چنڈی گڑھ/ آواز دی وائس

ہریانہ حکومت نے سابق پنجاب ڈائریکٹر جنرل آف پولیس (ہیومن رائٹس) محمد مصطفیٰ، ان کی اہلیہ اور سابق کانگریس وزیر رضیہ سلطانہ، ان کی بیٹی اور بہو کے خلاف درج مقدمے کی تحقیقات کے لیے مرکزی تحقیقاتی بیورو (سی بی آئی) سے انکوائری کی سفارش کی ہے۔ یہ مقدمہ ان کے بیٹے عاقل اختر کی موت سے متعلق ہے۔

ایک سرکاری اہلکار کے مطابق، مرکز نے ہریانہ میں سی بی آئی کے دائرۂ اختیار کو توسیع دینے کی منظوری دے دی ہے تاکہ یہ کیس کی تحقیقات کر سکے۔ جیسے ہی مرکزی حکومت اس سلسلے میں حکم جاری کرے گی، سی بی آئی باضابطہ طور پر تحقیقات سنبھال لے گی۔ یہ مقدمہ ابتدا میں 20 اکتوبر کو پنچکلا پولیس نے محمد مصطفیٰ، جو 1985 بیچ کے ریٹائرڈ آئی پی ایس افسر ہیں، اور ان کے اہلِ خانہ کے خلاف بھارتیہ نیائے سنہیتا  کی دفعات 103(1) (قتل) اور 61 کے تحت درج کیا تھا۔ حکام کا کہنا ہے کہ کیس کی حساس نوعیت، الزامات کی سنگینی، اور مختلف ریاستوں کے دائرۂ اختیار کے سبب معاملہ سی بی آئی کے حوالے کرنے کا فیصلہ کیا گیا۔

۔35 سالہ عاقل اختر 16 اکتوبر کی رات کو اپنے گھر سیکٹر 4، مانسادیوی کمپلیکس، پنچکلا میں بے ہوش پائے گئے تھے اور بعد میں سول اسپتال میں مردہ قرار دیے گئے۔ ابتدائی طور پر کسی بدعملی کا شبہ نہیں کیا گیا اور پوسٹ مارٹم کے بعد لاش اہلِ خانہ کے حوالے کر دی گئی تھی۔ تاہم، بعد میں مالیروٹلہ کے شمس الدین چودھری کی شکایت پر مقدمہ درج کیا گیا، جنہوں نے الزام لگایا کہ یہ مشتبہ موت ہے۔ انہوں نے ایک ویڈیو کا حوالہ دیا جو عاقل نے اگست میں پوسٹ کی تھی، جس میں اس نے اپنی جان کو خطرے کی بات کہی تھی۔

تازہ پیش رفت پر ردِ عمل ظاہر کرتے ہوئے محمد مصطفیٰ نے کہا کہ وہ اور ان کا خاندان مکمل طور پر تحقیقات میں تعاون کے لیے تیار ہیں۔ وہ اس وقت اپنے آبائی مقام سہارنپور (اتر پردیش) میں ہیں، تاہم انہوں نے بتایا کہ وہ 25 اکتوبر کو مالیروٹلہ میں دعا کی تقریب میں شرکت کے لیے جائیں گے اور اگلے دن پنچکلا واپس لوٹ آئیں گے۔

مصطفیٰ نے اپنے بیٹے کی موت کو "ایک باپ کے لیے سب سے بڑا غم" قرار دیتے ہوئے کہا کہ عاقل پچھلے 18 سال سے منشیات کی لت میں مبتلا تھا اور غالباً اسی کے زیادہ استعمال سے اس کی موت ہوئی۔ انہوں نے قتل کے الزامات کو "چھوٹی سطح کی سیاست" قرار دیا۔ انہوں نے کہا کہ ایک باپ کے لیے اس سے بڑا دکھ کوئی نہیں کہ وہ اپنا اکلوتا بیٹا کھو دے۔ میرا بیٹا 18 سال سے نشے کی لعنت میں مبتلا تھا۔ کچھ لوگ اس سانحے کو اپنے سیاسی مقاصد کے لیے استعمال کر رہے ہیں۔ میرے خلاف مقدمے کا خیرمقدم کرتا ہوں، میرے پاس چھپانے کے لیے کچھ نہیں۔ انہوں نے مزید الزام لگایا کہ شکایت کنندہ شمس الدین چودھری کو ایک "سیاست دان کے مہرے کے طور پر" استعمال کیا جا رہا ہے۔ مصطفیٰ نے کہا، "اگر میں مجرم ہوں تو مجھے پھانسی دی جائے، لیکن میں تحقیقات کے ہر مرحلے میں تعاون کروں گا۔ سچ سامنے آنا چاہیے۔

ہریانہ حکومت کی جانب سے معاملہ باضابطہ طور پر سی بی آئی کو بھیجنے کے بعد، امید ہے کہ وفاقی ایجنسی جلد ہی یہ تحقیقات سنبھال لے گی۔ اس طرح سابق پنجاب ڈی جی پی اور ان کے خاندان سے متعلق یہ ہائی پروفائل مقدمہ سی بی آئی کے دائرۂ اختیار میں آ جائے گا۔