اکتا نگر/ آوازدی وائس

جیسے ہی "راشٹریہ ایکتا پریڈ" اختتام پذیر ہوئی، وزیرِاعظم نریندر مودی نے پورے اُس راستے پر پیدل چلتے ہوئے عوام کا جوش و خروش سے استقبال کیا جہاں پریڈ منعقد ہوئی تھی۔

تقریب سے خطاب کرتے ہوئے وزیرِاعظم مودی نے کانگریس حکومت پر تقسیمِ ہند میں کردار ادا کرنے کا الزام لگاتے ہوئے کہا کہ کانگریس نے انگریزوں کی غلامی کی ذہنیت اپنائی اور مذہبی بنیادوں پر "وندے ماترم" کے حصے کو ہٹا دیا۔

انہوں نے کہا کہ کانگریس نے صرف اقتدار اور پارٹی ہی انگریزوں سے نہیں لی، بلکہ ان کی غلام ذہنیت کو بھی اپنا لیا۔ چند دنوں میں 'وندے ماترم' اپنی 150ویں سالگرہ منائے گا۔ جب 1905 میں انگریزوں نے بنگال کی تقسیم کی، تب وندے ماترم ہر ہندوستانی شہری کی آواز بن گیا۔ یہ قوم کی یکجہتی اور اتحاد کی علامت بنا۔ انگریزوں نے وندے ماترم کے نعرے پر پابندی لگانے کی کوشش کی، مگر وہ ناکام رہے۔ وندے ماترم کی صدا ہندوستان کے ہر کونے میں گونجتی رہی۔ لیکن جو کام انگریز نہ کر سکے، وہ کانگریس نے کر دکھایا۔ کانگریس نے مذہبی بنیادوں پر وندے ماترم کے ایک حصے کو ہٹا دیا۔ اس کا مطلب یہ ہے کہ کانگریس نے نہ صرف سماج کو تقسیم کیا بلکہ انگریزوں کے ایجنڈے کو بھی آگے بڑھایا۔

وزیرِاعظم نے مزید کہا کہ جس دن کانگریس نے وندے ماترم کو توڑنے اور تقسیم کرنے کا فیصلہ کیا، اسی دن ہندوستان کی تقسیم کی بنیاد رکھ دی گئی۔ اگر کانگریس نے یہ گناہ نہ کیا ہوتا تو آج ہندوستان کی تصویر بالکل مختلف ہوتی۔ اسی دوران، وزیرِاعظم نریندر مودی نے سوشل میڈیا پلیٹ فارم "ایکس" پر لکھا کہ کیوڑیا میں سردار ولبھ بھائی پٹیل کو 'اسٹیچو آف یونٹی' پر خراجِ عقیدت پیش کیا۔ یہ مجسمہ سردار پٹیل کے وژن، ہندوستان کی یکجہتی اور طاقت کا شاندار مظہر ہے۔ دنیا کے سب سے اونچے مجسمے کے طور پر، یہ قومی فخر اور اجتماعی عزم کی علامت ہے، جو سردار پٹیل کے خوابوں کی تعبیر کی راہ دکھاتا ہے۔

اس سے قبل جمعہ کو وزیرِاعظم مودی نے سردار پٹیل کے ملک کی نظریاتی، انتظامی اور قومی سمت کی تشکیل میں کردار کو یاد کرتے ہوئے ان کی خدمات کو خراجِ عقیدت پیش کیا۔ انہوں نے اپنے سوشل میڈیا پلیٹ فارم پر سردار پٹیل کے وژن اور عوامی خدمت کے عزم پر مشتمل ایک بصری پیغام بھی شیئر کیا۔

وزیرِاعظم نے "ایکس" پر لکھا کہ ہندوستان سردار ولبھ بھائی پٹیل کی 150ویں جینتی پر انہیں خراجِ عقیدت پیش کرتا ہے۔ وہ ہندوستان کے اتحاد کے محرک تھے، جنہوں نے آزادی کے بعد ہمارے ملک کی بنیاد مضبوط کی۔ قومی یکجہتی، بہتر حکمرانی، اور عوامی خدمت کے لیے ان کا غیر متزلزل عزم نسلوں کو تحریک دیتا رہے گا۔ ہم اُن کے متحد، مضبوط اور خود انحصار ہندوستان کے وژن کو برقرار رکھنے کے اپنے اجتماعی عہد کی تجدید کرتے ہیں۔

سردار ولبھ بھائی پٹیل 31 اکتوبر 1875 کو نڈیا، گجرات میں پیدا ہوئے۔ انہیں "ہندوستان کا آئرن مین" بھی کہا جاتا ہے۔ وہ ملک کے پہلے نائب وزیرِاعظم اور وزیرِداخلہ تھے۔ آزادی کے بعد 560 سے زائد ریاستوں کو ہندوستانی اتحاد میں شامل کرنے میں ان کا کلیدی کردار رہا۔ ان کی قیادت نے مشکل ترین وقت میں ہندوستان کو ایک متحد اور باوقار قوم کے طور پر ابھرنے میں مدد دی۔