نئی دہلی/ آواز دی وائس

جھلسا دینے والی گرمی، ہوا کے ساتھ بھی پسینہ، اور ایسی تپش کہ جیسے جسم جلنے لگے... دہلی میں گرمی کا قہر اس قدر بڑھ چکا ہے کہ لوگوں کا جینا دوبھر ہو گیا ہے۔ گھر سے باہر نکلنے والوں کی بات چھوڑیں، اندر رہنے والوں کا حال بھی خراب ہے۔ اگرچہ درجہ حرارت 40 ڈگری سیلسیس کے قریب ہے، لیکن اس کی حدت کا احساس 50 ڈگری سیلسیس جیسا ہو رہا ہے۔

اب سوال یہ اٹھتا ہے کہ آخر 40 ڈگری میں 50 جیسی تکلیف کیوں محسوس ہو رہی ہے؟ موسم میں اس تبدیلی کی وجہ کیا ہے؟ اور کب تک اس گرمی سے راحت ملے گی؟ ان تمام سوالوں کے جوابات محکمہ موسمیات نے اپنے بلیٹن میں دیے ہیں۔

رپورٹ کے مطابق، منگل کو دہلی کا درجہ حرارت 41.8 ڈگری سیلسیس تھا، لیکن اس کا احساس 50 ڈگری سیلسیس کے برابر ہو رہا تھا۔ اس کی وجہ ہوا میں نمی (رطوبت) کی مقدار کا بڑھ جانا ہے، جس کی وجہ سے گرمی کا اثر معمول سے کہیں زیادہ محسوس ہوتا ہے۔ دراصل، جب بھی ہوا میں نمی کی مقدار زیادہ ہوتی ہے تو گرمی اور حبس دونوں بڑھ جاتے ہیں، اور یہی صورتحال منگل کو بھی رہی۔

زیادہ گرمی محسوس ہونے کی وجہ

منگل کو دہلی کے کچھ علاقوں میں درجہ حرارت اگرچہ 42 ڈگری سیلسیس تک پہنچا، لیکن لوگوں کو 48 سے 50 ڈگری جیسی گرمی محسوس ہوئی۔ کیونکہ ہوا میں نمی کے باعث اصل درجہ حرارت سے کہیں زیادہ حدت کا احساس ہوتا ہے۔ ایسی صورتحال میں اگر درجہ حرارت 40 ڈگری ہو بھی، تو وہ 3 سے 5 ڈگری یا اس سے بھی زیادہ محسوس ہوتا ہے۔ مثال کے طور پر، منگل کی شام کو صفدرجنگ اسٹیشن پر 42 ڈگری درجہ حرارت ریکارڈ کیا گیا، لیکن 43 فیصد نمی کے باعث وہ 50 ڈگری جیسا محسوس ہوا۔ محکمہ موسمیات نے آگے بھی ایسے ہی موسم کی پیشگوئی کی ہے۔

کب آئے گی گرمی سے راحت؟

محکمہ موسمیات نے آج یعنی 22 مئی کے لیے دہلی کا درجہ حرارت 42 ڈگری رہنے اور نمی کا تناسب 67 فیصد سے 43 فیصد کے درمیان رہنے کا اندازہ لگایا ہے۔ یعنی آج بھی دہلی والوں کو شدید گرمی کا سامنا کرنا پڑے گا۔ تاہم، 22 مئی کے بعد درجہ حرارت میں کچھ کمی آنے کی امید ہے۔ ہیٹ انڈیکس (یعنی گرمی کا محسوس ہونے والا درجہ حرارت) 49.6 ڈگری سیلسیس تک پہنچ چکا ہے، جو پچھلے کئی دنوں سے مسلسل بڑھ رہا ہے۔ اس حبس بھرے موسم کی ایک بڑی وجہ مغربی ہواؤں  کو بھی قرار دیا جا رہا ہے۔

کب تک برداشت کرنی پڑے گی گرمی؟

محکمہ موسمیات کے مطابق مغربی ہواؤں کی وجہ سے بارش اور آندھی آنے کی توقع ہے، جبکہ بحیرہ عرب کے اوپر بننے والے ایک سائیکلونک سسٹم کے سبب دہلی میں نمی کی مقدار میں اضافہ ہوا ہے، جس سے حبس بڑھا ہے۔ محکمہ موسمیات نے بدھ کے روز دہلی میں بارش اور آندھی کی پیشگوئی کی ہے، جس کے دوران زیادہ سے زیادہ درجہ حرارت 39 ڈگری اور کم سے کم 29 ڈگری رہنے کا امکان ہے۔ دہلی میں عام طور پر مانسون جون میں آتا ہے، اس لیے ابھی لوگوں کو اس چپچپے، حبس بھرے موسم کا سامنا کچھ وقت اور کرنا پڑے گا۔