس ڈی کے اپادھیائے اور جسٹس تیجس کاریا کی بنچ نے چندریش جین اور لکشے جین کی درخواستوں پر نوٹس جاری کرتے ہوئے مرکز کو چھ ہفتوں کے اندر جواب داخل کرنے کی ہدایت دی۔ یہ بل پارلیمنٹ نے 25 مارچ کو منظور کیا تھا اور 30 مارچ کو صدر دروپدی مرمو نے اس پر دستخط کر دیے تھے۔

درخواست گزار چندریش جین نے کہا کہ یہ قانون صنفی شناخت کے خود تعین کو ’’ختم اور کمزور‘‘ کرتا ہے اور اس کے بجائے ریاست کے زیرِ کنٹرول تصدیق، توثیق اور ’اسکریننگ‘ کا نظام نافذ کرتا ہے، جو آئین کے آرٹیکل 21 کے تحت وقار، رازداری اور خود مختاری کے حقوق کی خلاف ورزی ہے۔ درخواست میں کہا گیا ہے کہ ترمیمی قانون واضح طور پر من مانی اور غیر معقول ہے اور صنفی شناخت کے اظہار پر پابندی لگا کر آرٹیکل 19(1)(اے) کی بھی خلاف ورزی کرتا ہے۔

لکشے جین کی درخواست میں کہا گیا ہے کہ اس ترمیمی قانون نے صنفی شناخت کے خود تعین کو طبی اور انتظامی تصدیق کے نظام سے بدل دیا ہے، جس میں ضلع مجسٹریٹ (ڈی ایم) کی جانچ بھی شامل ہے۔ درخواست میں کہا گیا ہے کہ ایسی شرط واضح طور پر سپریم کورٹ کے فیصلے ‘نیشنل لیگل سروسز اتھارٹی بنام یونین آف انڈیا’ کے خلاف ہے، جس میں یہ تسلیم کیا گیا تھا کہ صنفی شناخت خود شناخت کا معاملہ ہے اور نفسیاتی شناخت کو حیاتیاتی خصوصیات پر ترجیح دی جانی چاہیے۔

چندریش جین کی درخواست میں اس بات پر زور دیا گیا کہ سپریم کورٹ پہلے ہی قرار دے چکی ہے کہ صنفی شناخت آئین کے آرٹیکل 14، 19(1)(اے) اور 21 کے تحت وقار، خود مختاری اور شخصی آزادی کا لازمی حصہ ہے اور ہر فرد کو اپنی صنفی شناخت کے خود تعین کا حق حاصل ہے۔ اس معاملے کی اگلی سماعت 22 جولائی کو ہوگی۔