دارجلنگ / آواز دی وائس

دارجلنگ (مغربی بنگال) میں لگاتار کئی دنوں سے ہونے والی موسلا دھار بارش کے بعد مقامی لوگ سخت مشکلات کا سامنا کر رہے ہیں۔ اس شدید بارش نے بنیادی ڈھانچے کو تباہ کر دیا ہے، جس میں دودھیا سے میرک اور نیپال کو جوڑنے والی سڑک کو بھی شدید نقصان پہنچا ہے۔

مسلسل بارشوں کے باعث علاقے میں پانی کی سطح بڑھ گئی، جس سے کئی گھروں اور عمارتوں کے منہدم ہونے کے واقعات پیش آئے، نتیجتاً مقامی رہائشی خوف اور پریشانی میں مبتلا ہیں۔ ایک مقامی شخص نے بتایا کہ ایک پل، جو علاقے کو دیگر حصوں سے جوڑتا تھا، وہ بھی ٹوٹ گیا ہے جس سے مشکلات مزید بڑھ گئی ہیں۔ اس نے حکومت سے مدد بھی طلب کی۔

اس نے بتایا کہ اتوار کو بہت زوروں کی بارش ہوئی اور صبح 6 بجے تک بارش جاری رہی... میرا گھر اور دکان دونوں تباہ ہو گئے... ہم صبح سویرے ہی یہاں سے نکل گئے... یہاں کا پل بھی ٹوٹ گیا ہے، جس کی وجہ سے لوگ بہت پریشان ہیں کیونکہ کوئی کہیں جا نہیں سکتا... یہاں بجلی بھی نہیں ہے... کچھ گھر مکمل طور پر گر گئے ہیں... ہم حکومت سے اپیل کرتے ہیں کہ جلد از جلد مدد بھیجی جائے۔ ایک اور مقامی شہری امرت تھانی نے ٹوٹی سڑکوں پر تشویش ظاہر کرتے ہوئے حکومت کی امداد پر سوال اٹھایا۔

انہوں نے کہا کہ یہ پل لوگوں کے آنے جانے کا واحد راستہ تھا، اور اب جب یہ ٹوٹ گیا ہے تو لوگ یہاں پھنس گئے ہیں... وزیر اعلیٰ یہاں آئے اور جاں بحق ہونے والوں کے لیے معاوضے کی بات کی، لیکن ان لوگوں کا کیا جو زندہ ہیں مگر جن کے پاس کچھ بھی نہیں بچا؟ بدھ کے روز مرکزی وزیر کرن رجیجو نے دارجلنگ کے ان علاقوں کا دورہ کیا جو سیلاب اور لینڈ سلائیڈ سے متاثر ہوئے ہیں۔

رجیجو نے نقصان کا جائزہ لیا اور متاثرہ لوگوں سے ملاقات کی۔ ان کے ساتھ دارجلنگ کے رکن پارلیمان راجو بستا بھی موجود تھے۔ وزیر نے ریاستی حکومت سے اپیل کی کہ وہ ریلیف اقدامات میں تیزی لائے۔ انہوں نے ترنمول کانگریس (ٹی ایم سی) حکومت سے کہا کہ وہ اس تباہی کا نقشہ تیار کرے اور متاثرین کی بازآبادکاری کے اقدامات کرے۔

رجیجو نے کہا کہ اب تک جو ہم نے دیکھا ہے اور جو رپورٹیں ملی ہیں، اس کے مطابق دارجلنگ میں بارشوں کا اثر بہت تباہ کن رہا ہے۔ جانی و مالی نقصان بے حد ہے۔ مقامی نمائندے اور انتظامیہ پوری کوشش کر رہے ہیں، لیکن ریاستی حکومت کو اپنے ریلیف اقدامات میں تیزی لانی ہوگی۔ وزیر اعلیٰ سلیگڑی میں متاثرہ افراد سے ملنے گئیں، لیکن ہم چاہتے ہیں کہ ریاستی حکومت تباہی کا مکمل نقشہ تیار کرے... جن لوگوں نے اپنی روزی روٹی اور گھر کھو دیے ہیں، انہیں فوری ریلیف فراہم کر کے دوبارہ آباد کیا جائے۔ یہ ایک بڑا چیلنج ہوگا۔

وزیر اعلیٰ ممتا بنرجی نے بتایا کہ شمالی مغربی بنگال میں شدید بارش اور لینڈ سلائیڈز کے باعث 27 افراد ہلاک ہوئے ہیں، جن میں ایک نیپال اور ایک بھوٹان کا شہری بھی شامل ہے۔