حیدرآباد: حیدرآباد کے سعید آباد علاقے میں واقع سکسس اسکول کے باہر جمعہ کو پولیس کی بھاری نفری تعینات کی گئی، جہاں دوسری جماعت کے ایک ہندو طالب علم کو مبینہ طور پر گھریلو کام کے طور پر کلمہ پڑھنے کے لیے کہے جانے کے الزام پر تنازع کھڑا ہو گیا ہے۔جمعہ کی صبح اسکول کا احاطہ سنسان دکھائی دیا اور صبح 9 بجے کے بعد نہ طلبہ نظر آئے اور نہ ہی عملہ۔

اس سے ایک روز قبل والدین اور مقامی افراد نے اسکول کے باہر احتجاج کرتے ہوئے الزام لگایا تھا کہ کم عمر طلبہ پر مذہبی تعلیم مسلط کرنے کی کوشش کی گئی، جس کے بعد علاقے میں کشیدگی کے پیش نظر پولیس کی بھاری نفری تعینات کی گئی۔مرکزی وزیر بندی سنجے کمار نے اس واقعے کی مذمت کرتے ہوئے سماجی رابطے کے ذریعہ پر کہا کہ ہندو طلبہ کو اسکول میں کلمہ پڑھنے پر مجبور کرنا انتہائی خطرناک اور ناقابل قبول عمل ہے۔ انہوں نے اسے مذہبی آزادی پر براہ راست حملہ قرار دیتے ہوئے مطالبہ کیا کہ تلنگانہ حکومت سعید آباد کے سکسس اسکول کی انتظامیہ کے خلاف فوری اور سخت کارروائی کرے۔

انہوں نے یہ سوال بھی اٹھایا کہ خود کو سیکولر کہنے والی آوازیں اس معاملے پر خاموش کیوں ہیں۔ ان کا کہنا تھا کہ اگر ایسے واقعات کو آج نظر انداز کیا گیا تو کل یہ پورے تلنگانہ میں پھیل سکتے ہیں۔ انہوں نے کہا کہ بی جے پی ہندو عقیدے۔ روایات اور ثقافت کو کسی بھی صورت پامال نہیں ہونے دے گی۔گوشہ محل کے رکن اسمبلی ٹی راجہ سنگھ نے بھی اس واقعے پر شدید ردعمل ظاہر کیا۔ انہوں نے کہا کہ یہ واقعہ اس پارلیمانی حلقے میں پیش آیا ہے جس کی نمائندگی آل ہند مجلس اتحاد المسلمین کے صدر اسد الدین اویسی کرتے ہیں۔ انہوں نے الزام لگایا کہ دوسری جماعت کے ہندو بچوں کو زبردستی کلمہ سکھانے کی کوشش کی گئی جو انتہائی تشویش ناک اور قابل مذمت ہے۔ ان کے مطابق بچوں کے مذہبی عقیدے اور والدین کے اعتماد سے کھلواڑ کسی بھی صورت برداشت نہیں کیا جا سکتا اور ذمہ دار افراد کے خلاف سخت کارروائی ہونی چاہیے۔

یہ تنازع بدھ کی شام اس وقت سامنے آیا جب والدین کو بچوں کو دیے گئے گھریلو کام کی نوعیت کا علم ہوا۔حیدرآباد پولیس کے مطابق اس جماعت میں کل 25 طلبہ زیر تعلیم ہیں جن میں صرف ایک طالب علم ہندو ہے۔ پولیس کا کہنا ہے کہ متعلقہ ٹیچر نے پوری جماعت کو روزانہ کے گھریلو کام کے طور پر کلمہ اور سورۂ فاتحہ پڑھنے کی ہدایت دی تھی۔ اس کے بعد ہندو طالب علم کے والدین نے اسکول انتظامیہ اور پولیس سے شکایت کی۔ادھر احتجاج کے بعد اسکول انتظامیہ نے تنازع میں ملوث ٹیچر کی خدمات ختم کرتے ہوئے انہیں بلیک لسٹ کرنے کا اعلان کیا ہے۔ علاقے میں کسی بھی ناخوشگوار واقعے سے نمٹنے کے لیے پولیس کی بھاری نفری بدستور تعینات ہے۔