ترواننت پورم: کیرالہ کے مختلف حصوں میں ہفتہ کے روز تیز ہواؤں کے ساتھ موسلادھار بارش ہوئی، جس کے باعث کئی دریاؤں اور ڈیموں میں پانی کی سطح بڑھ گئی، نشیبی علاقے زیرِ آب آ گئے اور املاک کو نقصان پہنچا۔ صورتحال کے پیش نظر انتظامیہ نے الرٹ جاری کرتے ہوئے احتیاطی اقدامات کی ہدایت دی ہے۔

پالکڑ ضلع میں شدید بارش کے باعث دو گھروں کی چاردیواری گر گئی، جبکہ کوژیکوڈ کے شمالی اور پہاڑی علاقوں میں بھی زبردست بارش ریکارڈ کی گئی۔ ادکّی ضلع میں ڈیم کے آبی ذخیرے میں پانی کی سطح بڑھنے پر احتیاطاً پامبلا ڈیم کے دروازے کھول دیے گئے۔ حکام نے دریائے پریار کے دونوں کناروں پر رہنے والے لوگوں کو چوکس رہنے کی ہدایت دی ہے اور متعلقہ افسران کو تمام حفاظتی اقدامات یقینی بنانے کا حکم دیا ہے۔

ریاستی ڈیزاسٹر مینجمنٹ اتھارٹی نے خبردار کیا ہے کہ پٹھانم تھٹا، الاپّوزا، کوٹایم، ادکّی، تریشور، پالکڑ، کوژیکوڈ، کنّور اور کساراگوڈ اضلاع میں 40 کلومیٹر فی گھنٹہ تک کی رفتار سے چلنے والی ہواؤں کے ساتھ درمیانی سے شدید بارش کا امکان ہے۔

اتھارٹی کے مطابق شدید بارش کے باعث اہم سڑکوں پر پانی جمع ہو سکتا ہے، حدِ نگاہ متاثر ہو سکتی ہے، نشیبی علاقوں اور دریاؤں کے کناروں پر سیلاب آ سکتا ہے، درخت اکھڑنے سے بجلی کی فراہمی متاثر ہو سکتی ہے، گھروں اور جھونپڑیوں کو جزوی نقصان پہنچ سکتا ہے اور لینڈ سلائیڈنگ کا خطرہ بھی بڑھ سکتا ہے۔ حکام نے یہ بھی خبردار کیا کہ خراب موسمی حالات سے ساحلی علاقوں میں لوگوں، مویشیوں اور غیر محفوظ ڈھانچوں کو نقصان پہنچ سکتا ہے۔

شدید بارش کے پیش نظر تریشور ضلع انتظامیہ نے ہفتے کے روز تمام تعلیمی اداروں، بشمول پیشہ ورانہ کالجوں، میں تعطیل کا اعلان کر دیا ہے۔ ریاستی ڈیزاسٹر مینجمنٹ اتھارٹی نے لینڈ سلائیڈنگ، مٹی کھسکنے اور اچانک سیلاب کے خطرے والے علاقوں میں رہنے والوں سے اپیل کی ہے کہ وہ مقامی انتظامیہ کی ہدایت کے مطابق محفوظ مقامات پر منتقل ہو جائیں۔ دریاؤں کے کنارے اور ڈیموں کے زیریں علاقوں میں رہنے والے افراد کو بھی الرٹ رہنے اور ضرورت پڑنے پر امدادی کیمپوں میں منتقل ہونے کی ہدایت دی گئی ہے۔