ہریانہ کے وزیر اعلیٰ نے ہائیڈروجن ٹرین کی منظوری کے لیے وزیر اعظم کا شکریہ ادا کیا
نئی دہلی
ہریانہ کے وزیر اعلیٰ نائب سنگھ سینی نے بدھ کے روز کہا کہ وزیر اعظم نریندر مودی کی قیادت میں ریاست ترقی اور ریلوے بنیادی ڈھانچے کے شعبے میں ایک نیا سنگِ میل قائم کرے گی۔وزیر اعلیٰ نے ریلوے وزارت کی جانب سے شمالی ریلوے کے جیند-سونی پت روٹ پر ملک کی پہلی ہائیڈروجن سے چلنے والی 10 ڈبوں پر مشتمل ٹرین کے آپریشن کی منظوری دینے پر وزیر اعظم اور مرکزی حکومت کا شکریہ ادا کیا۔
ایک سرکاری بیان کے مطابق یہ ٹرین زیادہ سے زیادہ 75 کلومیٹر فی گھنٹہ کی رفتار سے چلے گی۔سینی نے کہا کہ یہ منصوبہ ہریانہ کے ریلوے بنیادی ڈھانچے کو مضبوط بنانے کی سمت ایک بڑا قدم ہے۔
اس ٹرین کی مجموعی صلاحیت 1,200 کلوواٹ ہوگی اور یہ ڈسٹری بیوٹڈ پاور رولنگ اسٹاک ٹیکنالوجی پر مبنی ہوگی۔ اس ٹیکنالوجی میں پوری ٹرین کو چلانے کے لیے صرف ایک انجن پر انحصار کرنے کے بجائے مختلف ڈبوں میں توانائی تقسیم کی جاتی ہے۔
وزارت کی جانب سے یہ منظوری ریسرچ ڈیزائن اینڈ اسٹینڈرڈز آرگنائزیشن کی تکنیکی منظوری اور ریلوے سیفٹی کمشنر کی جانب سے حفاظتی جانچ مکمل ہونے کے بعد دی گئی ہے۔سینی نے کہا کہ اس جدید منصوبے سے نہ صرف ریلوے نظام مزید مؤثر ہوگا بلکہ ماحول دوست ٹیکنالوجی کو بھی فروغ ملے گا، جو پائیدار ترقی کے ہدف کی جانب ایک اہم پیش رفت ہے۔
