نئی دہلی: محکمۂ موسمیات کی جانب سے شدید بارش کے لیے جاری کیے گئے ریڈ الرٹ کے پیش نظر کانگڑا، منڈی، سرمور اضلاع اور ضلع شملہ کی تھیوگ سب ڈویژن کے تمام تعلیمی ادارے منگل کو بند کر دیے گئے۔

محکمۂ موسمیات نے منگل کے روز چمبا، کانگڑا، کلو، منڈی اور سرمور اضلاع میں شدید سے انتہائی شدید بارش کی پیش گوئی کی ہے۔ ساتھ ہی ریاست کے بعض آبی ذخائر کے علاقوں میں اچانک سیلاب آنے کا بھی خدشہ ظاہر کیا گیا ہے۔ محکمے کے مطابق، ایک دن میں 115.6 ملی میٹر سے 204.5 ملی میٹر تک بارش کو بہت شدید جبکہ 204.5 ملی میٹر سے زیادہ بارش کو انتہائی شدید بارش قرار دیا جاتا ہے۔

ریاستی ایمرجنسی آپریشن سینٹر (SEOC) کے مطابق، پیر کی شام ہونے والی بارش کے بعد ہماچل پردیش میں مجموعی طور پر 36 سڑکیں بند ہو گئی ہیں، جن میں ضلع منڈی کی 11 اور چمبا کی 10 سڑکیں شامل ہیں۔ اس کے علاوہ 43 آبی فراہمی کی اسکیمیں اور پانچ بجلی کے ٹرانسفارمر بھی متاثر ہوئے ہیں۔