نئی دہلی:ہنسراج کالج نے سالانہ فیسٹ کے دوران مبینہ بدانتظامی کے الزامات پر تقریباً 30 طلبہ کو معطل کر دیا ہے جن میں طلبہ یونین کے چار عہدیداران بھی شامل ہیں۔کالج انتظامیہ کے مطابق ان طلبہ پر سوشل میڈیا کے ذریعے ادارے کی بدنامی کرنے اور توہین آمیز زبان استعمال کرنے جیسے الزامات عائد کیے گئے ہیں۔ اس حوالے سے نوٹسز 20 اپریل سے 25 اپریل کے درمیان جاری کیے گئے۔ یہ کارروائی 8 اور 9 اپریل کو منعقد ہونے والے سالانہ فیسٹ کے دوران مبینہ تشدد اور نظم و ضبط کی خلاف ورزی کے واقعات کے بعد کی گئی ہے۔25 اپریل کے نوٹس میں کہا گیا ہے کہ یونین کے عہدیداران کو فوری طور پر معطل کر دیا گیا ہے اور ان کے خلاف تادیبی کارروائی زیرِ غور ہے۔

کالج انتظامیہ کے مطابق معطل طلبہ کو دورانِ معطلی کالج میں داخلے سے روک دیا گیا ہے تاہم انہیں امتحانات اور داخلی اسیسمنٹ میں شرکت کی اجازت ہوگی۔ معطلی کی مدت واضح نہیں کی گئی اور اسے عارضی اقدام قرار دیا گیا ہے جو اگلے احکامات تک نافذ رہے گا۔پہلا نوٹس 20 اپریل کو ایک طالب علم کے خلاف جاری کیا گیا تھا جس پر ادارے کی بدنامی اور عملے کے خلاف نامناسب زبان استعمال کرنے کا الزام تھا۔ بعد میں جاری دوسرے نوٹس میں 14 طلبہ کے نام شامل کیے گئے جن پر فیسٹ کے دوران بدانتظامی، جسمانی تشدد اور کیمپس کے نظم کو متاثر کرنے کے الزامات لگائے گئے۔

اس اقدام پر دہلی یونیورسٹی اسٹوڈنٹس یونین (ڈوسو) نے سخت ردعمل ظاہر کرتے ہوئے اسے طلبہ کی جمہوریت پر حملہ اور انتظامی اختیارات کا غلط استعمال قرار دیا ہے۔ڈوسو کے صدر آریامن سائی نے کہا کہ یہ وہی نمائندے ہیں جو طلبہ کے حقوق کے لیے احتجاج کرتے ہیں، تو ان کا قصور کیا ہے، کیا سچ بولنا یا انتظامی خامیوں کو اجاگر کرنا جرم ہے۔ انہوں نے مزید کہا کہ منتخب آوازوں کو دبانا حکمرانی نہیں بلکہ خوف ہے اور معطلی کے فیصلے کو فوری طور پر واپس لینے کا مطالبہ کیا۔