ممبئی : "ہماری چھوری، چھورے سے کم ہے کیا!" . یہ مشہور جملہ سوشل میڈیا پر چھا گیا ہے کیونکہ بھارت کی خواتین کرکٹ ٹیم نے اپنی پہلی آئی سی سی ویمنز ورلڈ کپ ٹرافی جیت کر تاریخ رقم کر دی ہے۔

کرکٹ کے دیوانوں سے لے کر بالی ووڈ کے ستاروں تک، پورا ملک اس شاندار کامیابی پر فخر کے ساتھ جشن منا رہا ہے۔

بالی ووڈ کی کئی شخصیات نے سوشل میڈیا پر اپنے جوش و خروش کا اظہار کرتے ہوئے ٹیم انڈیا کو مبارکباد دی۔

اداکار اجے دیوگن نے ایکس پر لکھا، "یہ رات کبھی نہیں بھولے گی۔ شکریہ چیمپئنز! اس ٹیم نے دنیا کو دکھا دیا کہ سچا حوصلہ اور یقین کیا کر سکتا ہے!"

ابھیشیک بچن نے بھی خوشی کا اظہار کرتے ہوئے لکھا، "چلوووو انڈیاااااا!!! ورلڈ چیمپئنز! زبردست کھیلا، خواتین!"

سینئر اداکار انیل کپور نے لکھا، "خواب سے حقیقت تک . ہماری خواتین نے دنیا فتح کر لی! کیا شان دار لمحہ ہے، کیا وراثت چھوڑ رہی ہیں!"

ریتیش دیشمکھ نے ایک ویڈیو کے ساتھ جذباتی پیغام شیئر کیا، "ہماری چھوریاں، چھوروں سے کم ہیں کیا؟ تاریخ جھک گئی، بیٹیاں اُٹھ کھڑی ہوئیں۔ یہ لمحہ ہمیشہ بھارت کے فخر کا حصہ رہے گا۔ آنے والی نسلیں ان سے تحریک لیں گی!"

ملیالم سپر اسٹار مموٹی نے بھی مبارکباد دیتے ہوئے لکھا، "ہماری ناقابلِ یقین ویمنز ٹیم انڈیا کو مبارکباد! آپ نے تاریخ رقم کر دی اور پورے ملک کو فخر سے بھر دیا۔ یہ جیت صرف ایک ٹرافی نہیں، بلکہ جذبے، ہمت اور یقین کی کہانی ہے۔"

سینئر اداکار انوپم کھیر نے ہندی میں جوش کے ساتھ لکھا، "جیت... جیت... بھارت کی جیت! بھارت ماتا کی جے! وندے ماترم!"

شاعر و نغمہ نگار جاوید اختر نے بھی کہا، "ہماری کرکٹ ٹیم کو دل سے مبارکباد اور شکریہ۔ بچیوں، تم نے ہمیں لفظوں سے بڑھ کر فخر دیا ہے۔"

میچ کی بات کریں تو جنوبی افریقہ نے ٹاس جیت کر پہلے گیند بازی کا فیصلہ کیا۔ بھارت نے اس موقع کا بھرپور فائدہ اٹھایا۔ اسمتری مندھانا (45) اور شفالی ورما (87) نے 100 سے زائد رنز کی اوپننگ پارٹنرشپ دی، جس کے بعد دیپتی شرما (58) اور رچا گھوش (34) نے اننگز کو مضبوط انجام دیا۔ بھارت نے مقررہ 50 اوور میں 298/7 کا بڑا ہدف دیا۔

جواب میں جنوبی افریقہ کی ٹیم 246 رنز پر آل آؤٹ ہو گئی۔ دیپتی شرما نے زبردست گیند بازی کرتے ہوئے 5 وکٹیں حاصل کیں، جب کہ شفالی نے بھی 2 وکٹیں لیں۔ بھارت نے 52 رنز سے تاریخی جیت درج کر کے ورلڈ کپ کی چمکتی ہوئی ٹرافی اپنے نام کر لی۔