نئی دہلی

 ہریانہ حکومت نے ریاست میں 31 اگست سے زمینی سطح پر اسمارٹ میٹرنگ کا کام شروع کرنے کا وعدہ کیا ہے۔ یہ یقین دہانی مرکزی وزیر برائے بجلی، رہائش اور شہری امور منوہر لال کی زیر صدارت ہونے والے جائزہ اجلاس میں کرائی گئی، جس میں ریاست کے بجلی کے شعبے سے متعلق مختلف امور کا جائزہ لیا گیا۔

وزارتِ بجلی کے مطابق اجلاس کے دوران منوہر لال نے اسمارٹ میٹرنگ منصوبے کی پیش رفت کا جائزہ لیا اور ریاستی حکومت کو متعلقہ کاموں کی تکمیل اور ٹھیکوں کی الاٹمنٹ کے عمل میں تیزی لانے کا مشورہ دیا۔ اس پر ہریانہ حکومت نے 31 اگست سے اسمارٹ میٹرنگ کا عملی آغاز کرنے کا وعدہ کیا۔

مرکزی وزیر نے پری پیڈ اسمارٹ میٹرز کو مرحلہ وار نافذ کرنے کی ضرورت پر بھی زور دیا۔ انہوں نے مشورہ دیا کہ اس عمل کا آغاز سرکاری صارفین اور سرکاری ملازمین سے کیا جائے، اس کے بعد 10 کلو واٹ سے زیادہ لوڈ رکھنے والے بڑے صارفین کو شامل کیا جائے۔ انہوں نے رضاکارانہ طور پر میٹر تبدیل کروانے والوں کے لیے مناسب مراعات دینے کی بھی سفارش کی۔

بجلی تقسیم کار کمپنیوں کی مالی حالت بہتر بنانے کی اہمیت پر زور دیتے ہوئے منوہر لال نے کہا کہ بجلی ایک معاشی شے ہے اور بجلی کمپنیوں کا انتظام مضبوط کاروباری اصولوں کے مطابق ہونا چاہیے۔انہوں نے بجلی خریدنے کی لاگت کم کرنے، اخراجات کو معقول بنانے اور آمدنی بڑھانے پر توجہ دینے کی ضرورت پر زور دیا۔

وزیر نے کہا کہ گزشتہ چند برسوں کے دوران مجموعی تکنیکی و تجارتی نقصانات (اے ٹی اینڈ سی) میں مسلسل کمی آئی ہے، تاہم کارکردگی کو مزید بہتر بنانے کی کوششیں جاری رہنی چاہئیں۔منوہر لال نے خودکار ادائیگی کے نظام کے ذریعے سرکاری محکموں کے واجبات اور سبسڈی کی بروقت ادائیگی پر بھی زور دیا اور ہدایت دی کہ نقصانات کم کرنے سے متعلق تمام منصوبے ترجیحی بنیادوں پر مقررہ مدت کے اندر مکمل کیے جائیں۔

اجلاس میں ریاست کے اندر بجلی کی ترسیل کے نظام اور مستقبل کی ضروریات کا بھی جائزہ لیا گیا۔ مرکزی وزیر نے ہریانہ کو مشورہ دیا کہ وہ زیر التوا مسائل حل کرے اور بجلی کی بڑھتی ہوئی طلب کے مطابق پیداوار کی صلاحیت میں بھی اضافہ یقینی بنائے۔اجلاس میں "پی ایم سوریہ گھر مفت بجلی یوجنا" کے تحت ہونے والی پیش رفت کا بھی جائزہ لیا گیا۔ منوہر لال نے ہریانہ حکومت کو ہدایت دی کہ اس منصوبے کے تحت صارفین کے اندراج میں اضافہ کرنے کے لیے ایک جامع عملی منصوبہ تیار کیا جائے، کیونکہ اس سے صارفین کے بجلی کے اخراجات کم کرنے میں مدد ملے گی۔

اجلاس میں ہریانہ کے وزیرِ بجلی انیل وج، ریاستی حکومت کے سینئر افسران، وزارتِ بجلی کے نمائندوں اور بجلی کے شعبے سے وابستہ مرکزی سرکاری اداروں کے نمائندوں نے شرکت کی۔اس دوران "نظرِ ثانی شدہ تقسیمی شعبہ اسکیم" (آر ڈی ایس ایس) کے تحت ہونے والی پیش رفت اور ریاستی بجلی کمپنیوں کی آپریشنل و مالی کارکردگی کا بھی جائزہ لیا گیا۔

منوہر لال نے کہا کہ مخلصانہ کوششوں سے ریاست کی بجلی تقسیم کار کمپنیوں کو مالی طور پر مضبوط اور خود کفیل بنانے میں نمایاں مدد ملے گی، جس سے ہریانہ کا بجلی کا شعبہ مزید مستحکم ہوگا۔

انہوں نے ریاست کو مرکزی حکومت کی جانب سے ہر ممکن تعاون کی یقین دہانی بھی کرائی۔دوسری جانب انیل وج نے کہا کہ ہریانہ حکومت منظور شدہ منصوبوں پر عمل درآمد اور ریاست کے بجلی کے شعبے کی مجموعی کارکردگی بہتر بنانے کے لیے تمام ضروری اقدامات کرے گی۔